حضرت عبادہ بن صامت رضی اللہ عنہ سے روایت ہے کہ نبی صلی اللہ علیہ وسلم نے ”حضرت حمل بن مالک ہذلی رضی اللہ عنہ کو ان کی اس بیوی کے ترکے سے حصہ دلوایا جسے ان کی دوسری بیوی نے قتل کر دیا تھا۔“ [سنن ابن ماجه/كتاب الديات/حدیث: 2643]

عمرو بن شعیب رضی اللہ عنہ نے اپنے والد سے، اور انہوں نے اپنے دادا (عبداللہ بن عمرو بن عاص رضی اللہ عنہ) سے روایت کی کہ رسول اللہ صلی اللہ علیہ وسلم نے یہ فیصلہ صادر فرمایا کہ ”اہل کتاب کا خون بہا مسلمانوں کے خون بہا سے نصف ہے“۔ اہل کتاب سے مراد یہودی اور عیسائی ہیں۔ [سنن ابن ماجه/كتاب الديات/حدیث: 2644]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”قاتل وارث نہیں ہوتا۔“ [سنن ابن ماجه/كتاب الديات/حدیث: 2645]

عمرو بن شعیب رحمہ اللہ سے روایت ہے کہ بنو مدلج قبیلے کے ایک آدمی ابو قتادہ نے اپنے بیٹے کو قتل کر دیا۔ حضرت عمر رضی اللہ عنہ نے اس سے سو اونٹنیاں وصول کر لیں: تیس «حِقَّة» (تین سالہ اونٹنیاں)، تیس «جَذَعَة» (چار سالہ اونٹنیاں) اور چالیس حاملہ اونٹنیاں۔ پھر فرمایا: ”مقتول کا بھائی کہاں ہے؟ میں نے رسول اللہ صلی اللہ علیہ وسلم سے یہ ارشاد سنا ہے: ” «لَيْسَ لِلْقَاتِلِ مِيرَاثٌ» ”قاتل کے لیے کوئی میراث نہیں ہے۔“”” [سنن ابن ماجه/كتاب الديات/حدیث: 2646]

حضرت عبداللہ بن عمرو بن عاص رضی اللہ عنہما سے روایت ہے، انہوں نے فرمایا کہ رسول اللہ صلی اللہ علیہ وسلم نے یہ فیصلہ صادر فرمایا: ”عورت کی دیت اس کے عصبہ رشتے دار ادا کریں گے، وہ جو بھی ہوں۔ اور انہیں دیت میں سے ترکے کے طور پر کچھ نہیں ملے گا مگر وہی جو اس کے (اصحاب الفروض) وارثوں سے بچ جائے۔ اور اگر عورت قتل ہو جائے تو اس کی دیت اس کے وارثوں کے درمیان (ترکے کے طور پر) تقسیم ہوگی۔ وہی عورت کے قاتل کو قتل کر سکتے ہیں۔“ [سنن ابن ماجه/كتاب الديات/حدیث: 2647]

حضرت جابر رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم نے دیت، قتل کرنے والی عورت کے عصبہ رشتہ داروں کے ذمے ڈالی۔ مقتول عورت کے عصبہ رشتہ داروں نے کہا: اے اللہ کے رسول صلی اللہ علیہ وسلم ! اس کا ترکہ ہمیں ملے گا؟ آپ صلی اللہ علیہ وسلم نے فرمایا: ”نہیں، اس کا ترکہ اس کے خاوند اور اس کے بچوں کے لیے ہے۔““ [سنن ابن ماجه/كتاب الديات/حدیث: 2648]

حضرت انس بن مالک رضی اللہ عنہ سے روایت ہے کہ حضرت انس رضی اللہ عنہ کی پھوپھی حضرت ربیع بنت نضر رضی اللہ عنہا نے ایک لڑکی کا دانت توڑ دیا۔ انہوں (ربیع کے گھر والوں) نے معاف کر دینے کی درخواست کی، لیکن انہوں نے (فریقِ ثانی نے معاف کرنے سے) انکار کر دیا۔ وہ لوگ (فریقین) نبی صلی اللہ علیہ وسلم کی خدمت میں حاضر ہوئے، آپ صلی اللہ علیہ وسلم نے قصاص کا حکم دے دیا۔ حضرت انس بن نضر رضی اللہ عنہ نے کہا: ”اے اللہ کے رسول صلی اللہ علیہ وسلم ! کیا (میری بہن) ربیع رضی اللہ عنہا کا دانت توڑ دیا جائے گا؟ قسم ہے اس ذات کی جس نے آپ کو سچا دین دے کر بھیجا ہے! اس کا دانت نہیں توڑا جائے گا۔“ نبی صلی اللہ علیہ وسلم نے فرمایا: ”انس! اللہ کا قانون تو قصاص ہی ہے۔“ (راوی نے کہا:) پھر وہ لوگ راضی ہو گئے اور انہوں نے معاف کر دیا۔ تب رسول اللہ صلی اللہ علیہ وسلم نے فرمایا: ”اللہ کا کوئی بندہ ایسا بھی ہوتا ہے جو اللہ پر (اعتماد کرتے ہوئے) قسم کھا لے تو اللہ تعالیٰ اس کی قسم پوری فرما دیتا ہے۔“ [سنن ابن ماجه/كتاب الديات/حدیث: 2649]

حضرت عبداللہ بن عباس رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”سب دانت برابر ہیں، سامنے کا دانت اور ڈاڑھ برابر ہیں۔“ [سنن ابن ماجه/كتاب الديات/حدیث: 2650]

عبداللہ بن عباس رضی اللہ عنہما سے روایت ہے کہ نبی صلی اللہ علیہ وسلم نے ”دانت کے بارے میں پانچ اونٹوں کا فیصلہ فرمایا“۔ [سنن ابن ماجه/كتاب الديات/حدیث: 2651]

حضرت عبداللہ بن عباس رضی اللہ عنہما سے روایت ہے، نبی صلی اللہ علیہ وسلم نے فرمایا: ”یہ اور یہ برابر ہیں۔“ یعنی «الْخِنْصَرُ» (چھوٹی انگلی)، «الْبِنْصِرُ» (چھوٹی کے ساتھ والی انگلی) اور انگوٹھا (سب برابر ہیں)۔ [سنن ابن ماجه/كتاب الديات/حدیث: 2652]