حضرت عبداللہ بن مسعود رضی اللہ عنہ سے روایت ہے، انہوں نے فرمایا: ”میں ان جڑواں سورتوں کو جانتا ہوں جنہیں نبی کریم صلی اللہ علیہ وسلم ہر رکعت میں دو دو پڑھتے تھے۔“ اس کے بعد حضرت عبداللہ بن مسعود رضی اللہ عنہ مجلس سے اٹھ گئے، ان کے ساتھ حضرت علقمہ رحمہ اللہ بھی گھر میں داخل ہوئے۔ پھر جب وہ باہر آئے تو ہم نے ان سے پوچھا: ”وہ کون سی سورتیں ہیں؟“ انہوں نے بتایا کہ ”وہ حضرت عبداللہ بن مسعود رضی اللہ عنہ کی ترتیب کے مطابق آغازِ مفصل کی بیس سورتیں ہیں جن کی آخری سورتیں «حمٓ» ”حم“ والی ہیں۔ «حمٓ الدُّخَان» ”حم الدخان“ اور «عَمَّ يَتَسَاءَلُونَ» ”عم یتساءلون“ بھی انہی میں سے ہیں۔“ [صحيح البخاري/كتاب فضائل القرآن/حدیث: 4996]

حضرت ابن عباس رضی اللہ عنہ سے روایت ہے، انہوں نے کہا: ”نبی صلی اللہ علیہ وسلم صدقہ و خیرات کرنے میں تمام لوگوں سے زیادہ سخی تھے اور ماہِ رمضان میں حضرت جبریل علیہ السلام آپ صلی اللہ علیہ وسلم سے ہر رات ملاقات کرتے تھے تا آنکہ ماہِ رمضان ختم ہو جاتا، وہ ان راتوں میں رسول اللہ صلی اللہ علیہ وسلم کے ساتھ قرآن مجید کا دور کرتے تھے، جب جبریل علیہ السلام آپ صلی اللہ علیہ وسلم سے ملتے تو اس وقت آپ صلی اللہ علیہ وسلم تیز ہوا سے بھی بڑھ کر سخی ہو جاتے تھے۔“ [صحيح البخاري/كتاب فضائل القرآن/حدیث: 4997]

حضرت ابو ہریرہ رضی اللہ عنہ سے روایت ہے، انہوں نے فرمایا: ”وہ (حضرت جبریل علیہ السلام) ہر سال ایک مرتبہ نبی صلی اللہ علیہ وسلم سے قرآن مجید کا دور کیا کرتے تھے، لیکن جس سال آپ کی وفات ہوئی، اس میں انہوں نے آپ صلی اللہ علیہ وسلم سے دو مرتبہ دور کیا، نیز آپ صلی اللہ علیہ وسلم ہر سال دس دن اعتکاف کیا کرتے تھے، لیکن جس سال آپ کی وفات ہوئی، اس سال آپ نے بیس دن اعتکاف فرمایا۔“ [صحيح البخاري/كتاب فضائل القرآن/حدیث: 4998]

حضرت مسروق رحمہ اللہ سے روایت ہے کہ حضرت عبداللہ بن عمرو رضی اللہ عنہما نے حضرت عبداللہ بن مسعود رضی اللہ عنہ کا ذکر کرتے ہوئے کہا: ”اس وقت سے ان کی محبت میرے دل میں گھر کر گئی ہے جب سے میں نے نبی صلی اللہ علیہ وسلم کو یہ فرماتے ہوئے سنا: ”قرآن مجید چار حضرات سے حاصل کرو: عبداللہ بن مسعود، سالم، معاذ اور ابی بن کعب رضی اللہ عنہم سے۔“” [صحيح البخاري/كتاب فضائل القرآن/حدیث: 4999]

