حضرت ابو امیہ ضمری رضی اللہ عنہ سے روایت ہے کہ میں نبی صلی اللہ علیہ وسلم کے پاس آیا اور مذکورہ بالا کی مانند حدیث بیان کی۔ [سنن نسائي/كتاب الصيام/حدیث: 2272]

حضرت ابو امیہ ضمری رضی اللہ عنہ بیان کرتے ہیں کہ میں ایک سفر سے رسول اللہ صلی اللہ علیہ وسلم کے پاس حاضر ہوا۔ آپ صلی اللہ علیہ وسلم نے فرمایا: ”اے ابو امیہ! ٹھہرو، کھانا آ رہا ہے۔“ میں نے عرض کیا: میرا تو روزہ ہے۔ آپ صلی اللہ علیہ وسلم نے فرمایا: ”ادھر آؤ، میں تمہیں بتاؤں کہ اللہ تعالیٰ نے مسافر کو روزہ اور نصف نماز معاف کر دی ہے۔“ [سنن نسائي/كتاب الصيام/حدیث: 2273]

حضرت ابوامیہ ضمری رضی اللہ عنہ نے بتایا کہ میں ایک سفر سے (واپسی پر) رسول اللہ صلی اللہ علیہ وسلم کے پاس حاضر ہوا۔ میں روزے سے تھا۔ رسول اللہ صلی اللہ علیہ وسلم نے مجھ سے فرمایا: ”تم کھانے تک نہیں ٹھہرو گے؟“ میں نے عرض کیا: میں تو روزے سے ہوں۔ رسول اللہ صلی اللہ علیہ وسلم نے فرمایا: ”ادھر آؤ، میں تمہیں بتاؤں کہ اللہ تعالیٰ نے مسافر کو روزہ اور آدھی نماز معاف کر دی ہے۔“ [سنن نسائي/كتاب الصيام/حدیث: 2274]

حضرت ابو امیہ رضی اللہ عنہ نے خبر دی کہ میں سفر سے واپس نبی صلی اللہ علیہ وسلم کے پاس آیا۔ مذکورہ بالا روایت کی مانند۔ [سنن نسائي/كتاب الصيام/حدیث: 2275]

حضرت انس رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”اللہ تعالیٰ نے مسافر کو آدھی نماز اور روزہ معاف کر دیا ہے اور (اسی طرح) حاملہ اور دودھ پلانے والی عورت کو بھی۔“ [سنن نسائي/كتاب الصيام/حدیث: 2276]

حضرت ایوب رحمہ اللہ سے منقول ہے کہ ہمیں بتایا گیا کہ قشیر قبیلے کا ایک بزرگ اپنے صحابی چچا سے حدیث بیان کرتا ہے۔ (ہم گئے تو) ہم نے اس بزرگ کو اس کے اونٹوں میں پایا۔ (میرے ساتھ استاد محترم ابوقلابہ رحمہ اللہ بھی تھے) تو حضرت ابوقلابہ رحمہ اللہ نے اس (بزرگ) سے کہا کہ اسے وہ حدیث بیان کیجیے، تو اس بزرگ نے فرمایا کہ مجھے میرے چچا (حضرت انس بن مالک قشیری رضی اللہ عنہ) نے بیان فرمایا کہ میں اپنے اونٹوں (کے مطالبے) کے سلسلے میں نبی صلی اللہ علیہ وسلم کے پاس پہنچا۔ آپ صلی اللہ علیہ وسلم اس وقت کھانا کھا رہے تھے۔ آپ صلی اللہ علیہ وسلم نے فرمایا: ”آؤ اور کھانا کھاؤ۔“ میں نے عرض کیا: میرا روزہ ہے۔ آپ صلی اللہ علیہ وسلم نے فرمایا: ”اللہ تعالیٰ نے مسافر کو نصف نماز اور روزہ معاف کر دیا ہے، اسی طرح حاملہ اور مرضعہ (بچے کو دودھ پلانے والی) کو بھی۔“ [سنن نسائي/كتاب الصيام/حدیث: 2277]

حضرت ایوب رحمہ اللہ بیان کرتے ہیں کہ مجھے یہ حدیث حضرت ابو قلابہ رحمہ اللہ نے بیان فرمائی، پھر فرمانے لگے: کیا تم اس حدیث کے راوی سے ملنا چاہتے ہو؟ اور مجھے ان کا پتا بتایا۔ میں جا کر انہیں ملا تو انہوں نے فرمایا: مجھ سے میرے ایک رشتے دار، جنہیں حضرت انس بن مالک رضی اللہ عنہ کہا جاتا ہے، نے بیان کیا کہ میں رسول اللہ صلی اللہ علیہ وسلم کے پاس اپنے اونٹوں کے مطالبے کے لیے حاضر ہوا جو (غلط فہمی کی بنا پر) پکڑ لیے گئے تھے۔ میں نے آپ کو کھانا کھاتے پایا۔ آپ صلی اللہ علیہ وسلم نے مجھے کھانے کی دعوت دی۔ میں نے کہا: میرا تو روزہ ہے۔ آپ صلی اللہ علیہ وسلم نے فرمایا: ”ادھر آؤ، میں تمہیں اس بارے میں بتاتا ہوں کہ اللہ تعالیٰ نے مسافر کو روزہ اور نصف نماز معاف کر دی ہے۔“ [سنن نسائي/كتاب الصيام/حدیث: 2278]

حضرت ابو قلابہ رحمہ اللہ ایک صحابی رضی اللہ عنہ سے بیان کرتے ہیں کہ انہوں نے فرمایا: میں نبی صلی اللہ علیہ وسلم کے پاس کسی کام کے سلسلے میں حاضر ہوا۔ آپ صلی اللہ علیہ وسلم صبح کا کھانا کھا رہے تھے۔ آپ صلی اللہ علیہ وسلم نے فرمایا: ”آؤ کھانا کھاؤ۔“ میں نے عرض کیا: میں روزے سے ہوں۔ آپ صلی اللہ علیہ وسلم نے فرمایا: ”ادھر آؤ، میں تمہیں روزے کے بارے میں بتاتا ہوں کہ اللہ تعالیٰ نے مسافر کو نصف نماز اور روزہ معاف کر دیا ہے اور حاملہ اور دودھ پلانے والی عورت کو بھی رخصت دی ہے۔“ [سنن نسائي/كتاب الصيام/حدیث: 2279]

حضرت ابوالعلاء بن شخیر رحمہ اللہ نے بھی ایک شخص سے ایسی ہی روایت بیان کی ہے۔ [سنن نسائي/كتاب الصيام/حدیث: 2280]

بلحریش (بنو الحریش) قبیلے کے ایک شخص نے اپنے والد سے بیان کیا، انہوں نے فرمایا: میں مسافر تھا۔ میں نبی صلی اللہ علیہ وسلم کے پاس آیا۔ میں اس وقت روزے سے تھا اور آپ کھانا کھا رہے تھے۔ آپ نے فرمایا: ”تم بھی آؤ۔“ میں نے عرض کیا: میرا تو روزہ ہے۔ آپ نے فرمایا: ”ادھر آؤ۔ کیا تم نہیں جانتے کہ اللہ تعالیٰ نے مسافر کو معافی دی ہے؟“ میں نے کہا: کس چیز کی؟ فرمایا: ”روزے اور نصف نماز کی۔“ [سنن نسائي/كتاب الصيام/حدیث: 2281]