اللہ تعالیٰ کے اس ارشادِ گرامی کے بیان میں ہے کہ ”اور ان لوگوں کو (اس بات کا) ڈر رکھنا چاہیے کہ اگر وہ اپنے پیچھے ناتواں اور بے بس اولاد چھوڑ جاتے تو ان کے حق میں (کتنے) اندیشہ ناک ہوتے، پس انہیں اللہ سے ڈرنا چاہیے اور بالکل سیدھی اور درست بات کرنی چاہیے۔ یقیناً جو لوگ یتیموں کے مال ظلم و زیادتی کے ساتھ کھاتے ہیں، وہ درحقیقت اپنے پیٹوں میں آگ ہی بھر رہے ہیں اور عنقریب وہ دہکتی ہوئی آگ میں جھونکے جائیں گے۔“

اللہ تعالیٰ کے اس ارشاد کے بیان میں کہ ”اللہ تعالیٰ تمہیں تمہاری اولاد کے حق میں یہ وصیت (حکم) فرماتا ہے کہ ایک لڑکے کا حصہ دو لڑکیوں کے برابر ہے، پھر اگر (صرف) لڑکیاں ہی ہوں جو دو سے زائد ہوں تو ان کے لیے اس ترکے کا دو تہائی حصہ ہے جو میت نے چھوڑا، اور اگر وہ اکیلی ہو تو اس کے لیے نصف (آدھا) ہے، اور میت کے والدین میں سے ہر ایک کے لیے اس کے چھوڑے ہوئے مال کا چھٹا حصہ ہے بشرطیکہ میت کی اولاد ہو، پھر اگر اس کی کوئی اولاد نہ ہو اور اس کے والدین ہی اس کے وارث ہوں تو اس کی ماں کے لیے تہائی حصہ ہے، پھر اگر اس کے بھائی بہن ہوں تو اس کی ماں کے لیے چھٹا حصہ ہے، یہ تقسیم اس وصیت کی تعمیل کے بعد ہوگی جو اس نے کی ہو یا قرض کی ادائیگی کے بعد؛ تمہارے آباء و اجداد ہوں یا تمہاری اولاد، تم نہیں جانتے کہ ان میں سے کون نفع پہنچانے کے اعتبار سے تمہارے زیادہ قریب ہے، یہ اللہ کی طرف سے مقرر کردہ فریضہ ہے، یقیناً اللہ خوب جاننے والا اور بڑی حکمت والا ہے۔ اور تمہارے لیے اس مال کا نصف ہے جو تمہاری بیویاں چھوڑ جائیں اگر ان کی اولاد نہ ہو، پس اگر ان کی اولاد ہو تو تمہارے لیے ان کے ترکے کا چوتھائی حصہ ہے اس وصیت کے بعد جو انہوں نے کی ہو یا قرض کی ادائیگی کے بعد، اور ان عورتوں کے لیے تمہارے ترکے کا چوتھائی حصہ ہے اگر تمہاری اولاد نہ ہو، پس اگر تمہاری اولاد ہو تو ان کے لیے تمہارے ترکے کا آٹھواں حصہ ہے اس وصیت کے بعد جو تم نے کی ہو یا قرض کی ادائیگی کے بعد، اور اگر کوئی مرد یا عورت کلالہ (جس کا نہ باپ ہو نہ اولاد) کی حیثیت سے وارث بنایا جائے اور اس کا ایک بھائی یا ایک بہن ہو تو ان میں سے ہر ایک کے لیے چھٹا حصہ ہے، پھر اگر وہ اس سے زیادہ ہوں تو وہ سب ایک تہائی میں شریک ہوں گے اس وصیت کے بعد جو کی گئی ہو یا قرض کے بعد بشرطیکہ وہ (وصیت یا قرض کے اقرار سے کسی وارث کو) نقصان پہنچانے والا نہ ہو، یہ اللہ کی طرف سے تاکیدی حکم ہے اور اللہ سب کچھ جاننے والا، نہایت بردبار ہے۔“

اللہ تعالیٰ کے اس ارشاد کے بیان میں کہ ”اور تمہاری عورتوں میں سے جو بدکاری کا ارتکاب کریں، ان پر اپنے میں سے چار مردوں کی گواہی طلب کرو، پھر اگر وہ گواہی دے دیں تو ان عورتوں کو گھروں میں بند رکھو یہاں تک کہ موت ان کی زندگی کا وقت پورا کر دے یا اللہ ان کے لیے کوئی اور سبیل پیدا فرما دے۔“

اللہ تعالیٰ کے اس ارشادِ گرامی کے بیان میں ہے کہ ”اور تم میں سے جو دو افراد اس بے حیائی کا ارتکاب کریں تو انہیں ایذا دو، پھر اگر وہ توبہ کر لیں اور اپنی اصلاح کر لیں تو ان سے درگزر کرو، بے شک اللہ توبہ قبول کرنے والا، نہایت رحم فرمانے والا ہے“۔

اللہ تعالیٰ کے اس ارشادِ گرامی کے بیان میں ہے کہ ”توبہ کی قبولیت کا وعدہ تو اللہ کے ذمے محض ان لوگوں کے لیے ہے جو نادانی کی بنا پر برائی کا ارتکاب کر بیٹھتے ہیں، پھر وہ جلد ہی توبہ کر لیتے ہیں، پس یہی وہ لوگ ہیں جن کی توبہ اللہ قبول فرماتا ہے، اور اللہ تعالیٰ ہمیشہ سے سب کچھ جاننے والا اور بڑی حکمت والا ہے“۔

اللہ تعالیٰ کے اس ارشاد کے بیان میں کہ ”اے ایمان والو! تمہارے لیے یہ حلال نہیں کہ تم زبردستی عورتوں کے وارث بن بیٹھو، اور نہ ہی انہیں اس غرض سے تنگ کرو کہ جو کچھ تم نے انہیں دے رکھا ہے اس کا کچھ حصہ ہتھیا لو، سوائے اس صورت کے کہ وہ کھلی بدکاری کا ارتکاب کریں، اور ان کے ساتھ دستور کے مطابق اچھے طریقے سے زندگی بسر کرو، پھر اگر تم انہیں ناپسند کرو تو ہو سکتا ہے کہ تم کسی چیز کو ناپسند کرو اور اللہ تعالیٰ اس میں تمہارے لیے خیرِ کثیر پیدا فرما دے۔“ (19)