سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے بنو نجار کے ایک شخص سے ارشاد فرمایا: ”اے ماموں! اسلام قبول کر لیں“، اس شخص نے عرض کی: میں تو اپنے آپ کو اس (اسلام) سے کراہت محسوس کرنے والا پاتا ہوں، آپ صلی اللہ علیہ وسلم نے ارشاد فرمایا: ”(اسلام قبول کر لو) اگرچہ تم اسے ناپسند ہی کیوں نہ کرتے ہو اور خواہ تمہیں اس پر مجبور ہی ہونا پڑے۔“ [مسند أبي يعلى الموصلي/مسند أنس بن مالك/حدیث: 3765]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم جس دن بدر کی جانب روانہ ہوئے تو ”آپ صلی اللہ علیہ وسلم نے لوگوں سے مشورہ طلب فرمایا، یعنی مسلمانوں سے مشاورت فرمائی“، پس سیدنا ابوبکر رضی اللہ عنہ نے آپ صلی اللہ علیہ وسلم کو مشورہ دیا تو ”آپ صلی اللہ علیہ وسلم خاموش رہے، پھر آپ صلی اللہ علیہ وسلم نے دوبارہ مشورہ طلب فرمایا“، اس پر سیدنا عمر رضی اللہ عنہ نے مشورہ دیا، تب انصار کے ایک شخص نے (اپنی قوم کو متوجہ کر کے) کہا کہ آپ صلی اللہ علیہ وسلم کا روئے سخن تو تمہاری ہی جانب ہے، چنانچہ انصار نے عرض کیا: ”اے اللہ کے رسول صلی اللہ علیہ وسلم ! ہم آپ سے وہ بات ہرگز نہیں کہیں گے جو بنی اسرائیل نے کہی تھی کہ ﴿فَاذْهَبْ أَنْتَ وَرَبُّكَ فَقَاتِلَا إِنَّا هَاهُنَا قَاعِدُونَ﴾ یعنی ”پس جائیے آپ اور آپ کا رب اور دونوں قتال کیجیے، ہم تو یہیں بیٹھے رہنے والے ہیں“، بلکہ اللہ کی قسم! اگر آپ اپنی سواریوں کو تیز ہنکاتے ہوئے مقام ’برک الغماد‘ تک بھی لے جائیں گے تو ہم یقیناً آپ کے ساتھ ہوں گے“۔ [مسند أبي يعلى الموصلي/مسند أنس بن مالك/حدیث: 3766]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم اپنی ازواجِ مطہرات کے مابین پیش آنے والے کسی معاملے کی وجہ سے نماز کے لیے تشریف لانے سے رُک گئے، جبکہ وہ ایک دوسرے کو (ترکی بہ ترکی) جواب دے رہی تھیں، تو سیدنا ابوبکر رضی اللہ عنہ کھڑے ہوئے اور پکارنے لگے: «يَا رَسُولَ اللَّهِ، احْثُ فِي أَفْوَاهِهِنَّ وَاخْرُجْ إِلَى الصَّلَاةِ» ”اے اللہ کے رسول! ان کے منہ میں خاک ڈال دیجیے اور نماز کے لیے باہر تشریف لے آئیے۔“ [مسند أبي يعلى الموصلي/مسند أنس بن مالك/حدیث: 3767]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”دجال بائیں آنکھ سے کانا ہوگا اور اس کی دونوں آنکھوں کے درمیان ’کافر‘ لکھا ہوا ہوگا۔“ [مسند أبي يعلى الموصلي/مسند أنس بن مالك/حدیث: 3768]

سیدنا انس رضی اللہ عنہ سے روایت ہے کہ ”نبی کریم صلی اللہ علیہ وسلم سیدہ ام سلیم رضی اللہ عنہا کے ہاں تشریف لایا کرتے اور ان کے بستر پر آرام فرمایا کرتے تھے، آپ صلی اللہ علیہ وسلم گہری نیند سوتے تھے اور آپ صلی اللہ علیہ وسلم کو پسینہ بکثرت آتا تھا، چنانچہ وہ آپ صلی اللہ علیہ وسلم کے پسینہ مبارک کو روئی کے ایک ٹکڑے سے جذب کر لیتیں اور اسے ایک شیشی میں جمع کرتیں، پھر اسے اپنے پاس موجود ایک خاص مرکب خوشبو (سُک) میں شامل کر لیا کرتی تھیں۔“ [مسند أبي يعلى الموصلي/مسند أنس بن مالك/حدیث: 3769]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم ایک روز اس حال میں باہر تشریف لائے کہ آپ صلی اللہ علیہ وسلم نے اپنے سرِ مبارک پر پٹی باندھی ہوئی تھی، پس انصار کے کچھ افراد آپ صلی اللہ علیہ وسلم سے ملے تو آپ صلی اللہ علیہ وسلم نے ارشاد فرمایا: ”اس ذات کی قسم جس کے قبضۂ قدرت میں میری جان ہے! یقیناً میں تم سے محبت کرتا ہوں، بلاشبہ انصار نے وہ (ذمہ داری) پوری کر دی ہے جو ان پر واجب تھی اور اب وہ (حقوق) باقی رہ گئے ہیں جو تمہارے ذمے (ان کے متعلق) ہیں، لہٰذا ان میں سے جو نیکی کرنے والے ہوں ان کی نیکی کو قبول کرو اور ان کے خطا کاروں سے درگزر سے کام لو۔“ [مسند أبي يعلى الموصلي/مسند أنس بن مالك/حدیث: 3770]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”ایک دوسرے سے بغض و عناد نہ رکھو، اور نہ ہی باہم حسد کرو، اور نہ ہی ایک دوسرے سے پیٹھ پھیرو (روگردانی نہ کرو)، بلکہ اے اللہ کے بندو! آپس میں بھائی بھائی بن کر رہو۔“ [مسند أبي يعلى الموصلي/مسند أنس بن مالك/حدیث: 3771]

