الحمدللہ! انگلش میں کتب الستہ سرچ کی سہولت کے ساتھ پیش کر دی گئی ہے۔
نماز کے احکام و مسائل
38. قرآن سات قراءتوں پر نازل ہوا
حدیث نمبر: 184 |
|
سیدہ ام ایوب رضی اللہ عنہا نے رسول اللہ صلی اللہ علیہ وسلم سے روایت کیا کہ آپ صلی اللہ علیہ وسلم نے فرمایا: ”قرآن سات قرأتوں پر نازل ہوا ہے وہ سب شافی (اطمینان بخش) کافی (کفایت کرنے والی) ہیں۔“
تخریج الحدیث: «بخاري، مسلم، كتاب صلاة المسافرين، باب بيان القرآن على سبعة احراف الخ، رقم: 819. سنن ابوداود، رقم: 1475. سنن ترمذي، رقم: 2943. سنن نسائي، رقم: 940.»
39. سنتِ مؤکدہ کی فضیلت
حدیث نمبر: 185 |
|
ام حبیبہ رضی اللہ عنہا نے رسول اللہ صلی اللہ علیہ وسلم سے روایت کیا، آپ صلی اللہ علیہ وسلم نے فرمایا: ”جو شخص دن میں بارہ رکعتیں (سنت موکدہ) پڑھتا ہے، اللہ اس کے لیے جنت میں گھر بنا دیتا ہے۔“
تخریج الحدیث: «مسلم، كتاب صلاة المسافرين، باب فضل السنن الراتية الخ، رقم: 728. سنن ابوداود، رقم: 1250. سنن ابن ماجه، رقم: 1142. سنن نسائي، رقم: 1796. مسند احمد: 326/6. صحيح ابن خزيمه، رقم: 1185.»
40. اذان کا جواب دینا
حدیث نمبر: 186 |
|
سیدہ ام حبیبہ رضی اللہ عنہا سے روایت ہے کہ رسول اللہ صلی اللہ علیہ وسلم جب موذن کو سنتے تو جس طرح (کے کلمات) وہ کہتا ویسے ہی (کلمات) آپ فرماتے تھے۔
تخریج الحدیث: «بخاري، كتاب الاذان، باب ما يقول اذا سمع المنادي، رقم: 611. مسلم، كتاب الصلاة، رقم: 383. بلفظ اذا سمعتم الندا فقولو مثل ما يقول الموذن. مسند احمد: 326/6.»
41. تہجد، فجر کی دو سنتوں اور مسواک کی فضیلت
حدیث نمبر: 187 |
|
سیدہ عائشہ رضی اللہ عنہا سے روایت ہے کہ شریح رحمہ اللہ نے ان سے رسول اللہ صلی اللہ علیہ وسلم کی نماز کے متعلق پوچھا:، تو انہوں نے فرمایا: رسول اللہ صلی اللہ علیہ وسلم جتنی اللہ چاہتا کہ آپ نماز تہجد پڑھیں آپ تہجد پڑھتے رہتے، پھر جب نماز فجر کا وقت ہوتا تو اسے پڑھانے سے پہلے دو رکعتیں پڑھتے، پھر تشریف لے جاتے اور فجر کی نماز پڑھاتے۔ شریح رحمہ اللہ نے ان سے کہا: رسول اللہ صلی اللہ علیہ وسلم جب مسجد سے واپس آپ کے پاس تشریف لاتے تھے تو آپ کیا کرتے تھے؟ انہوں نے فرمایا: ”آپ مسواک سے ابتداء فرماتے تھے۔“
تخریج الحدیث: «اسناده صحيح لغيره. مختصر مسلم، رقم: 253. سنن ابن ماجه، رقم: 290، 1150. مسند احمد: 110/6. السنن الكبريٰ للبيهقي: 34/1.»
حدیث نمبر: 188 |
|
سیدہ عائشہ رضی اللہ عنہا نے فرمایا: رسول اللہ صلی اللہ علیہ وسلم جب نماز تہجد پڑھتے تو دو ہلکی رکعتوں سے نماز کا آغاز فرماتے تھے۔
تخریج الحدیث: «مسلم، كتاب صلاة المسافرين، باب الدعاء فى صلاة الليل و قيامه، رقم: 767. سنن ابوداود، كتاب الصلاة، باب افتتاح صلاة الليل بركعتين، رقم: 1323.»
