اللہ تعالیٰ کے اس ارشادِ گرامی کے بیان میں کہ ”مرد عورتوں پر نگران و محافظ ہیں اس بنا پر کہ اللہ نے ان میں سے بعض کو بعض پر فضیلت عطا فرمائی ہے اور اس وجہ سے کہ انہوں نے اپنے مال خرچ کیے ہیں، پس نیک بیویاں اطاعت شعار ہوتی ہیں اور اللہ کی حفاظت و نگرانی میں (شوہر کی) عدم موجودگی میں (اس کے حقوق و امانت کی) حفاظت کرنے والی ہوتی ہیں، اور جن عورتوں سے تمہیں سرکشی کا اندیشہ ہو تو انہیں نصیحت کرو، اور (اگر وہ نہ مانیں تو) انہیں خواب گاہوں میں تنہا چھوڑ دو، اور (اصلاح کے لیے) انہیں مارو، پھر اگر وہ تمہاری اطاعت کرنے لگیں تو ان پر (ظلم و زیادتی کا) کوئی راستہ تلاش نہ کرو، بے شک اللہ بہت بلند اور بہت بڑا ہے“۔

اللہ تعالیٰ کے اس فرمان کے بیان میں کہ ”اور اگر تمہیں ان دونوں (میاں بیوی) کے درمیان ناچاقی اور پھوٹ پڑ جانے کا اندیشہ ہو تو ایک منصف شوہر کے گھر والوں میں سے اور ایک منصف بیوی کے گھر والوں میں سے مقرر کر کے بھیجو، اگر وہ دونوں (ثالث) اصلاح کا ارادہ رکھیں گے تو اللہ تعالیٰ ان دونوں کے درمیان موافقت پیدا فرما دے گا، بے شک اللہ تعالیٰ دائمی طور پر سب کچھ جاننے والا اور ہر بات سے باخبر ہے“۔

اللہ تعالیٰ کے اس ارشادِ گرامی کے بیان میں کہ ”اور تم اللہ کی بندگی کرو اور اس کے ساتھ کسی چیز کو شریک نہ ٹھہراؤ، اور والدین کے ساتھ احسان کرو، نیز رشتہ داروں، یتیموں، محتاجوں، قرابت دار پڑوسیوں، اجنبی پڑوسیوں، ہم نشین ساتھیوں، مسافروں اور اپنے زیرِ دست مملوکوں کے ساتھ بھی (بھلائی کرو)؛ یقیناً اللہ تعالیٰ اس شخص کو محبوب نہیں رکھتا جو تکبر کرنے والا اور فخر جتانے والا ہو۔“