ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جب تم میں سے کوئی رات کو قیام کرے تو دو ہلکی رکعتوں سے آغاز کرے۔“ رواہ مسلم۔ [مشكوة المصابيح/كتاب الصلاة/حدیث: 1194]

ابن عباس رضی اللہ عنہما بیان کرتے ہیں، میں نے اپنی خالہ میمونہ رضی اللہ عنہا کے ہاں ایک رات بسر کی، جبکہ نبی صلی ‌اللہ ‌علیہ ‌وآلہ ‌وسلم ان کے ہاں تھے، رسول اللہ صلی ‌اللہ ‌علیہ ‌وآلہ ‌وسلم نے اپنے اہل خانہ کے ساتھ کچھ دیر بات چیت کی اور پھر سو گئے، جب آخری تہائی رات یا کچھ رات باقی رہ گئی تو آپ اٹھ کر بیٹھ گئے، اور آسمان کی طرف نظر اٹھا کر یہ آیت تلاوت فرمائی: ﴿إِنَّ فِي خَلْقِ السَّمَاوَاتِ وَالْأَرْضِ وَاخْتِلَافِ اللَّيْلِ وَالنَّهَارِ لَآيَاتٍ لِّأُولِي الْأَلْبَابِ﴾ [سورة آل عمران: 190] ”بے شک آسمانوں اور زمین کی پیدائش اور رات اور دن کے باری باری آنے میں عقل مندوں کے لیے نشانیاں ہیں۔“ حتیٰ کہ آپ نے سورت مکمل فرمائی، پھر آپ مشکیزے کی طرف گئے، پھر اس کا منہ کھول کر ٹب میں پانی لیا اور افراط و تفریط کے بغیر خوب اچھی طرح وضو کیا، پھر آپ کھڑے ہو کر نماز پڑھنے لگے، میں بھی کھڑا ہوا اور وضو کر کے آپ کے بائیں جانب کھڑا ہو گیا، آپ نے مجھے کان سے پکڑ کر گھما کر اپنے دائیں جانب کر لیا، آپ نے تیرہ رکعت نماز مکمل کی، پھر آپ لیٹ گئے، اور سو گئے حتیٰ کہ آپ خراٹے بھرنے لگے، اور جب آپ سو جاتے تو خراٹے بھرتے، پھر بلال رضی اللہ عنہ نے آپ صلی ‌اللہ ‌علیہ ‌وآلہ ‌وسلم کو نماز کی اطلاع دی، پس آپ نے اور وضو نہ کیا اور آپ یہ دعا کیا کرتے تھے: «اللَّهُمَّ اجْعَلْ فِي قَلْبِي نُورًا، وَفِي بَصَرِي نُورًا، وَفِي سَمْعِي نُورًا، وَعَنْ يَمِينِي نُورًا، وَعَنْ يَسَارِي نُورًا، وَفَوْقِي نُورًا، وَتَحْتِي نُورًا، وَأَمَامِي نُورًا، وَخَلْفِي نُورًا، وَاجْعَلْ لِي نُورًا» ”اے اللہ! میرے دل میں، میری آنکھوں میں، میرے کانوں میں، میرے دائیں، میرے بائیں، میرے اوپر، میرے نیچے، میرے آگے اور میرے پیچھے اور میرے لیے نور کر دے۔“ اور ان میں سے بعض نے یہ اضافہ نقل کیا ہے: «وَفِي لِسَانِي نُورًا» ”میری زبان میں نور کر دے۔“ اور یہ بھی ذکر کیا ہے: «وَاجْعَلْ فِي عَصَبِي نُورًا، وَفِي لَحْمِي نُورًا، وَفِي دَمِي نُورًا، وَفِي شَعَرِي نُورًا، وَفِي بَشَرِي نُورًا» ”میرے پٹھے، گوشت، میرا خون، میرے بال اور میرا بدن نورانی بنا دے۔“ متفق علیہ۔ اور صحیحین کی روایت میں ہے: «وَاجْعَلْ فِي نَفْسِي نُورًا، وَأَعْظِمْ لِي نُورًا» ”اور میرے نفس میں نور اور بہت ہی نور بخش۔“ اور ایک دوسری روایت میں جو مسلم میں ہے: «اللَّهُمَّ أَعْطِنِي نُورًا» ”اے اللہ! تو مجھے نور عطا فرما۔“ [مشكوة المصابيح/كتاب الصلاة/حدیث: 1195]

