حضرت ابو ہریرہ رضی اللہ عنہ سے روایت ہے، انہوں نے کہا کہ جب لوگوں میں شارعِ عام کے متعلق باہمی اختلاف ہوا تھا تو نبی صلی اللہ علیہ وسلم نے ”سات ہاتھ راستہ چھوڑنے“ کا فیصلہ صادر فرمایا۔ [صحيح البخاري/کتاب المظالم والغصب/حدیث: 2473]

حضرت عبد اللہ بن یزید انصاری رضی اللہ عنہ سے روایت ہے اور وہ ان (عدی بن ثابت) کے نانا تھے، انہوں نے کہا کہ نبی صلی اللہ علیہ وسلم نے ”لوٹ مار کرنے اور مثلہ کرنے سے منع فرمایا ہے“۔ [صحيح البخاري/کتاب المظالم والغصب/حدیث: 2474]

حضرت ابو ہریرہ رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”زنا کرنے والا جس وقت زنا کرتا ہے وہ مومن نہیں ہوتا، شراب پینے والا جب شراب نوشی کرتا ہے تو ایماندار نہیں رہتا اور جو چور جس وقت چوری کرتا ہے اس وقت مومن نہیں ہوتا اور لوٹنے والا جب کوئی ایسی چیز لوٹتا ہے جس کی طرف لوگ آنکھ کو اٹھا کر دیکھتے ہیں تو اس وقت وہ مومن نہیں ہوتا۔“ سعید اور ابو سلمہ نے بھی حضرت ابو ہریرہ رضی اللہ عنہ سے، انہوں نے نبی صلی اللہ علیہ وسلم سے ایسی ہی روایت بیان کی ہے لیکن اس میں لوٹ مار کا ذکر نہیں، فربری رحمہ اللہ کہتے ہیں کہ میں نے ابو جعفر کے خط کی عبارت بایں الفاظ پائی ہے کہ ابو عبد اللہ (امام بخاری رحمہ اللہ) فرماتے ہیں کہ ایسے انسان سے نورِ ایمان سلب کر لیا جاتا ہے۔ [صحيح البخاري/کتاب المظالم والغصب/حدیث: 2475]

حضرت ابوہریرہ رضی اللہ عنہ سے روایت ہے، وہ رسول اللہ صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”قیامت اس وقت تک قائم نہیں ہو گی حتی کہ تم میں ابن مریم ایک منصف حاکم بن کر نمودار ہو جائیں۔ وہ صلیب کو توڑیں گے اور خنزیر کو قتل کریں گے، نیز جزیہ ختم کر دیں گے۔ اس وقت مال کی بہتات ہو گی یہاں تک کہ اسے کوئی قبول کرنے والا نہیں ہو گا۔“ [صحيح البخاري/کتاب المظالم والغصب/حدیث: 2476]

حضرت سلمہ بن اکوع رضی اللہ عنہ سے روایت ہے کہ نبی صلی اللہ علیہ وسلم نے خیبر کے دن جلتی ہوئی آگ دیکھی تو فرمایا: ”یہ آگ کس چیز پر جلائی گئی ہے؟“ لوگوں نے عرض کیا: گھریلو گدھوں کا گوشت پکایا جا رہا ہے۔ آپ صلی اللہ علیہ وسلم نے فرمایا: ”ہنڈیوں کو توڑ دو اور گوشت کو پھینک دو۔“ لوگوں نے عرض کیا: ہم گوشت تو پھینک دیتے ہیں لیکن ہنڈیوں کو دھو نہ لیں؟ آپ صلی اللہ علیہ وسلم نے فرمایا: ”دھو لو۔“ ابو عبداللہ (امام بخاری رحمہ اللہ) بیان کرتے ہیں کہ ابن ابی اویس کے کہنے کے مطابق «الْأَنَسِيَّةِ» کا الف اور نون مفتوح ہے۔ [صحيح البخاري/کتاب المظالم والغصب/حدیث: 2477]

حضرت عبداللہ بن مسعود رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم جب مکہ میں داخل ہوئے تو کعبہ کے گرد تین سو ساٹھ بت نصب تھے۔ آپ صلی اللہ علیہ وسلم انہیں اپنے ہاتھ کی چھڑی سے کچوکے دیتے اور فرماتے تھے: ” ﴿جَاءَ الْحَقُّ وَزَهَقَ الْبَاطِلُ﴾ [سورة الإسراء: 81] حق آگیا اور باطل مٹ گیا۔۔۔۔“ [صحيح البخاري/کتاب المظالم والغصب/حدیث: 2478]

حضرت عائشہ رضی اللہ عنہا سے روایت ہے، انہوں نے اپنے حجرے کے دروازے پر ایک کپڑا لٹکایا جس پر تصاویر بنی ہوئی تھیں۔ نبی صلی اللہ علیہ وسلم نے اسے پھاڑ ڈالا تو حضرت عائشہ رضی اللہ عنہا نے اس کپڑے کے دو گاؤ تکیے بنا لیے جو گھر میں رہے۔ ان پر آپ صلی اللہ علیہ وسلم بیٹھا کرتے تھے۔ [صحيح البخاري/کتاب المظالم والغصب/حدیث: 2479]

حضرت عبداللہ بن عمرو رضی اللہ عنہما سے روایت ہے، انہوں نے کہا: میں نے نبی صلی اللہ علیہ وسلم کو یہ فرماتے ہوئے سنا: ”جو شخص اپنے مال کی حفاظت کرتے ہوئے مارا جائے وہ شہید ہے۔“ [صحيح البخاري/کتاب المظالم والغصب/حدیث: 2480]