حضرت ابو قتادہ رضی اللہ عنہ سے روایت ہے، انہوں نے کہا: ”ہم نبی صلی اللہ علیہ وسلم کے ہمراہ مکہ کی طرف روانہ ہوئے۔“ [صحيح البخاري/كتاب الأطعمة/حدیث: 5406]

حضرت ابو قتادہ سلمی رضی اللہ عنہ ہی سے روایت ہے انہوں نے کہا: ”میں ایک دن نبی صلی اللہ علیہ وسلم کے صحابہ کرام رضی اللہ عنہم کے ہمراہ مکہ مکرمہ کے راستے میں ایک مقام پر بیٹھا ہوا تھا جبکہ رسول اللہ صلی اللہ علیہ وسلم نے ہمارے آگے پڑاؤ کیا تھا۔ دیگر تمام صحابہ احرام باندھے ہوئے تھے لیکن میں احرام میں نہیں تھا۔ لوگوں نے ایک گورخر دیکھا۔ میں اس وقت اپنے جوتے گانٹھنے میں مصروف تھا انہوں نے مجھے گورخر کے متعلق کچھ نہ بتایا لیکن وہ چاہتے تھے کہ میں اس کی طرف دیکھ لوں اچانک میں ادھر متوجہ ہوا تو وہ مجھے نظر آ گیا۔ پھر میں اپنے گھوڑے کی طرف گیا، اس پر زین رکھی اور سوار ہو گیا لیکن اپنا کوڑا اور نیزہ نیچے بھول گیا میں نے ان سے کہا: ”مجھے نیزہ اور کوڑا پکڑا دو۔“ انہوں نے کہا: ”ایسا نہیں ہو سکتا، اللہ کی قسم! ہم اس (شکار کے) معاملے میں تمہاری کسی قسم کی مدد نہیں کر سکتے۔“ میں یہ سن کر غصے سے بھر گیا چنانچہ میں نے اتر کر یہ دونوں چیزیں اٹھائیں، پھر سوار ہو کر اس پر حملہ کیا اور اس کے پاؤں کاٹ ڈالے پھر میں اس کو لایا تو وہ ختم ہو چکا تھا۔ جب میں نے اسے پکا لیا تو کھانے میں سب شریک ہو گئے۔ بعد میں انہیں شبہ ہوا کہ احرام کی حالت میں انہیں اسے کھانے کی اجازت بھی تھی؟ چنانچہ ہم وہاں سے روانہ ہوئے تو میں نے اس کے بازو کا گوشت چھپا کر رکھا۔ پھر ہم رسول اللہ صلی اللہ علیہ وسلم کی خدمت میں حاضر ہوئے تو اس کے متعلق پوچھا، آپ صلی اللہ علیہ وسلم نے فرمایا: ”تمہارے پاس اس میں سے کچھ باقی ہے؟“ میں نے آپ صلی اللہ علیہ وسلم کو وہ شانہ پیش کر دیا تو آپ صلی اللہ علیہ وسلم نے اسے تناول فرمایا یہاں تک کہ اس کے گوشت کو دانتوں سے نوچ کر ہڈی کو ننگا کر دیا، حالانکہ آپ صلی اللہ علیہ وسلم حالت احرام میں تھے۔ محمد بن جعفر نے کہا کہ مجھے زید بن اسلم نے، انہوں نے عطاء بن یسار سے، انہوں نے حضرت ابو قتادہ رضی اللہ عنہ سے اس طرح بیان کیا۔ [صحيح البخاري/كتاب الأطعمة/حدیث: 5407]

حضرت عمرو بن امیہ رضی اللہ عنہ سے روایت ہے، انہوں نے ”نبی صلی اللہ علیہ وسلم کو دیکھا کہ آپ کے ہاتھ میں بکری کا شانہ تھا جسے آپ چھری سے کاٹ کر کھا رہے تھے۔ پھر آپ کو نماز کے لیے بلایا گیا تو آپ نے وہ شانہ اور چھری جس سے گوشت کاٹ رہے تھے دونوں کو پھینک دیا، پھر کھڑے ہوئے، نماز پڑھی اور (نیا) وضو نہ کیا۔“ [صحيح البخاري/كتاب الأطعمة/حدیث: 5408]

حضرت ابو ہریرہ رضی اللہ عنہ سے روایت ہے، انہوں نے کہا: ”نبی صلی اللہ علیہ وسلم نے کبھی کسی کھانے میں کوئی عیب نہیں نکالا، اگر پسند ہوتا تو کھا لیتے اور اگر ناپسند ہوتا تو اسے چھوڑ دیتے۔“ [صحيح البخاري/كتاب الأطعمة/حدیث: 5409]

