حضرت عبداللہ بن عباس رضی اللہ عنہما سے روایت ہے، انہوں نے کہا کہ نبی صلی اللہ علیہ وسلم نے فرمایا: ”ہبہ کر کے اسے واپس لینے والا ایسا ہے جیسے کوئی قے کر کے اسے چاٹ لے۔“ [صحيح البخاري/كتاب الهبة/حدیث: 2621]

حضرت ابن عباس رضی اللہ عنہما ہی سے روایت ہے، انہوں نے کہا: نبی صلی اللہ علیہ وسلم نے فرمایا: ”ہمارے لیے یہ بری مثال نہیں ہونی چاہیے کہ جو کوئی ہبہ کر کے اسے واپس لے وہ اس کتے کی طرح ہے جو قے کر کے اسے چاٹ لیتا ہے۔“ [صحيح البخاري/كتاب الهبة/حدیث: 2622]

حضرت عمر بن خطاب رضی اللہ عنہ سے روایت ہے، انہوں نے فرمایا: میں نے فی سبیل اللہ ایک شخص کو سواری کے لیے گھوڑا دیا تو جس کے پاس وہ گھوڑا تھا اس نے (اس کی حفاظت نہ کی بلکہ) اسے خراب کر ڈالا۔ میں نے ارادہ کیا کہ اس سے وہ گھوڑا خرید لوں اور گمان یہ تھا کہ وہ مجھے سستے داموں فروخت کر دے گا۔ میں نے نبی صلی اللہ علیہ وسلم سے اس کے متعلق دریافت کیا تو آپ صلی اللہ علیہ وسلم نے فرمایا: ”اسے مت خریدو، اگرچہ وہ تمہیں ایک درہم کے عوض دے کیونکہ صدقے کو واپس لینے والا اس کتے کی طرح ہے جو قے کر کے اس کو چاٹ جاتا ہے۔“ [صحيح البخاري/كتاب الهبة/حدیث: 2623]

عبد اللہ بن عبید اللہ بن ابی ملیکہ سے روایت ہے کہ حضرت صہیب رضی اللہ عنہ جو ابن جدعان کے آزاد کردہ غلام تھے، ان کے دو بیٹوں نے دو مکان اور ایک حجرے کے متعلق دعویٰ کیا کہ رسول اللہ صلی اللہ علیہ وسلم نے وہ صہیب رضی اللہ عنہ کو دیے تھے۔ مروان نے کہا: تم دونوں کی اس معاملے میں کون گواہی دے گا؟ انہوں نے کہا: ابن عمر رضی اللہ عنہما۔ مروان نے ان کو بلایا تو انہوں نے گواہی دی کہ رسول اللہ صلی اللہ علیہ وسلم نے یہ دو مکان اور ایک حجرہ حضرت صہیب رضی اللہ عنہ کو دیے تھے، چنانچہ مروان نے حضرت عبد اللہ بن عمر رضی اللہ عنہما کی گواہی پر ان کے حق میں فیصلہ کر دیا۔ [صحيح البخاري/كتاب الهبة/حدیث: 2624]

حضرت جابر رضی اللہ عنہ سے روایت ہے، انہوں نے کہا: نبی صلی اللہ علیہ وسلم نے عُمریٰ کے بارے میں یہ فیصلہ کیا کہ ”وہ اسی کا ہے جس کو ہبہ کیا گیا ہے۔“ [صحيح البخاري/كتاب الهبة/حدیث: 2625]

حضرت ابوہریرہ رضی اللہ عنہ سے روایت ہے، وہ نبی صلی اللہ علیہ وسلم سے بیان کرتے ہیں کہ آپ نے فرمایا: ”عمریٰ جائز ہے، یعنی نافذ ہو جائے گا۔“ حضرت عطاء رحمہ اللہ بیان کرتے ہیں کہ مجھ سے حضرت جابر رضی اللہ عنہ نے نبی صلی اللہ علیہ وسلم سے اسی طرح بیان کیا ہے۔ [صحيح البخاري/كتاب الهبة/حدیث: 2626]

حضرت انس رضی اللہ عنہ سے روایت ہے، انہوں نے کہا: ایک دفعہ مدینہ طیبہ میں دشمن کا خوف سا پیدا ہوا تو نبی صلی اللہ علیہ وسلم نے حضرت ابو طلحہ رضی اللہ عنہ سے ایک گھوڑا مستعار لیا جسے مندوب کہا جاتا تھا۔ آپ اس پر سوار ہوئے۔ جب واپس تشریف لائے تو فرمایا: ”کوئی گڑبڑ نہیں ہے، یہ گھوڑا تو سمندر کی موج ہے۔“ [صحيح البخاري/كتاب الهبة/حدیث: 2627]

عبدالواحد بن ایمن سے روایت ہے، انہوں نے کہا: میرے والد (حضرت ایمن رضی اللہ عنہ) بیان کرتے ہیں کہ میں صدیقہ کائنات حضرت عائشہ رضی اللہ عنہا کے ہاں گیا تو انہوں نے روئی کا موٹا کرتا پہن رکھا تھا جس کی قیمت پانچ درہم تھی۔ حضرت عائشہ رضی اللہ عنہا نے فرمایا: میری اس لونڈی کی طرف ذرا آنکھ اٹھا کر دیکھو یہ گھر میں اس قسم کا لباس پہننے سے نفرت کرتی ہے، حالانکہ رسول اللہ صلی اللہ علیہ وسلم کے عہد مبارک میں میرے پاس اسی طرح کا ایک کرتا تھا۔ مدینہ طیبہ میں جب بھی کسی عورت کو آراستہ کرنا ہوتا تو وہ مجھے پیغام بھیج کر منگوا لیتی تھیں۔ [صحيح البخاري/كتاب الهبة/حدیث: 2628]

حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”عطیے کے اعتبار سے بہترین عطیہ کثرت سے دودھ دینے والی اونٹنی اور کثرت سے دودھ دینے والی بکری کا ہے جو صبح کو برتن بھر کر دودھ دے اور شام کو بھی برتن بھر کر دودھ دے۔“ دوسری روایت میں ”بہترین عطیہ“ کے بجائے ”بہترین صدقہ“ کے الفاظ ہیں۔ [صحيح البخاري/كتاب الهبة/حدیث: 2629]