حضرت عائشہ رضی اللہ عنہا نے فرمایا: ”کدو کے برتن میں ذاتی طور پر نبیذ بنانے سے روکا گیا ہے۔“ [سنن نسائي/كتاب الأشربة/حدیث: 5642]

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ”کھجور کی جڑ کے برتن، تارکول لگے برتن، کدو برتن اور روغنی مٹکے میں نبیذ بنانے سے منع فرمایا۔“ یہ ابن علیہ کی روایت میں ہے۔ اسحاق نے کہا کہ ہنیدہ نے حضرت عائشہ رضی اللہ عنہا سے معاذہ کی حدیث کے مثل بیان کیا ہے اور (مطلقاً) مٹکوں کا ذکر کیا۔ میں نے ہنیدہ سے کہا: تم نے ان (حضرت عائشہ رضی اللہ عنہا) سے سنا، انہوں نے مٹکوں (مٹی کے گھڑوں) کا نام لیا تھا؟ اس (ہنیدہ) نے کہا: ہاں۔ [سنن نسائي/كتاب الأشربة/حدیث: 5643]

حضرت ہنیدہ بنت شریک بن ابان رضی اللہ عنہا سے منقول ہے کہ میں حضرت عائشہ رضی اللہ عنہا کو خریبہ میں ملی۔ میں نے ان سے شراب کی باقی ماندہ میل کچیل (تل چھٹ) کے بارے میں پوچھا تو انہوں نے مجھے اس سے بھی منع کیا، نیز فرمایا: شام کو نبیذ بناؤ تو صبح کو پی لیا کرو اور رات کو اس کا منہ باندھ کر رکھا کرو۔ اور انہوں نے مجھے کدو کے برتن، کھجور کی جڑ کے برتن، تارکول لگے برتن اور روغنی مٹکے سے بھی منع فرمایا۔ [سنن نسائي/كتاب الأشربة/حدیث: 5644]

حضرت انس رضی اللہ عنہ سے روایت ہے کہ رسول اللہ صلی اللہ علیہ وسلم نے ”تارکول لگے ہوئے برتنوں (میں نبیذ بنانے)“ سے منع فرمایا ہے۔ [سنن نسائي/كتاب الأشربة/حدیث: 5645]

حضرت سعید بن جبیر رضی اللہ عنہ سے روایت ہے کہ انہوں نے حضرت ابن عمر اور حضرت ابن عباس رضی اللہ عنہما سے سنا، ان دونوں نے رسول اللہ صلی اللہ علیہ وسلم پر گواہی دی کہ آپ صلی اللہ علیہ وسلم نے ”کدو کے برتن، روغنی مٹکے، کھجور کی جڑ کے برتن اور تارکول لگے ہوئے برتن“ سے منع فرمایا۔ پھر رسول اللہ صلی اللہ علیہ وسلم نے یہ آیت پڑھی: ﴿وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانْتَهُوا﴾ [سورة الحشر: 7] ”رسول اللہ جو کچھ تمہیں دیں، وہ لے لو اور جس چیز سے تمہیں روکیں، اس سے رک جاؤ۔“ [سنن نسائي/كتاب الأشربة/حدیث: 5646]

حضرت اسماء بنت یزید رضی اللہ عنہا سے روایت ہے کہ ان کے چچا زاد بھائی حضرت انس رضی اللہ عنہ سے منقول ہے کہ حضرت ابن عباس رضی اللہ عنہما نے کہا: کیا اللہ تعالیٰ نے (قرآن مجید میں) یہ نہیں فرمایا: ﴿وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانْتَهُوا﴾ [سورة الحشر: 7] ”اور جو کچھ تمہیں اللہ کا رسول دے، وہ لے لو اور جس چیز سے روک دے، اس سے رک جاؤ۔“ میں نے کہا: کیوں نہیں (بلکہ فرمایا ہے)۔ پھر انہوں نے کہا: کیا اللہ تعالیٰ نے یہ نہیں فرمایا: ﴿وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَنْ يَكُونَ لَهُمُ الْخِيَرَةُ مِنْ أَمْرِهِمْ﴾ [سورة الأحزاب: 36] ”کسی مومن مرد یا مومنہ عورت کو لائق نہیں کہ جب اللہ تعالیٰ اور اس کا رسول فیصلہ فرما دیں تو وہ اپنا اختیار استعمال کرے؟“ میں گواہی دیتا ہوں کہ اللہ کے نبی صلی اللہ علیہ وسلم نے ”کھجور کی جڑ کے برتن، تارکول لگے برتن، کدو کے برتن اور روغنی مٹکے“ سے منع فرمایا ہے۔ [سنن نسائي/كتاب الأشربة/حدیث: 5647]

