سیدنا ابن عباس رضی اللہ عنہما سے روایت ہے کہ نبی کریم صلی اللہ علیہ وسلم نے فرمایا: ”کسی بندے کو لائق نہیں کہ وہ یوں کہے کہ میں (محمد صلی اللہ علیہ وسلم ) سیدنا یونس بن متی علیہ السلام سے بہتر ہوں۔“ [سنن ابي داود/كتاب السنة /حدیث: 4669]

سیدنا ابو سعید خدری رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”انبیاء کو ایک دوسرے پر فضیلت و ترجیح مت دیا کرو۔“ [سنن ابي داود/كتاب السنة /حدیث: 4668]

سیدنا عبداللہ بن جعفر رضی اللہ عنہ سے روایت ہے کہ رسول اللہ صلی اللہ علیہ وسلم فرمایا کرتے تھے: ”کسی نبی کو لائق نہیں کہ یوں کہے کہ میں سیدنا یونس بن متی علیہ السلام سے بہتر ہوں۔“ [سنن ابي داود/كتاب السنة /حدیث: 4670]

سیدنا ابوہریرہ رضی اللہ عنہ سے روایت ہے کہ ایک یہودی نے کہا: ”قسم اس ذات کی جس نے موسیٰ علیہ السلام کو منتخب فرمایا۔“ تو ایک مسلمان نے اپنا ہاتھ اٹھایا اور یہودی کے منہ پر تھپڑ مار دیا۔ وہ یہودی نبی کریم صلی اللہ علیہ وسلم کے پاس چلا آیا اور آپ صلی اللہ علیہ وسلم کو بتایا تو نبی کریم صلی اللہ علیہ وسلم نے فرمایا: ”مجھے موسیٰ علیہ السلام پر فضیلت مت دو۔ بلاشبہ (قیامت برپا ہونے پر) جب لوگ بے ہوش کیے جائیں گے تو میں ہی ہوں گا جو سب سے پہلے ہوش میں آؤں گا اور دیکھوں گا کہ موسیٰ علیہ السلام عرش کا پایہ پکڑے کھڑے ہوں گے۔ معلوم نہیں وہ بے ہوش ہوئے ہوں گے اور مجھ سے پہلے ہوش میں آ گئے ہوں گے یا یہ ان افراد میں سے ہوں جنہیں اللہ تعالیٰ نے بے ہوشی سے مستثنیٰ رکھا ہو گا۔“ امام ابوداؤد رحمہ اللہ فرماتے ہیں کہ ابن یحییٰ کی روایت زیادہ مکمل ہے۔ [سنن ابي داود/كتاب السنة /حدیث: 4671]