سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم کی اونٹنی ”عضباء“ (دوڑ میں) کبھی پیچھے نہیں رہتی تھی، پھر ایک دیہاتی اپنے ایک جوان اونٹ کے ساتھ آیا اور اس نے مقابلہ کیا تو وہ دیہاتی آگے نکل گیا، یہ بات رسول اللہ صلی اللہ علیہ وسلم کے صحابہ رضی اللہ عنہم پر نہایت شاق گزری، تو آپ صلی اللہ علیہ وسلم نے ارشاد فرمایا: ”اللہ تعالیٰ کا یہ طے شدہ ضابطہ ہے کہ دنیا میں جو چیز بھی رفعت پاتی ہے، اللہ اسے پست بھی فرما دیتا ہے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3345]

بسام بن یزید نے حماد بن سلمہ (رحمہ اللہ) سے اسی کے مانند روایت بیان کی ہے۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3346]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم ہمارے ہاں تشریف لایا کرتے تھے اور میرا ایک چھوٹا بھائی تھا جس کی کنیت ابوعمیر تھی، ایک مرتبہ رسول اللہ صلی اللہ علیہ وسلم ہمارے پاس تشریف لائے تو (اسے غمزدہ دیکھ کر) دریافت فرمایا: «يَا أَبَا عُمَيْرٍ، مَا فَعَلَ النُّغَيْرُ؟» ”اے ابوعمیر! (تمہاری چھوٹی سی چڑیا) نغیر کا کیا ہوا؟“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3347]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے سیدنا عبد الرحمن بن عوف رضی اللہ عنہ پر زردی کے نشانات دیکھے تو دریافت فرمایا: ”یہ کیا ہے؟“ انہوں نے عرض کیا کہ میں نے ایک عورت سے کھجور کی گٹھلی کے وزن کے برابر سونے کے مہر پر نکاح کر لیا ہے، اس پر رسول اللہ صلی اللہ علیہ وسلم نے فرمایا: «بَارِكَ اللَّهُ لَكَ» ”اللہ تعالیٰ تمہیں برکت عطا فرمائے“، پھر آپ صلی اللہ علیہ وسلم نے ان سے فرمایا: ”ولیمہ کرو اگرچہ ایک بکری ہی کے ساتھ ہو۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3348]

سیدنا انس بن مالک رضی اللہ عنہ سے روایت ہے کہ ”میں نے رسول اللہ صلی اللہ علیہ وسلم کو اپنی ازواجِ مطہرات میں سے کسی کے نکاح پر ایسا (بڑا) ولیمہ کرتے ہوئے نہیں دیکھا جیسا کہ آپ صلی اللہ علیہ وسلم نے سیدہ زینب رضی اللہ عنہا کے نکاح پر کیا تھا، کیونکہ اس موقع پر آپ صلی اللہ علیہ وسلم نے باقاعدہ ایک بکری ذبح فرمائی تھی۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3349]

ثابت رحمہ اللہ سے مروی ہے، وہ (بظنِ غالب) سیدنا انس رضی اللہ عنہ سے بیان کرتے ہیں کہ ایک یہودی لڑکا نبی اکرم صلی اللہ علیہ وسلم کی خدمت کیا کرتا تھا، پھر وہ بیمار ہو گیا تو آپ صلی اللہ علیہ وسلم اس کی عیادت کے لیے تشریف لائے جبکہ اس کا باپ اس کے سرہانے بیٹھا ہوا تھا، نبی اکرم صلی اللہ علیہ وسلم نے اسے اسلام کی دعوت دی تو وہ لڑکا (اجازت کے لیے) اپنے باپ کی طرف دیکھنے لگا، اس کے باپ نے اس سے کہا: ”ابوالقاسم ( صلی اللہ علیہ وسلم ) کی اطاعت کرو“، چنانچہ اس نے کہا: ”میں گواہی دیتا ہوں کہ اللہ کے سوا کوئی معبودِ برحق نہیں اور میں گواہی دیتا ہوں کہ محمد ( صلی اللہ علیہ وسلم ) اللہ کے رسول ہیں“، اس کے بعد وہ لڑکا فوت ہو گیا تو رسول اللہ صلی اللہ علیہ وسلم یہ فرماتے ہوئے باہر تشریف لائے: «الْحَمْدُ لِلَّهِ الَّذِي أَنْقَذَهُ بِي مِنَ النَّارِ» ”تمام تعریفیں اس اللہ کے لیے ہیں جس نے اسے میرے ذریعے جہنم کی آگ سے نجات عطا فرمائی۔“ اس حدیث کی سند میں راوی ثابت رحمہ اللہ کو سیدنا انس رضی اللہ عنہ سے اس روایت کی نسبت کے متعلق شک (ظن) لاحق ہوا ہے۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3350]

