سیدہ عائشہ رضی اللہ عنہا کہتی ہیں: رسول اللہ صلی اللہ علیہ وسلم کھڑے ہو کر نفلی نماز پڑ ھ رہے تھے، قبلہ کی سمت میں (یعنی آپ صلی اللہ علیہ وسلم کے سامنے) دروازہ تھا، جو بند تھا۔ جب میں نے درواز کھولنے کی فرمائش کی تو آپ صلی اللہ علیہ وسلم اپنی دائیں یا بائیں جانب سے (سامنے کو) چلے، دروازہ کھولا اور اپنی جگہ پر واپس آ گئے۔ [سلسله احاديث صحيحه/الاذان و الصلاة/حدیث: 790]

رسول اللہ صلی اللہ علیہ وسلم کی بیوی سیدہ میمونہ رضی اللہ عنہا کہتی ہیں کہ آپ صلی اللہ علیہ وسلم رات کو اپنی چٹائی پر نماز پڑھتے اور میں آپ صلی اللہ علیہ وسلم کے ساتھ ہی آپ صلی اللہ علیہ وسلم کی سجدہ گاہ کے برابر لیٹی ہوتی، جب آپ صلی اللہ علیہ وسلم سجدہ کرتے تو آپ کے کپڑے کا کنارہ مجھے لگتا، جبکہ میں حائضہ ہوتی۔ [سلسله احاديث صحيحه/الاذان و الصلاة/حدیث: 791]

سیدنا عبداللہ رضی اللہ عنہ کہتے ہیں: رسول اللہ صلی اللہ علیہ وسلم سجدے کی حالت میں سو جاتے، سانس لینے کی آواز سے آپ صلی اللہ علیہ وسلم کی نیند کا پتہ چل جاتا تھا، پھر آپ صلی اللہ علیہ وسلم کھڑے ہوتے اور اپنی نماز کو جاری رکھتے۔ [سلسله احاديث صحيحه/الاذان و الصلاة/حدیث: 792]

سیدہ عائشہ رضی اللہ عنہا سے روایت ہے کہ وہ آپ صلی اللہ علیہ وسلم کے کپڑے سے منی کھرچ لیتی تھیں، اس حال میں کہ آپ صلی اللہ علیہ وسلم نماز پڑھ رہے ہوتے تھے۔ [سلسله احاديث صحيحه/الاذان و الصلاة/حدیث: 793]

سیدنا عبداللہ رضی اللہ عنہ بیان کرتے ہیں کہ نبی کریم صلی اللہ علیہ وسلم سے لیلتہ القدر کے بارے میں سوال کیا گیا؟ آپ صلی اللہ علیہ وسلم نے فرمایا: ”مجھے اس کی علامتیں بتائی گئی تھیں، لیکن پھر چھین لی گئیں۔ تم اسے (اختتام رمضان سے) سات یا تین دن پہلے (یعنی ۲۳ یا ۲۷ رمضان کو) تلاش کرو۔“ [سلسله احاديث صحيحه/الاذان و الصلاة/حدیث: 794]

سیدنا جابر بن عبداللہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”تم میں سے کسی کا نماز میں ہاتھ کو کنکریوں سے روکے رکھنا، سیاہ آنکھ والی سو اونٹنیوں سے بہتر ہے، اگر شیطان غالب آ ہی جائے تو ایک دفعہ (ہاتھ پھیر کر) صاف کر لے۔ [سلسله احاديث صحيحه/الاذان و الصلاة/حدیث: 795]

سیدنا عبداللہ بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ”آدمی کو چاہئے کہ قریبی مسجد میں نماز پڑھ لیا کرے اور مساجد کی تلاش میں نہ پھرے۔“ [سلسله احاديث صحيحه/الاذان و الصلاة/حدیث: 796]

ابوامامہ بن سہل بن حنیف اپنے باپ سے روایت کرتے ہیں کہ رسول اللہ صلی اللہ علیہ وسلم نے فرمایا: ”جو آدمی (گھر سے) نکلے اور اس (مسجد قبا) میں آ کر نماز پڑھے، تو یہ نماز اس کے لیے (ثواب کے لحاظ سے) عمرہ کے برابر ہو گی۔“ [سلسله احاديث صحيحه/الاذان و الصلاة/حدیث: 797]

سیدنا انس بن مالک رضی اللہ عنہ کہتے ہیں: یہ سنت ہے کہ جب تو مسجد میں داخل ہو تو دائیں پاؤں سے اور جب نکلے تو بائیں پاؤں ابتدا کرے۔ [سلسله احاديث صحيحه/الاذان و الصلاة/حدیث: 798]

سیدنا عائذ بن قرط رضی اللہ عنہ سے مروہ ہے کہ نبی کریم صلی اللہ علیہ وسلم نے فرمایا: ”جس نے (فرضی) نماز پڑھی اور اس کی تکمیل نہیں کی تو اس کی نفلی نماز کے ذریعے اس (کمی) کو پورا کر دیا جائے گا۔“ [سلسله احاديث صحيحه/الاذان و الصلاة/حدیث: 799]