ابن عمر رضی اللہ عنہما سے روایت ہے کہ نبی صلی ‌اللہ ‌علیہ ‌وآلہ ‌وسلم نے فرمایا: ”حلال چیزوں میں سے اللہ کے نزدیک سب سے زیادہ ناپسندیدہ چیز طلاق ہے۔“ اسنادہ حسن، رواہ ابوداؤد۔ [مشكوة المصابيح/كتاب النكاح/حدیث: 3280]

علی رضی اللہ عنہ نبی صلی ‌اللہ ‌علیہ ‌وآلہ ‌وسلم سے روایت کرتے ہیں، آپ صلی ‌اللہ ‌علیہ ‌وآلہ ‌وسلم نے فرمایا: ”نکاح سے پہلے طلاق دینے، ملکیت سے پہلے آزاد کرنے، مسلسل روزے رکھنے، بالغ ہونے کے بعد یتیم، دودھ چھڑانے کے بعد رضاعت اور صبح سے رات تک خاموشی اختیار کرنے کا کوئی جواز نہیں۔“ ضعیف، رواہ فی شرح السنہ۔ [مشكوة المصابيح/كتاب النكاح/حدیث: 3281]

عمرو بن شعیب اپنے والد سے اور وہ اپنے دادا رضی اللہ عنہ سے روایت کرتے ہیں، انہوں نے کہا کہ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”انسان جس چیز کا مالک نہیں، اس میں اس کا نذر دینا، آزاد کرنا اور طلاق دینا معتبر نہیں ہے۔“ اور ابوداؤد نے یہ الفاظ زیادہ کیے ہیں: ”انسان جس چیز کا مالک ہے اسی کی بیع کر سکتا ہے۔“ اسنادہ حسن، رواہ الترمذی وابوداؤد۔ [مشكوة المصابيح/كتاب النكاح/حدیث: 3282]

رکانہ بن عبد یزید رضی اللہ عنہ سے روایت ہے کہ انہوں نے اپنی اہلیہ سہیمہ رضی اللہ عنہا کو «طَلَاقُ الْبَتَّةِ» ”طلاقِ بتہ“ دی، انہوں نے اس کے متعلق نبی صلی ‌اللہ ‌علیہ ‌وآلہ ‌وسلم کو بتایا اور کہا: اللہ کی قسم! میں نے صرف ایک ہی کا ارادہ کیا تھا، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”تم نے صرف ایک ہی کا ارادہ کیا تھا؟“ رکانہ رضی اللہ عنہ نے عرض کیا: اللہ کی قسم! میں نے ایک ہی کا ارادہ کیا تھا۔ رسول اللہ صلی ‌اللہ ‌علیہ ‌وآلہ ‌وسلم نے سہیمہ رضی اللہ عنہا کو رکانہ رضی اللہ عنہ کی طرف لوٹا دیا، پھر انہوں نے دوسری طلاق عمر رضی اللہ عنہ کے دورِ حکومت میں اور تیسری طلاق عثمان رضی اللہ عنہ کے دورِ حکومت میں دی۔ ابوداؤد، ترمذی، ابن ماجہ اور دارمی، مگر انہوں نے دوسری اور تیسری طلاق کا ذکر نہیں کیا۔ حسن، رواہ ابوداؤد و الترمذی و ابن ماجہ و الدارمی۔ [مشكوة المصابيح/كتاب النكاح/حدیث: 3283]

ابوہریرہ رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”تین چیزیں ایسی ہیں جو حقیقت میں بھی حقیقت ہیں اور مزاح میں بھی حقیقت ہیں: نکاح، طلاق اور رجوع۔“ (ترمذی، ابوداؤد) اور امام ترمذی رحمہ اللہ نے فرمایا: یہ حدیث حسن غریب ہے۔ اس کی سند حسن ہے، اسے ترمذی اور ابوداؤد نے روایت کیا ہے۔ [مشكوة المصابيح/كتاب النكاح/حدیث: 3284]

عائشہ رضی اللہ عنہا بیان کرتی ہیں، میں نے رسول اللہ صلی ‌اللہ ‌علیہ ‌وآلہ ‌وسلم کو فرماتے ہوئے سنا: ”جبر کی صورت میں نہ طلاق معتبر ہے اور نہ آزاد کرنا۔“ اور «إِغْلَاقٍ» کا معنی جبر ہے۔ (سندہ ضعیف، رواہ ابوداؤد وابن ماجہ)۔ [مشكوة المصابيح/كتاب النكاح/حدیث: 3285]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”مجنون اور مغلوب العقل کی طلاق کے سوا ہر طلاق واقع ہو جاتی ہے۔“ ترمذی، اور انہوں نے فرمایا: یہ حدیث غریب ہے، اور عطاء بن عجلان راوی ضعیف ہے، وہ حدیث یاد رکھنے والا نہیں۔ «إِسْنَادُهُ ضَعِيفٌ جِدًّا، رَوَاهُ التِّرْمِذِيُّ» ”اس کی سند نہایت ضعیف ہے، اسے ترمذی نے روایت کیا ہے۔“ [مشكوة المصابيح/كتاب النكاح/حدیث: 3286]

علی رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”تین شخص «مَرْفُوعُ الْقَلَمِ» ”مرفوع القلم“ ہیں: سویا ہوا حتیٰ کہ جاگ جائے، بچہ حتیٰ کہ بالغ ہو جائے، اور مجنون حتیٰ کہ وہ ہوش مند ہو جائے۔“ حسن، رواہ الترمذی وابوداؤد۔ [مشكوة المصابيح/كتاب النكاح/حدیث: 3287]

دارمی نے عائشہ رضی اللہ عنہا سے اور ابن ماجہ نے علی اور عائشہ رضی اللہ عنہما سے روایت کیا ہے۔ «سَنَدُهُ ضَعِيفٌ» ”اس کی سند ضعیف ہے“، «رَوَاهُ الدَّارِمِيُّ وَابْنُ مَاجَه» ”اسے دارمی اور ابن ماجہ نے روایت کیا ہے“۔ [مشكوة المصابيح/كتاب النكاح/حدیث: 3288]

عائشہ رضی اللہ عنہا سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”لونڈی کی طلاق دو طلاقیں ہیں اور اس کی عدت دو حیض ہیں۔“ اسنادہ ضعیف، رواہ الترمذی و ابوداؤد و ابن ماجہ و الدارمی۔ [مشكوة المصابيح/كتاب النكاح/حدیث: 3289]