حضرت زاذان سے روایت ہے کہ میں نے حضرت عبداللہ بن عمر رضی اللہ عنہما سے گزارش کی کہ مجھے کوئی ایسی چیز بیان فرمائیں جو آپ نے رسول اللہ صلی اللہ علیہ وسلم سے ان برتنوں کے بارے میں سنی ہو، اس کی وضاحت بھی فرمائیے۔ انہوں نے کہا: رسول اللہ صلی اللہ علیہ وسلم نے ” «الْحَنْتَمِ» ”حنتم“ سے منع فرمایا“ اور اسے تم مٹکا کہتے ہو۔ اور ” «الدُّبَّاءِ» ”دباء“ سے منع فرمایا“، جسے تم کدو کا برتن کہتے ہو۔ اور ” «النَّقِيرِ» ”نقیر“ سے منع فرمایا“۔ یہ کھجور کی جڑ ہوتی ہے جسے لوگ اندر سے کرید کرید کر برتن بنا لیتے ہیں، نیز آپ نے ” «الْمُزَفَّتِ» ”مزفت“ سے منع فرمایا“ اور یہ وہ برتن ہوتا ہے جسے تارکول یا لاکھ مل دی گئی ہو۔ [سنن نسائي/كتاب الأشربة/حدیث: 5648]

حضرت ابو ہریرہ رضی اللہ عنہ سے روایت ہے کہ جب قبیلہ عبد القیس کا وفد رسول اللہ صلی اللہ علیہ وسلم کی خدمت میں حاضر ہوا تو آپ نے ان کو کدو کے برتن، کھجور کی جڑ کے برتن، تارکول لگے برتن اور کٹے ہوئے منہ والے مشکیزے میں نبیذ بنانے سے روک دیا اور فرمایا: ”اپنے (معروف) مشکیزے میں نبیذ بناؤ اور اس کا منہ باندھ کر رکھو اور اسے میٹھی میٹھی پیو۔“ ایک شخص نے کہا: اے اللہ کے رسول صلی اللہ علیہ وسلم ! مجھے اس جیسی (متغیر) نبیذ پینے کی بھی اجازت دے دیجیے۔ آپ نے فرمایا: ”پھر تو تو اسے ایسی (نشے والی) بنا لے گا۔“ آپ نے اسے بیان کرنے کے لیے ہاتھ سے اشارہ بھی فرمایا۔ [سنن نسائي/كتاب الأشربة/حدیث: 5649]

حضرت جابر رضی اللہ عنہ نے فرمایا کہ رسول اللہ صلی اللہ علیہ وسلم نے ”تارکول لگے ہوئے مٹکے، کدو کے برتن اور کھجور کی جڑ کے برتن (میں نبیذ بنانے)“ سے منع فرمایا ہے، اور جب رسول اللہ صلی اللہ علیہ وسلم کو نبیذ بنانے کے لیے مشکیزہ نہ ملتا تو پتھر کے کونڈے میں آپ کے لیے نبیذ بنائی جاتی تھی۔ [سنن نسائي/كتاب الأشربة/حدیث: 5650]

حضرت جابر رضی اللہ عنہ سے روایت ہے، انہوں نے فرمایا کہ رسول اللہ صلی اللہ علیہ وسلم کے لیے چمڑے کے مشکیزے میں نبیذ بنائی جاتی تھی اور جب مشکیزہ میسر نہ ہوتا تو پتھر کے کونڈے میں آپ کے لیے نبیذ بنائی جاتی، اور رسول اللہ صلی اللہ علیہ وسلم نے کدو کے برتن، کھجور کی جڑ کے برتن اور تارکول لگے ہوئے مٹکے سے منع فرمایا ہے۔ [سنن نسائي/كتاب الأشربة/حدیث: 5651]