حضرت ابو حازم رضی اللہ عنہ سے روایت ہے انہوں نے حضرت سہل بن سعد رضی اللہ عنہ سے سوال کیا کہ ”آیا تم نے نبی صلی اللہ علیہ وسلم کے زمانے میں میدے کی روٹی دیکھی تھی؟“ حضرت سہل رضی اللہ عنہ نے کہا، میں نے پوچھا: ”کیا تم جو کا آٹا چھانتے تھے؟“ انہوں نے فرمایا: ”نہیں بلکہ اسے پھونک مار لیا کرتے تھے۔“ [صحيح البخاري/كتاب الأطعمة/حدیث: 5410]

حضرت ابو ہریرہ رضی اللہ عنہ سے روایت ہے، انہوں نے کہا: ”نبی صلی اللہ علیہ وسلم نے ایک دن اپنے صحابہ کرام رضی اللہ عنہم میں کھجوریں تقسیم کیں تو ہر صحابی کو سات، سات کھجوریں عنایت فرمائیں، میرے حصے میں جو سات کھجوریں آئیں ان میں سے ایک تو بہت ردی قسم کی تھی لیکن سب سے زیادہ پسند بھی مجھے یہی کھجور تھی کیونکہ وہ چبانے میں سخت واقع ہوئی تھی، یعنی اسے میں دیر تک چباتا رہا۔“ [صحيح البخاري/كتاب الأطعمة/حدیث: 5411]

حضرت سعد بن ابی وقاص رضی اللہ عنہ سے روایت ہے، انہوں نے کہا: ”میں نے اپنے آپ کو دیکھا کہ رسول اللہ صلی اللہ علیہ وسلم کے ہمراہ سات آدمیوں میں سے ساتواں تھا۔ ان دنوں ہمارا کھانا خار دار درخت کی پتیاں ہوا کرتا تھا جس کی وجہ سے ہم بکریوں کی طرح مینگنیاں کیا کرتے تھے۔ اب حالت یہ ہے کہ قبیلہ بنو اسد مجھے اسلام کے احکام سکھاتا ہے، اگر واقعی ایسا ہے تو میں خسارے میں رہا اور میری ساری کوشش ضائع ہو گئی۔“ [صحيح البخاري/كتاب الأطعمة/حدیث: 5412]

حضرت ابوحازم سے روایت ہے، انہوں نے کہا: میں نے حضرت سہل بن سعد رضی اللہ عنہ سے دریافت کیا کہ ”رسول اللہ صلی اللہ علیہ وسلم نے کبھی میدے کی روٹی کھائی تھی؟“ انہوں نے جواب دیا: ”جب سے اللہ تعالیٰ نے آپ کو مبعوث کیا ہے، آپ نے میدے کی روٹی دیکھی تک نہیں حتیٰ کہ آپ اللہ کو پیارے ہو گئے۔“ پھر میں نے پوچھا: ”کیا رسول اللہ صلی اللہ علیہ وسلم کے عہدِ مبارک میں چھانٹنیاں ہوتی تھیں؟“ حضرت سہل رضی اللہ عنہ نے فرمایا: ”زمانہِ بعثت سے لے کر مرتے دم تک رسول اللہ صلی اللہ علیہ وسلم نے چھاننی نہیں دیکھی۔“ ابوحازم کہتے ہیں پھر میں نے سوال کیا: ”پھر تم بنا چھنے جو کا آٹا کیسے کھاتے تھے؟“ انہوں نے جواب دیا: ”ہم انہیں پیستے تھے پھر اسے پھونک لیا کرتے تھے، اس سے جو کچھ اڑتا ہوتا اڑ جاتا، جو باقی رہتا اسے پانی سے گوندھ لیتے اور اس کی روٹی پکا کر لیتے تھے۔“ [صحيح البخاري/كتاب الأطعمة/حدیث: 5413]

حضرت ابوہریرہ رضی اللہ عنہ سے روایت ہے کہ ان کا گزر ایک ایسی قوم کے پاس سے ہوا جن کے سامنے بھنی ہوئی بکری رکھی ہوئی تھی، انہوں نے آپ کو دعوت دی تو آپ نے کھانے سے انکار کر دیا اور فرمایا: ”رسول اللہ صلی اللہ علیہ وسلم اس دنیا سے رخصت ہو گئے لیکن کبھی جو کی روٹی بھی آپ نے پیٹ بھر کر نہ کھائی۔“ [صحيح البخاري/كتاب الأطعمة/حدیث: 5414]

حضرت انس بن مالک رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم نے نہ تو میز پر رکھ کر کھانا کھایا اور نہ چھوٹے چھوٹے پیالوں کو کھانے میں استعمال کیا اور نہ آپ صلی اللہ علیہ وسلم کے لیے باریک چپاتی ہی پکائی گئی۔“ (راویِ حدیث کہتے ہیں کہ) میں نے قتادہ سے پوچھا کہ پھر وہ کس چیز پر رکھ کر کھانا کھاتے تھے؟ انہوں نے جواب دیا: ”چمڑے کے دستر خوان پر کھانا رکھ کر اسے تناول فرماتے تھے۔“ [صحيح البخاري/كتاب الأطعمة/حدیث: 5415]