حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”چوپائے کا پہنچایا ہوا زخم «جُبَارٌ» (ہدر/رائیگاں) ہے، اور کان (میں گر کر آنے والا زخم) «جُبَارٌ» ہے اور کنواں «جُبَارٌ» ہے۔“ [سنن ابن ماجه/كتاب الديات/حدیث: 2673]

حضرت عمرو بن عوف مزنی رضی اللہ عنہ سے روایت ہے، انہوں نے کہا: میں نے رسول اللہ صلی اللہ علیہ وسلم سے یہ ارشاد سنا: ”جانور کا پہنچایا ہوا زخم «هَدَرٌ» ”ہدر (رائگاں)“ ہے اور کان «هَدَرٌ» ”ہدر“ ہے۔“ [سنن ابن ماجه/كتاب الديات/حدیث: 2674]

حضرت عبادہ بن صامت رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم نے یہ فیصلہ فرمایا کہ «الْمَعْدِنُ جُبَارٌ» ”کان ہدر (رائیگاں) ہے“، «الْبِئْرُ جُبَارٌ» ”کنواں ہدر ہے“، اور «الْعَجْمَاءُ جُبَارٌ» ”چوپائے کا پہنچایا ہوا زخم ہدر ہے“۔“ امام ابن ماجہ رحمہ اللہ نے فرمایا: ” «الْعَجْمَاءُ» سے مراد مویشی وغیرہ جانور ہیں۔ اور «جُبَارٌ» یعنی ہدر وہ ہوتا ہے جس کا کوئی تاوان (یا دیت وغیرہ) نہ ہو۔“ [سنن ابن ماجه/كتاب الديات/حدیث: 2675]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”آگ «هَدَرٌ» (رائیگاں) ہے اور کنواں «هَدَرٌ» ہے۔“ [سنن ابن ماجه/كتاب الديات/حدیث: 2676]

حضرت سہل بن ابی حثمہ رضی اللہ عنہ اپنے قبیلے کے بزرگوں سے روایت کرتے ہیں کہ حضرت عبداللہ بن سہل اور حضرت محیصہ رضی اللہ عنہما تنگ دستی کی وجہ سے (روزی کی تلاش میں) خیبر گئے۔ (وہاں) کسی نے آکر حضرت محیصہ رضی اللہ عنہ کو بتایا کہ حضرت عبداللہ بن سہل رضی اللہ عنہ کو قتل کر کے خیبر کے ایک کنویں یا چشمے میں پھینک دیا گیا ہے۔ حضرت محیصہ رضی اللہ عنہ نے یہودیوں کے پاس جا کر انہیں کہا: ”قسم ہے اللہ کی! تم ہی نے اسے قتل کیا ہے۔“ انہوں نے کہا: ”قسم ہے اللہ کی! ہم نے اسے قتل نہیں کیا۔“ پھر وہ (خیبر سے) اپنے قبیلے والوں کے پاس گئے اور انہیں صورت حال بتائی، پھر حضرت محیصہ رضی اللہ عنہ اپنے بڑے بھائی حضرت حویصہ رضی اللہ عنہ اور حضرت عبدالرحمن بن سہل رضی اللہ عنہ کے ساتھ (نبی صلی اللہ علیہ وسلم کی خدمت میں) حاضر ہوئے۔ حضرت محیصہ رضی اللہ عنہ نے بات شروع کرنی چاہی کیونکہ (حادثے کے وقت) خیبر میں وہی تھے۔ رسول اللہ صلی اللہ علیہ وسلم نے حضرت محیصہ رضی اللہ عنہ سے فرمایا: «كَبِّرِ الْكُبْرَ» ”بڑے کا لحاظ کرو۔“ یعنی جو عمر میں بڑا ہے (اسے بات کرنے دو)۔ چنانچہ حضرت حویصہ رضی اللہ عنہ نے بات کی، پھر ان کے بعد حضرت محیصہ رضی اللہ عنہ نے بات کی۔ رسول اللہ صلی اللہ علیہ وسلم نے فرمایا: ”یا وہ تمہارے مقتول کی دیت دیں یا جنگ کے لیے تیار ہو جائیں۔“ چنانچہ رسول اللہ صلی اللہ علیہ وسلم نے اس معاملے میں اہل خیبر کے نام لکھا۔ انہوں نے (جواب میں) لکھا: ”قسم ہے اللہ کی! ہم نے اسے قتل نہیں کیا۔“ تب رسول اللہ صلی اللہ علیہ وسلم نے حضرت حویصہ، حضرت محیصہ اور حضرت عبدالرحمن رضی اللہ عنہم سے فرمایا: ”کیا تم قسمیں کھاتے ہو اور اپنے آدمی (مقتول) کا خون بہا (دیت) لینے کے مستحق بنتے ہو؟“ انہوں نے کہا: ”جی نہیں۔“ رسول اللہ صلی اللہ علیہ وسلم نے فرمایا: ”پھر یہودی تمہارے لیے قسمیں کھائیں گے (قسمیں کھا کر خود کو بے گناہ ثابت کر دیں گے)۔“ انہوں نے کہا: ”وہ مسلمان نہیں (ان کے لیے جھوٹی قسمیں کھانا معمولی بات ہے)۔“ چنانچہ رسول اللہ صلی اللہ علیہ وسلم نے اپنے پاس سے حضرت عبداللہ بن سہل رضی اللہ عنہ کی دیت دے دی، اور ان کے پاس سو اونٹنیاں بھیج دیں، اور وہ ان کے گھر پہنچا دی گئیں۔ حضرت سہل رضی اللہ عنہ نے فرمایا: ان میں سے ایک سرخ اونٹنی نے مجھے لات بھی ماری تھی۔ [سنن ابن ماجه/كتاب الديات/حدیث: 2677]