حضرت شقیق بن سلمہ سے روایت ہے، انہوں نے کہا کہ ایک مرتبہ حضرت عبداللہ بن مسعود رضی اللہ عنہ نے ہمیں خطبہ دیتے ہوئے فرمایا: ”اللہ کی قسم! میں نے ستر سے زیادہ سورتیں خود رسول اللہ صلی اللہ علیہ وسلم کی زبان مبارک سے سن کر یاد کی ہیں۔ اللہ کی قسم! رسول اللہ صلی اللہ علیہ وسلم کے صحابہ کرام رضی اللہ عنہم کو یہ بات اچھی طرح معلوم ہے کہ میں ان سب سے زیادہ قرآن کریم کا جاننے والا ہوں، حالانکہ میں ان سے بہتر نہیں ہوں۔“ شقیق کہتے ہیں کہ میں لوگوں کے مجمع میں بیٹھتا تاکہ لوگوں کے تاثرات معلوم کروں لیکن میں نے کسی سے اس بات کی تردید نہیں سنی۔ [صحيح البخاري/كتاب فضائل القرآن/حدیث: 5000]

حضرت علقمہ رحمہ اللہ سے روایت ہے، انہوں نے کہا کہ ہم حمص میں تھے۔ حضرت عبداللہ بن مسعود رضی اللہ عنہ نے سورہ یوسف پڑھی تو ایک شخص نے کہا: ”یہ اس طرح نازل نہیں ہوئی تھی۔“ حضرت عبداللہ بن مسعود رضی اللہ عنہ نے فرمایا: ”میں نے رسول اللہ صلی اللہ علیہ وسلم کے حضور اس سورت کو پڑھا تو آپ صلی اللہ علیہ وسلم نے فرمایا: ”تو نے بہت اچھا پڑھا ہے۔““ پھر انہوں نے اس (اعتراض کرنے والے) کے منہ سے شراب کی بو محسوس کی تو فرمایا: ”تو دو گناہ ایک ساتھ کرتا ہے: اللہ کی کتاب کو جھٹلاتا ہے اور شراب نوشی کرتا ہے؟“ پھر انہوں نے اس پر حد لگائی۔ [صحيح البخاري/كتاب فضائل القرآن/حدیث: 5001]

حضرت مسروق رحمہ اللہ سے روایت ہے انہوں نے کہا کہ حضرت عبداللہ بن مسعود رضی اللہ عنہ نے فرمایا: ”اس اللہ کی قسم جس کے سوا کوئی معبود برحق نہیں! اللہ کی کتاب کی کوئی سورت نازل نہیں ہوئی مگر میں جانتا ہوں کہ کہاں نازل ہوئی اور اللہ کی کتاب میں کوئی آیت مگر میں جانتا ہوں کہ وہ کس کے متعلق نازل ہوئی۔ اگر مجھے خبر ہو جائے کہ کوئی شخص مجھ سے زیادہ کتاب اللہ کا جاننے والا ہے اور اونٹ مجھے اس کے پاس پہنچا سکے تو اس کی طرف ضرور سفر کروں۔“ [صحيح البخاري/كتاب فضائل القرآن/حدیث: 5002]

حضرت قتادہ رضی اللہ عنہ سے روایت ہے، انہوں نے کہا کہ میں نے حضرت انس رضی اللہ عنہ سے پوچھا: ”نبی صلی اللہ علیہ وسلم کے عہد مبارک میں قرآن کریم کو کن کن حضرات نے جمع کیا تھا؟“ انہوں نے فرمایا: ”چار حضرات نے جمع کیا تھا اور سب انصار سے تھے: ابی بن کعب، معاذ بن جبل، زید بن ثابت اور ابو زید رضی اللہ عنہم۔“ فضل نے حسین بن واقد لیثی سے روایت کرنے میں حفص بن عمر کی متابعت کی ہے۔ [صحيح البخاري/كتاب فضائل القرآن/حدیث: 5003]

حضرت انس رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم نے وفات پائی تو صرف چار صحابہ کرام قرآن کے حافظ تھے، ابو الدرداء، معاذ بن جبل، زید بن ثابت اور ابو زید رضی اللہ عنہم۔ اور پھر ہم ابو زید رضی اللہ عنہ کے وارث بنے (کیونکہ ان کی اپنی اولاد نہیں تھی جبکہ انس رضی اللہ عنہ ان کے بھتیجے تھے)۔“ [صحيح البخاري/كتاب فضائل القرآن/حدیث: 5004]