حضرت اسماء رضی اللہ عنہا سے روایت ہے، انہوں نے کہا: نبی کریم صلی اللہ علیہ وسلم نے مجھ سے فرمایا: ”صدقہ و خیرات کو مت روکو وگرنہ تم پر بندش کر دی جائے گی۔“ ایک روایت میں ہے کہ آپ صلی اللہ علیہ وسلم نے فرمایا: ”صدقہ دینے کے لیے گن گن کر مت رکھو، وگرنہ اللہ بھی تمہیں گن گن کر ہی دے گا۔“ [صحيح البخاري/كتاب الزكاة/حدیث: 1433]

حضرت اسماء بنت ابی بکر رضی اللہ عنہا سے روایت ہے کہ وہ ایک دفعہ نبی کریم صلی اللہ علیہ وسلم کے پاس حاضر ہوئیں تو آپ صلی اللہ علیہ وسلم نے فرمایا: ”اپنے مال کو سینت سینت کر مت رکھو ورنہ اللہ اپنی رحمت تم سے روک لے گا اور جس قدر ممکن ہو خرچ کرتی رہو۔“ [صحيح البخاري/كتاب الزكاة/حدیث: 1434]

حضرت اسماء بنت ابی بکر رضی اللہ عنہا سے روایت ہے، فرماتی ہیں کہ میں نے دریافت کیا: اللہ کے رسول صلی اللہ علیہ وسلم ! میرے پاس مال تو وہی ہوتا ہے جو میرے شوہر حضرت زبیر رضی اللہ عنہ لاتے ہیں تو کیا میں اس میں سے صدقہ کر سکتی ہوں؟ آپ صلی اللہ علیہ وسلم نے فرمایا: ”صدقہ کرو، اسے مت روکو، ورنہ اللہ بھی تجھ سے روک لے گا۔“ [صحيح البخاري/كتاب الزكاة/حدیث: 2590]

حضرت اسماء رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”خرچ کرو اور اسے گن گن کر مت رکھو کہ پھر اللہ تعالیٰ بھی تمہیں گن کر دے، نیز اسے مت روکو ورنہ اللہ بھی تم سے روک لے گا۔“ [صحيح البخاري/كتاب الزكاة/حدیث: 2591]

حضرت ابوہریرہ رضی اللہ عنہ سے روایت ہے، انہوں نے کہا: میں نے رسول اللہ صلی اللہ علیہ وسلم کو یہ فرماتے ہوئے سنا: ”قریش کی عورتیں ان تمام عورتوں (عربی خواتین) سے بہتر ہیں جو اونٹ پر سوار ہوتی ہیں۔ یہ سب عورتوں سے زیادہ اپنے بچوں پر شفقت کرتی ہیں اور اپنے شوہر کے مال کا زیادہ خیال رکھنے والی ہیں۔“ یہ حدیث بیان کرنے کے بعد حضرت ابوہریرہ رضی اللہ عنہ کہا کرتے تھے کہ مریم علیہا السلام بنت عمران کبھی اونٹ پر سوار نہیں ہوئیں۔ امام زہری رحمہ اللہ کے بھتیجے اور اسحاق کلبی نے زہری سے روایت کرنے میں یونس کی متابعت کی ہے۔ [صحيح البخاري/كتاب الزكاة/حدیث: 3434]