عبداللہ بن عباس رضی اللہ عنہما سے روایت ہے کہ وہ رسول اللہ صلی ‌اللہ ‌علیہ ‌وآلہ ‌وسلم کے ہاں سوئے، آپ بیدار ہوئے، مسواک کی اور وضو کیا، اور آپ صلی ‌اللہ ‌علیہ ‌وآلہ ‌وسلم فرما رہے تھے: ﴿إِنَّ فِي خَلْقِ السَّمَاوَاتِ وَالْأَرْضِ﴾ [سورة آل عمران: 190] ”بے شک آسمانوں اور زمین کی تخلیق میں...“ آخر سورت تک۔ پھر آپ کھڑے ہوئے، دو رکعتیں پڑھیں، ان میں قیام اور رکوع و سجود لمبا کیا، پھر آپ آ کر سو گئے یہاں تک کہ آپ خراٹے بھرنے لگے، پھر آپ نے تین مرتبہ ایسے کرتے ہوئے چھ رکعتیں پڑھیں، آپ ہر مرتبہ مسواک کرتے، وضو کرتے اور ان آیات کی تلاوت فرماتے تھے، پھر آپ صلی ‌اللہ ‌علیہ ‌وآلہ ‌وسلم نے تین وتر پڑھے۔ (رواہ مسلم)۔ [مشكوة المصابيح/كتاب الصلاة/حدیث: 1196]

زید بن خالد جہنی رضی اللہ عنہ سے روایت ہے کہ انہوں نے فرمایا: ”میں آج رات رسول اللہ صلی ‌اللہ ‌علیہ ‌وآلہ ‌وسلم کی نمازِ تہجد ملاحظہ کروں گا۔“ آپ صلی ‌اللہ ‌علیہ ‌وآلہ ‌وسلم نے دو ہلکی سی رکعتیں پڑھیں، پھر دو رکعتیں بہت ہی لمبی پڑھیں، پھر دو رکعتیں پڑھیں جو پہلی دو سے قدرے مختصر تھیں، پھر دو رکعتیں ان سے کم لمبی پڑھیں، پھر دو رکعتیں ان سے کم لمبی پڑھیں، پھر آپ صلی ‌اللہ ‌علیہ ‌وآلہ ‌وسلم نے وتر پڑھا، یہ تیرہ رکعتیں ہوئیں۔ اسے امام مسلم، امام مالک اور ابوداؤد رحمہ اللہ نے روایت کیا ہے۔ امام مسلم رحمہ اللہ نے زید رضی اللہ عنہ کا یہ قول: ”آپ نے رکعتیں پڑھیں اور وہ پہلی دو سے قدرے مختصر تھیں۔“ چار مرتبہ ذکر کیا ہے، اور صحیح مسلم میں اور افرادِ مسلم میں کتاب الحمیدی اور موطا مالک، سنن ابی داؤد اور جامع الاصول میں اسی طرح مذکور ہے۔ [مشكوة المصابيح/كتاب الصلاة/حدیث: 1197]

عائشہ رضی اللہ عنہا بیان کرتی ہیں، جب رسول اللہ صلی ‌اللہ ‌علیہ ‌وآلہ ‌وسلم عمر ر اور بوجھل ہو گئے تو آپ زیادہ تر بیٹھ کر نماز پڑھا کرتے تھے۔ متفق علیہ۔ [مشكوة المصابيح/كتاب الصلاة/حدیث: 1198]

عبداللہ بن مسعود رضی اللہ عنہ بیان کرتے ہیں: میں ان ایک جیسی سورتوں کو جانتا ہوں جنہیں نبی صلی ‌اللہ ‌علیہ ‌وآلہ ‌وسلم ملا کر پڑھا کرتے تھے، ان میں سے آخری دو سورتیں ﴿حٰمٓ الدخان﴾ [سورة الدخان: 1] اور ﴿عَمَّ يَتَسَاءَلُونَ﴾ [سورة النبإ: 1] ہیں۔ (متفق علیہ) [مشكوة المصابيح/كتاب الصلاة/حدیث: 1199]