42. خواتین کا آمین بالجہر کہنا
حدیث نمبر: 189 |
|
سیدہ ام الحصین رضی اللہ عنہا سے روایت ہے، انہوں نے رسول اللہ صلی اللہ علیہ وسلم کے پیچھے نماز پڑھی تو میں نے آپ صلی اللہ علیہ وسلم کو فرماتے ہوئے سنا: «مالك يوم الدين» پس جب آپ نے «ولا الضالين» پڑھا تو فرمایا: ”آمین“ حتیٰ کہ میں نے آپ صلی اللہ علیہ وسلم کی آواز سنی جبکہ وہ خواتین کی صف میں تھی۔
تخریج الحدیث: «المعجم الكبير للطبراني: 158/25. اسناده ضعيف فيه اسماعيل بن مسلم المكي، ضعيف الحديث. التقريب: 484. و ابواسحاق مدلس.»
43. دورانِ سفر فرض اور نفل نماز کا بیان
حدیث نمبر: 190 |
|
سیدنا اسامہ بن زید نے بیان کیا، میں نے طاؤس سے دوران سفر ذکر اور نفل نماز کے متعلق پوچھا: جبکہ حسن بن مسلم بن یناق بیٹھے ہوئے تھے۔ تو حسن نے کہا: طاؤس نے سیدنا ابن عباس رضی اللہ عنہما سے مجھے بیان کیا، انہوں نے کہا: رسول اللہ صلی اللہ علیہ وسلم نے حضرو سفر کی نماز فرض کی، جس طرح حضر میں اس سے پہلے اور اس کے بعد نماز پڑھی جاتی ہے، انہوں نے کہا: اسی طرح سفر میں اس سے پہلے اور اس کے بعد نماز پڑھی جائے گی۔
تخریج الحدیث: «سنن ابن ماجه، كتاب اقامة الصلاة، باب التطوع فى السفر، رقم: 1072. مسند احمد: 232/1، قال شعيب الارناوط: اسناده حسن. سنن كبري بيهقي: 158/3.»
44. سات اعضاء پر سجدہ کرنے کا بیان
حدیث نمبر: 191 |
|
سیدنا ابن عباس رضی اللہ عنہما نے بیان کیا، تمہارے نبی ( صلی اللہ علیہ وسلم ) کو حکم دیا گیا ہے کہ وہ سات ہڈیوں پر سجدہ کریں، نیز بال اور کپڑے نہ سمیٹے جائیں۔ عمرو (بن دینار) نے ایک بار یوں بیان کیا، نبی کریم صلی اللہ علیہ وسلم نے فرمایا: ”مجھے حکم دیا گیا ہے کہ میں سات ہڈیوں پر سجدہ کروں اور مجھے حکم دیا گیا ہے کہ میں بالوں اور کپڑوں کو نہ سمیٹوں۔“
تخریج الحدیث: «بخاري، كتاب الاذان، باب السجود على سبعة اعظم، رقم: 810. مسلم، كتاب الصلاة، باب اعضاء السجود والنهي عن كف الشعر والثوب. سنن ابوداود، رقم: 890. سنن ترمذي، رقم: 273. سنن نسائي، رقم: 1093. سنن ابن ماجه، رقم: 884، 883. مسند احمد: 255/1»
حدیث نمبر: 192 |
|
سیدنا ابن عباس رضی اللہ عنہما نے بیان کیا، نبی کریم صلی اللہ علیہ وسلم کو حکم دیا گیا ہے وہ سات ہڈیوں پر سجدہ کریں اور بال و کپڑے نہ سمیٹیں۔
تخریج الحدیث: «السابق»
حدیث نمبر: 193 |
|
سیدنا ابن عباس رضی اللہ عنہما نے بیان کیا، نبی کریم صلی اللہ علیہ وسلم کو حکم دیا گیا کہ سات اعضاء پر سجدہ کیا جائے، بال اور کپڑے نہ سمیٹے جائیں۔ ابراہیم بن میسرہ نے بیان کیا: میں نے طاؤس رحمہ اللہ سے ناک پر سجدہ کرنے کے متعلق پوچھا:، تو انہوں نے فرمایا: وہ بہتر ہے، اسحاق رحمہ اللہ نے فرمایا: پیشانی اور ناک ایک ہی چیز ہے۔
تخریج الحدیث: «سنن ابن ماجه، كتاب الصلاة، باب السجود، رقم: 884. قال الالباني: صحيح.»