حضرت انس رضی اللہ عنہ سے منقول ہے کہ ”رسول اللہ صلی اللہ علیہ وسلم نے ایک ماہ قنوت فرمائی، آپ عرب کے قبائل میں سے ایک قبیلے کے خلاف بددعا کرتے تھے، پھر آپ نے قنوت چھوڑ دی۔“ [سنن نسائي/كتاب التطبيق/حدیث: 1080]

حضرت ابو مالک اشجعی رضی اللہ عنہ نے اپنے والد محترم (طارق بن اشیم) رضی اللہ عنہ سے بیان کیا، انہوں نے کہا: ”میں نے رسول اللہ صلی اللہ علیہ وسلم کے پیچھے نماز پڑھی، آپ نے قنوت نہ فرمائی۔ میں نے ابوبکر رضی اللہ عنہ کے پیچھے نماز پڑھی، انہوں نے بھی قنوت نہ کی۔ میں نے عمر رضی اللہ عنہ کے پیچھے نماز پڑھی، انہوں نے بھی قنوت نہ کی۔ میں نے عثمان رضی اللہ عنہ کے پیچھے نماز پڑھی، انہوں نے بھی قنوت نہ کی۔ میں نے علی رضی اللہ عنہ کے پیچھے نماز پڑھی، آپ نے بھی قنوت نہ کی۔“ پھر فرمایا: ”اے بیٹے! یہ بدعت ہے۔“ [سنن نسائي/كتاب التطبيق/حدیث: 1081]

حضرت جابر بن عبداللہ رضی اللہ عنہ سے روایت ہے، وہ فرماتے ہیں: ”ہم رسول اللہ صلی اللہ علیہ وسلم کے ساتھ ظہر کی نماز پڑھا کرتے تھے تو میں اپنی مٹھی میں کچھ کنکریاں پکڑ لیتا تھا تاکہ انہیں ٹھنڈا کروں، پھر (جب ہاتھ جلنے لگتا تو) انہیں دوسری ہتھیلی میں منتقل کر لیتا تھا، پھر جب میں سجدہ کرتا تو انہیں اپنے ماتھے کے نیچے رکھ لیتا تھا۔“ [سنن نسائي/كتاب التطبيق/حدیث: 1082]

حضرت مطرف رحمہ اللہ سے روایت ہے کہ حضرت عمران بن حصین رضی اللہ عنہ نے اور میں نے حضرت علی بن ابی طالب رضی اللہ عنہ کے پیچھے نماز پڑھی۔ آپ جب سجدہ کرتے تو «اللهُ أَكْبَرُ» ”اللہ اکبر“ کہتے اور جب سجدے سے سر اٹھاتے، تب بھی «اللهُ أَكْبَرُ» ”اللہ اکبر“ کہتے اور جب دو رکعتوں سے اٹھتے، تب بھی «اللهُ أَكْبَرُ» ”اللہ اکبر“ کہتے۔ جب آپ نے نماز پوری کرلی تو حضرت عمران بن حصین رضی اللہ عنہ نے میرا ہاتھ پکڑا اور فرمایا: ”اللہ کی قسم! ان صاحب نے مجھے محمد صلی اللہ علیہ وسلم کی نماز یاد کرا دی ہے۔“ [سنن نسائي/كتاب التطبيق/حدیث: 1083]

حضرت عبداللہ بن مسعود رضی اللہ عنہ سے مروی ہے کہ ”رسول اللہ صلی اللہ علیہ وسلم ہر جھکنے اور اٹھنے کے وقت «اللَّهُ أَكْبَرُ» ”اللہ سب سے بڑا ہے“ کہتے تھے اور آخر میں دائیں بائیں دونوں طرف سلام پھیرتے تھے۔“ حضرت ابوبکر اور حضرت عمر رضی اللہ عنہما بھی ایسے ہی کیا کرتے تھے۔ [سنن نسائي/كتاب التطبيق/حدیث: 1084]

حضرت حکیم رضی اللہ عنہ بیان کرتے ہیں کہ ”میں نے اللہ کے رسول صلی اللہ علیہ وسلم کے ساتھ عہد کیا تھا کہ میں سجدے میں نہیں جاؤں گا مگر سیدھا کھڑا ہو کر۔“ [سنن نسائي/كتاب التطبيق/حدیث: 1085]

حضرت مالک بن حویرث رضی اللہ عنہ سے روایت ہے، انہوں نے نبی صلی اللہ علیہ وسلم کو دیکھا، ”آپ اپنی نماز میں جب رکوع کرتے یا رکوع سے سر اٹھاتے یا سجدے میں جاتے یا سجدے سے سر اٹھاتے تو اپنے دونوں ہاتھ اٹھاتے حتیٰ کہ انہیں کانوں کے کناروں کے برابر کرتے۔“ [سنن نسائي/كتاب التطبيق/حدیث: 1086]

حضرت مالک بن حویرث رضی اللہ عنہ سے روایت ہے کہ انہوں نے نبی صلی اللہ علیہ وسلم کو دیکھا کہ آپ صلی اللہ علیہ وسلم نے اپنے دونوں ہاتھ اٹھائے (رفع الیدین کیا)۔ پھر اسی سابقہ (روایت) کی مثل بیان کی۔ [سنن نسائي/كتاب التطبيق/حدیث: 1087]

حضرت مالک بن حویرث رضی اللہ عنہ سے مروی ہے، انہوں نے نبی صلی اللہ علیہ وسلم کو دیکھا: ”آپ صلی اللہ علیہ وسلم جب نماز شروع فرماتے۔“ پھر اسی (سابقہ حدیث) کی طرح بیان کیا۔ ”اس میں اتنا زیادہ کیا، اور جب رکوع کرتے، تب بھی ایسے ہی کرتے اور جب رکوع سے سر اٹھاتے، پھر بھی ایسے ہی کرتے اور جب سجدے سے سر اٹھاتے، تب بھی ایسے ہی کرتے۔“ [سنن نسائي/كتاب التطبيق/حدیث: 1088]

حضرت عبداللہ بن عمر رضی اللہ عنہما بیان کرتے ہیں کہ ”اللہ کے رسول صلی اللہ علیہ وسلم جب نماز شروع فرماتے، جب رکوع کرتے اور جب رکوع سے اٹھتے تو رفع الیدین کرتے، لیکن سجدے میں (جاتے یا سجدے سے اٹھتے وقت) ایسا نہیں کرتے تھے۔“ [سنن نسائي/كتاب التطبيق/حدیث: 1089]