حضرت ام سلمہ رضی اللہ عنہا فرماتی ہیں کہ رسول اللہ صلی اللہ علیہ وسلم رات کو تیرہ رکعت پڑھتے تھے، پھر جب آپ بوڑھے اور کمزور ہو گئے تو نو پڑھنے لگے۔ عمارہ بن عمیر نے (عمرو بن مرہ کی) مخالفت کی ہے اور یہ روایت عن یحییٰ بن الجزار عن عائشہ رضی اللہ عنہا کی سند سے بیان کی ہے (جبکہ عمرو بن مرہ نے عن عائشہ رضی اللہ عنہا کے بجائے عن ام سلمہ رضی اللہ عنہا کہا تھا)۔ [سنن نسائي/كتاب قيام الليل وتطوع النهار/حدیث: 1709]

حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم رات کو نو رکعت پڑھتے تھے۔ جب آپ بوڑھے اور بوجھل ہو گئے تو سات پڑھنے لگے۔ [سنن نسائي/كتاب قيام الليل وتطوع النهار/حدیث: 1710]

حضرت ابوایوب رضی اللہ عنہ سے روایت ہے، نبی صلی اللہ علیہ وسلم نے فرمایا: ”وتر حق ہے، جو چاہے سات پڑھ لے، جو چاہے پانچ پڑھ لے، جو چاہے تین پڑھ لے اور جو چاہے ایک پڑھ لے۔“ [سنن نسائي/كتاب قيام الليل وتطوع النهار/حدیث: 1711]

حضرت ابو ایوب رضی اللہ عنہ سے مروی ہے، رسول اللہ صلی اللہ علیہ وسلم نے فرمایا: «الْوِتْرُ حَقٌّ» ”وتر حق ہے، جو شخص پانچ پڑھنا چاہے، پانچ پڑھ لے، جو تین پڑھنا چاہے، تین پڑھ لے اور جو ایک پڑھنا چاہے، ایک پڑھ لے۔“ [سنن نسائي/كتاب قيام الليل وتطوع النهار/حدیث: 1712]

حضرت ابو ایوب رضی اللہ عنہ بیان کرتے ہیں کہ ”وتر حق ہے۔ جو شخص پانچ پڑھنا چاہے، پانچ پڑھ لے، جو تین پڑھنا چاہے، تین پڑھ لے اور جو ایک پڑھنا چاہے، ایک پڑھ لے۔“ [سنن نسائي/كتاب قيام الليل وتطوع النهار/حدیث: 1713]

حضرت ابوایوب رضی اللہ عنہ فرماتے ہیں کہ جو شخص چاہے سات وتر پڑھ لے، جو شخص چاہے پانچ وتر پڑھ لے، جو شخص چاہے تین وتر پڑھ لے اور جو شخص چاہے ایک وتر پڑھ لے۔ اور جو شخص چاہے (یعنی مجبور ہو) وہ اشارے سے پڑھ لے۔ [سنن نسائي/كتاب قيام الليل وتطوع النهار/حدیث: 1714]

حضرت ام سلمہ رضی اللہ عنہا سے روایت ہے، فرماتی ہیں: رسول اللہ صلی اللہ علیہ وسلم پانچ یا سات وتر پڑھتے تو درمیان میں نہ سلام پھیرتے تھے اور نہ کلام فرماتے تھے۔ [سنن نسائي/كتاب قيام الليل وتطوع النهار/حدیث: 1715]

حضرت ام سلمہ رضی اللہ عنہا سے منقول ہے، وہ فرماتی ہیں: رسول اللہ صلی اللہ علیہ وسلم سات یا پانچ وتر پڑھتے تو درمیان میں سلام نہیں پھیرتے تھے۔ [سنن نسائي/كتاب قيام الليل وتطوع النهار/حدیث: 1716]

حضرت حکم، حضرت مقسم سے روایت کرتے ہیں، انہوں نے کہا: وتر سات ہیں اور پانچ سے کم تو قطعاً نہیں۔ میں نے یہ بات حضرت ابراہیم نخعی رحمہ اللہ سے ذکر کی تو انہوں نے کہا: مقسم نے یہ بات کس سے نقل کی ہے؟ میں نے کہا: مجھے تو علم نہیں۔ حکم کہتے ہیں: میں حج کے لیے گیا تو مقسم سے ملا اور ان سے پوچھا کہ وہ روایت آپ کس سے بیان کرتے ہیں؟ وہ کہنے لگے: ثقہ اور معتبر اشخاص سے، حضرت عائشہ رضی اللہ عنہا اور حضرت میمونہ رضی اللہ عنہا سے۔ [سنن نسائي/كتاب قيام الليل وتطوع النهار/حدیث: 1717]

حضرت عائشہ رضی اللہ عنہا سے روایت ہے کہ جب رسول اللہ صلی اللہ علیہ وسلم بوڑھے اور فربہ ہو گئے تو آپ سات وتر پڑھتے تھے، آخری کے سوا کسی رکعت میں (تشہد کے لیے) نہ بیٹھتے تھے۔ [سنن نسائي/كتاب قيام الليل وتطوع النهار/حدیث: 1718]