حذیفہ رضی اللہ عنہ سے روایت ہے کہ انہوں نے نبی صلی ‌اللہ ‌علیہ ‌وآلہ ‌وسلم کو تہجد پڑھتے ہوئے دیکھا، آپ صلی ‌اللہ ‌علیہ ‌وآلہ ‌وسلم نے تین بار «اللّٰهُ أَكْبَرُ» ”اللہ اکبر“ کہا اور پھر دعا پڑھی، پھر آپ صلی ‌اللہ ‌علیہ ‌وآلہ ‌وسلم نے رکوع کیا تو آپ صلی ‌اللہ ‌علیہ ‌وآلہ ‌وسلم کا رکوع قیام کی طرح (طویل) تھا، آپ صلی ‌اللہ ‌علیہ ‌وآلہ ‌وسلم اپنے رکوع میں یہ دعا کیا کرتے تھے: «سُبْحَانَ رَبِّيَ الْعَظِيمِ» ”پاک ہے میرا رب عظمت والا۔“ پھر آپ صلی ‌اللہ ‌علیہ ‌وآلہ ‌وسلم نے رکوع سے اپنا سر اٹھایا تو آپ صلی ‌اللہ ‌علیہ ‌وآلہ ‌وسلم کا قیام رکوع کی طرح تھا، آپ صلی ‌اللہ ‌علیہ ‌وآلہ ‌وسلم وہاں یہ دعا کرتے تھے: «لِرَبِّيَ الْحَمْدُ» ”میرے رب کے لیے ہر قسم کی حمد ہے۔“ پھر آپ صلی ‌اللہ ‌علیہ ‌وآلہ ‌وسلم نے سجدہ کیا، آپ صلی ‌اللہ ‌علیہ ‌وآلہ ‌وسلم کے سجود بھی آپ صلی ‌اللہ ‌علیہ ‌وآلہ ‌وسلم کے قیام کے برابر تھے، آپ صلی ‌اللہ ‌علیہ ‌وآلہ ‌وسلم اپنے سجود میں یہ دعا کیا کرتے تھے: «سُبْحَانَ رَبِّيَ الْأَعْلَى» ”پاک ہے میرا رب بہت بلند۔“ پھر آپ صلی ‌اللہ ‌علیہ ‌وآلہ ‌وسلم نے سجود سے سر اٹھایا، آپ صلی ‌اللہ ‌علیہ ‌وآلہ ‌وسلم اپنے سجدوں کے درمیان اپنے سجود کے برابر ہی بیٹھتے تھے، اور یہ دعا کیا کرتے تھے: «رَبِّ اغْفِرْ لِي» ”میرے رب! مجھے بخش دے۔“ آپ صلی ‌اللہ ‌علیہ ‌وآلہ ‌وسلم نے چار رکعتیں پڑھیں اور آپ صلی ‌اللہ ‌علیہ ‌وآلہ ‌وسلم نے ان میں سورۃ البقرہ، آل عمران، النساء، المائدہ یا الانعام تلاوت فرمائیں۔ شعبہ کو المائدہ یا الانعام میں شک ہوا ہے۔ صحیح، رواہ ابوداؤد و ابن ماجہ و النسائی۔ [مشكوة المصابيح/كتاب الصلاة/حدیث: 1200]

عبداللہ بن عمرو بن عاص رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جو شخص دس آیات کا اہتمام کرتا ہے وہ غافلین میں نہیں لکھا جاتا، جو سو آیات (کی تلاوت و حفظ اور عمل) کا اہتمام کرتا ہے تو وہ اطاعت گزاروں میں لکھ دیا جاتا ہے اور جو شخص ہزار آیات کا اہتمام کرتا ہے تو وہ ڈھیروں اجر و ثواب پانے والوں میں لکھ دیا جاتا ہے۔“ اسنادہ حسن، رواہ ابوداؤد۔ [مشكوة المصابيح/كتاب الصلاة/حدیث: 1201]

ابوہریرہ رضی اللہ عنہ بیان کرتے ہیں کہ نبی صلی ‌اللہ ‌علیہ ‌وآلہ ‌وسلم تہجد میں قراءت کرتے وقت کبھی اپنی آواز بلند کرتے اور کبھی پست کرتے تھے۔ اسنادہ حسن، رواہ ابوداؤد۔ [مشكوة المصابيح/كتاب الصلاة/حدیث: 1202]

ابن عباس رضی اللہ عنہما بیان کرتے ہیں، نبی صلی ‌اللہ ‌علیہ ‌وآلہ ‌وسلم اس قدر بلند آواز سے قراءت کرتے تھے کہ آپ صلی ‌اللہ ‌علیہ ‌وآلہ ‌وسلم گھر کے اندر قراءت کرتے تو صحن میں موجود شخص آپ صلی ‌اللہ ‌علیہ ‌وآلہ ‌وسلم کی قراءت سن سکتا تھا۔ اسنادہ حسن، رواہ ابوداؤد۔ [مشكوة المصابيح/كتاب الصلاة/حدیث: 1203]