حضرت عبداللہ بن عمرو بن عاص رضی اللہ عنہ سے روایت ہے کہ مسعود کے بیٹے حضرت حویصہ رضی اللہ عنہ اور حضرت محیصہ رضی اللہ عنہ اور سہل کے بیٹے حضرت عبداللہ بن عبدالرحمن رضی اللہ عنہ غلہ لینے خیبر گئے۔ (وہاں) حضرت عبداللہ رضی اللہ عنہ پر حملہ کر کے انہیں قتل کر دیا گیا۔ یہ معاملہ رسول اللہ صلی اللہ علیہ وسلم کی خدمت میں عرض کیا گیا تو رسول اللہ صلی اللہ علیہ وسلم نے فرمایا: ”کیا تم قسمیں کھا کر (دیت کے) مستحق بنتے ہو؟“ انہوں نے کہا: ”اللہ کے رسول صلی اللہ علیہ وسلم ! ہم کیسے قسم کھا سکتے ہیں جبکہ ہم نے دیکھا نہیں؟“ آپ صلی اللہ علیہ وسلم نے فرمایا: ”پھر یہودی (قسمیں کھا کر) تم سے بری ہو جائیں گے۔“ انہوں نے کہا: ”اللہ کے رسول صلی اللہ علیہ وسلم ! تب تو وہ ہمیں قتل کرنا شروع کر دیں گے۔ (وہ جسے چاہیں گے قتل کر کے پچاس جھوٹی قسمیں کھا لیا کریں گے۔)“ تب رسول اللہ صلی اللہ علیہ وسلم نے اپنے پاس (بیت المال) سے اس کی دیت ادا فرما دی۔ [سنن ابن ماجه/كتاب الديات/حدیث: 2678]

حضرت سلمہ بن روح بن زنباع اپنے دادا (زنباع بن روح جذامی رضی اللہ عنہ) سے روایت کرتے ہیں کہ وہ نبی صلی اللہ علیہ وسلم کی خدمت میں حاضر ہوئے، انہوں نے اپنے غلام کو خصی کر دیا تھا۔ نبی صلی اللہ علیہ وسلم نے مثلے کی وجہ سے اس غلام کو آزاد کر دیا۔ [سنن ابن ماجه/كتاب الديات/حدیث: 2679]

حضرت عبداللہ بن عمرو بن عاص رضی اللہ عنہما سے روایت ہے کہ ایک آدمی چیختا چلاتا نبی صلی اللہ علیہ وسلم کی خدمت میں حاضر ہوا۔ رسول اللہ صلی اللہ علیہ وسلم نے فرمایا: ”تجھے کیا ہوا؟“ اس نے کہا: میرے آقا نے مجھے اس کی ایک لونڈی کا بوسہ لیتے دیکھ لیا تو اس نے میرے مردانہ اعضاء کاٹ ڈالے۔ نبی صلی اللہ علیہ وسلم نے فرمایا: ”اس شخص کو میرے پاس لاؤ۔“ اسے تلاش کیا گیا لیکن وہ پکڑا نہ جا سکا تو رسول اللہ صلی اللہ علیہ وسلم نے (غلام سے) فرمایا: ”جا، تو آزاد ہے۔“ اس نے کہا: اے اللہ کے رسول صلی اللہ علیہ وسلم ! میری مدد کون کرے گا؟ راوی نے کہا: اس کا مطلب یہ تھا کہ اگر میرے آقا نے مجھے دوبارہ غلام بنا لیا تو مجھے کون چھڑائے گا؟ رسول اللہ صلی اللہ علیہ وسلم نے فرمایا: ”ہر مومن“ یا فرمایا: ”ہر مسلمان (تیری مدد کرے گا)۔“ [سنن ابن ماجه/كتاب الديات/حدیث: 2680]

حضرت عبداللہ بن مسعود رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”قتل کرنے کے انداز میں بھی سب لوگوں سے زیادہ گناہ سے بچنے والے مومن ہی ہوتے ہیں۔“ [سنن ابن ماجه/كتاب الديات/حدیث: 2681]

حضرت عبداللہ بن مسعود رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”مومن ہی قتل کرنے کے انداز میں بھی سب لوگوں سے زیادہ گناہ سے بچنے والے ہوتے ہیں۔“ [سنن ابن ماجه/كتاب الديات/حدیث: 2682]