بلحریش (بنو الحریش) قبیلے کے ایک شخص نے اپنے والد محترم رضی اللہ عنہ سے بیان کیا کہ ہم سفر کیا کرتے تھے جب تک اللہ تعالیٰ چاہتا، ہم رسول اللہ صلی اللہ علیہ وسلم کے پاس آئے تو آپ کھانا کھا رہے تھے، آپ صلی اللہ علیہ وسلم نے فرمایا: ”آؤ کھانا کھاؤ۔“ میں نے کہا: میرا تو روزہ ہے، رسول اللہ صلی اللہ علیہ وسلم نے فرمایا: ”میں تمہیں روزے کے بارے میں بیان کرتا ہوں کہ اللہ تعالیٰ نے مسافر کو روزہ اور آدھی نماز معاف کر دی ہے۔“ [سنن نسائي/كتاب الصيام/حدیث: 2282]

حضرت ہانی بن عبداللہ بن شخیر اپنے والد محترم رضی اللہ عنہ سے بیان کرتے ہیں کہ انہوں نے فرمایا: میں مسافر تھا، نبی کریم صلی اللہ علیہ وسلم کے پاس آیا، آپ صلی اللہ علیہ وسلم اس وقت کھانا کھا رہے تھے اور میرا روزہ تھا، آپ صلی اللہ علیہ وسلم نے فرمایا: ”آؤ۔“ میں نے کہا: میرا تو روزہ ہے، آپ صلی اللہ علیہ وسلم نے فرمایا: ”کیا تم جانتے ہو کہ اللہ تعالیٰ نے مسافر کو کیا معاف کیا ہے؟“ میں نے کہا: اللہ تعالیٰ نے مسافر کو کیا معاف کیا ہے؟ آپ صلی اللہ علیہ وسلم نے فرمایا: ”روزہ اور نصف نماز۔“ [سنن نسائي/كتاب الصيام/حدیث: 2283]

حضرت غیلان رحمہ اللہ بیان کرتے ہیں کہ میں حضرت ابوقلابہ رحمہ اللہ کے ساتھ ایک سفر میں گیا۔ انہوں نے کھانا میرے قریب کیا۔ میں نے کہا: میرا تو روزہ ہے۔ وہ کہنے لگے کہ رسول اللہ صلی اللہ علیہ وسلم (ایک دفعہ) سفر میں نکلے۔ آپ صلی اللہ علیہ وسلم نے کھانا قریب کیا اور ایک آدمی سے فرمایا: ”آؤ! کھانا کھاؤ۔“ اس نے کہا: میں تو روزے سے ہوں۔ آپ صلی اللہ علیہ وسلم نے فرمایا: ”اللہ تعالیٰ نے مسافر کو نصف نماز اور روزہ سفر میں معاف کر دیا ہے، لہٰذا تم قریب آؤ اور کھاؤ۔“ (غیلان نے کہا:) (یہ حدیث سن کر) میں قریب ہوا اور میں نے کھانا کھایا۔ [سنن نسائي/كتاب الصيام/حدیث: 2284]

حضرت انس بن مالک رضی اللہ عنہ بیان کرتے ہیں کہ ہم رسول اللہ صلی اللہ علیہ وسلم کے ساتھ سفر میں تھے، کسی نے روزہ رکھا ہوا تھا اور کسی نے نہیں رکھا تھا، یہ سخت گرم دن تھے، ہم اترے اور سایہ حاصل کیا، روزہ دار تو لیٹ گئے لیکن روزہ نہ رکھنے والے اٹھے اور انہوں نے ہماری سواریوں کے جانوروں کو پانی پلایا، رسول اللہ صلی اللہ علیہ وسلم نے فرمایا: ”آج تو روزہ نہ رکھنے والے ثواب لے گئے۔“ [سنن نسائي/كتاب الصيام/حدیث: 2285]

حضرت عبدالرحمن بن عوف رضی اللہ عنہ فرماتے ہیں: کہا جاتا ہے کہ ”سفر میں روزہ رکھنا گھر میں رہ کر روزہ نہ رکھنے کے برابر ہے۔“ [سنن نسائي/كتاب الصيام/حدیث: 2286]

حضرت عبدالرحمن بن عوف رضی اللہ عنہ نے فرمایا: ”سفر میں روزہ رکھنے والا گھر رہ کر روزہ نہ رکھنے والے کی طرح ہے۔“ [سنن نسائي/كتاب الصيام/حدیث: 2287]

حضرت عبدالرحمن بن عوف رضی اللہ عنہ بیان کرتے ہیں کہ ”سفر میں روزہ رکھنے والا گھر رہ کر روزہ نہ رکھنے والے کی طرح ہے۔“ [سنن نسائي/كتاب الصيام/حدیث: 2288]

حضرت ابن عباس رضی اللہ عنہما سے منقول ہے کہ نبی صلی اللہ علیہ وسلم رمضان المبارک میں (فتح مکہ کے لیے) نکلے۔ آپ صلی اللہ علیہ وسلم روزے رکھتے رہے حتیٰ کہ «قُدَيْد» مقام پر آئے تو آپ صلی اللہ علیہ وسلم کے پاس دودھ کا پیالہ لایا گیا۔ آپ صلی اللہ علیہ وسلم نے اسے پیا اور صحابہ سمیت روزہ کھول لیا۔ [سنن نسائي/كتاب الصيام/حدیث: 2289]

حضرت عبداللہ بن عباس رضی اللہ عنہما نے فرمایا: رسول اللہ صلی اللہ علیہ وسلم مدینہ منورہ سے چلے تو روزے رکھتے رہے حتیٰ کہ قدید کے مقام پر آگئے، پھر آپ صلی اللہ علیہ وسلم نے روزے رکھنے بند کر دیے حتیٰ کہ مکہ مکرمہ آگئے۔ [سنن نسائي/كتاب الصيام/حدیث: 2290]

حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم (فتح مکہ کے) سفر میں روزے رکھتے رہے، حتیٰ کہ جب مقامِ قدید پر آئے تو آپ صلی اللہ علیہ وسلم نے دودھ کا پیالہ منگوایا اور اسے نوش فرمایا، اس طرح آپ صلی اللہ علیہ وسلم نے اور آپ کے صحابہ نے روزہ افطار کر لیا۔ [سنن نسائي/كتاب الصيام/حدیث: 2291]