سیدنا انس رضی اللہ عنہ سے روایت ہے کہ سیدنا ثابت بن قیس رضی اللہ عنہ نے رسول اللہ صلی اللہ علیہ وسلم کی تشریف آوری کے موقع پر خطبہ دیتے ہوئے عرض کیا: ”بلاشبہ ہم آپ کی ان تمام خطرات سے حفاظت کریں گے جن سے ہم اپنی جانوں اور اپنی اولاد کا دفاع کرتے ہیں، تو اے اللہ کے رسول صلی اللہ علیہ وسلم ! (اس جاں نثاری کے صلے میں) ہمارے لیے کیا اجر ہے؟“ آپ صلی اللہ علیہ وسلم نے ارشاد فرمایا: ”تمہارے لیے جنت ہے“، صحابہ کرام رضی اللہ عنہم نے عرض کیا: ”ہم (اس پر) راضی ہیں۔“ [مسند أبي يعلى الموصلي/مسند أنس بن مالك/حدیث: 3772]

سیدنا انس رضی اللہ عنہ سے روایت ہے کہ مہاجرین نبی کریم صلی اللہ علیہ وسلم کی خدمتِ اقدس میں حاضر ہوئے اور عرض گزار ہوئے: ”اے اللہ کے رسول! ہم نے انصار سے بڑھ کر ایسی کوئی قوم نہیں دیکھی جو مال کی فراوانی میں اس قدر زیادہ ایثار کرنے والی ہو اور مال کی تنگی میں اتنی بہترین غم خواری کرنے والی ہو؛ ہم جب سے مدینہ آئے ہیں انہوں نے ہمیں اپنی ہر طرح کی راحت و آسائش میں شریک کر لیا ہے، ہمیں تو یہ اندیشہ لاحق ہے کہ کہیں سارا اجر و ثواب وہی نہ لے جائیں۔“ آپ صلی اللہ علیہ وسلم نے ارشاد فرمایا: ”ایسا نہیں ہے، جب تک تم ان کی خوبیوں کا اعتراف کرتے رہو گے اور ان کے حق میں اللہ سے دعا مانگتے رہو گے۔“ [مسند أبي يعلى الموصلي/مسند أنس بن مالك/حدیث: 3773]

سیدنا انس رضی اللہ عنہ سے روایت ہے کہ نبی اکرم صلی اللہ علیہ وسلم اپنی کسی زوجہ مطہرہ کے ہاں تشریف فرما تھے کہ (آپ صلی اللہ علیہ وسلم کی ایک دوسری زوجہ نے) ایک پیالے میں کچھ کھانا بھیجا، جب وہ خادم کھانا لے کر اس زوجہ کے پاس پہنچا جن کے گھر میں آپ صلی اللہ علیہ وسلم مقیم تھے تو انہوں نے خادم کے ہاتھ پر ضرب لگائی جس سے پیالہ گر کر ٹوٹ گیا، چنانچہ نبی اکرم صلی اللہ علیہ وسلم نے اس پیالے کے ٹکڑوں کو اکٹھا کیا اور اس میں کھانا سمیٹنے لگے اور ساتھ ہی فرمانے لگے: ”تمہاری ماں کو غیرت آ گئی ہے“، پھر جب (اسی گھر والی کا) صحیح پیالہ لایا گیا تو آپ صلی اللہ علیہ وسلم نے اسے لے کر اس زوجہ کی طرف بھجوا دیا جن کا پیالہ ٹوٹ گیا تھا۔ [مسند أبي يعلى الموصلي/مسند أنس بن مالك/حدیث: 3774]