سیدنا انس رضی اللہ عنہ سے روایت ہے کہ ”نبی کریم صلی اللہ علیہ وسلم نے سیدہ صفیہ رضی اللہ عنہا سے نکاح فرمایا اور ان کی آزادی کو ہی ان کا حقِ مہر مقرر کر دیا۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3351]

سیدنا انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم کے پاس سے ایک جنازہ گزرا تو لوگوں نے اس کے متعلق کلماتِ خیر کہے، جس پر آپ صلی اللہ علیہ وسلم نے ارشاد فرمایا: ”واجب ہوگئی۔“ پھر ایک دوسرا جنازہ گزرا تو لوگوں نے اس کی برائی بیان کی، جس پر آپ صلی اللہ علیہ وسلم نے پھر فرمایا: ”واجب ہوگئی۔“ عرض کیا گیا: اے اللہ کے رسول صلی اللہ علیہ وسلم ! آپ نے اس کے لیے بھی فرمایا: ”واجب ہوگئی“ اور اس کے لیے بھی یہی فرمایا؟ تو آپ صلی اللہ علیہ وسلم نے ارشاد فرمایا: ”(یہ فیصلہ) لوگوں کی گواہی کی بنیاد پر ہے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3352]

سیدنا انس بن مالک رضی اللہ عنہ سے اسی کے مثل مروی ہے، البتہ حماد بن سلمہ رحمہ اللہ نے اس روایت میں ان کلمات کا اضافہ کیا ہے کہ رسول اللہ صلی اللہ علیہ وسلم نے ارشاد فرمایا: ”اور تم زمین میں اللہ کے گواہ ہو۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3353]

سیدنا انس رضی اللہ عنہ سے روایت ہے کہ ایک فارسی نژاد شخص نبی صلی اللہ علیہ وسلم کا پڑوسی تھا جس کے شوربے کی خوشبو نہایت ہی معطر اور عمدہ تھی، اس نے کھانا تیار کیا اور پھر نبی صلی اللہ علیہ وسلم کی دعوت کی، اس وقت سیدہ عائشہ رضی اللہ عنہا آپ صلی اللہ علیہ وسلم کے پہلو میں تشریف فرما تھیں، جب اس شخص نے آپ صلی اللہ علیہ وسلم کو آنے کا اشارہ کیا تو آپ صلی اللہ علیہ وسلم نے سیدہ عائشہ رضی اللہ عنہا کی طرف اشارہ کر کے دریافت فرمایا: ”اور کیا یہ بھی میرے ساتھ ہوں گی؟“ اس نے عرض کیا: نہیں، پھر اس نے دوسری بار آپ صلی اللہ علیہ وسلم کو بلایا تو نبی صلی اللہ علیہ وسلم نے پھر پوچھا: ”اور کیا یہ بھی میرے ساتھ ہوں گی؟“ اس نے دوبارہ کہا: نہیں، پھر جب اس نے تیسری مرتبہ دعوت دی تو نبی صلی اللہ علیہ وسلم نے سیدہ عائشہ رضی اللہ عنہا کی طرف اشارہ کر کے پوچھا تو اس نے کہا: جی ہاں۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 3354]