سیدنا انس رضی اللہ عنہ سے روایت ہے کہ ایک رات نبی کریم صلی اللہ علیہ وسلم اپنے حجرہ مبارک میں نماز ادا فرما رہے تھے کہ آپ کے کچھ صحابہ تشریف لائے اور آپ کی اقتدا میں نماز پڑھنے لگے، سیدنا انس رضی اللہ عنہ فرماتے ہیں کہ آپ صلی اللہ علیہ وسلم گھر کے اندر تشریف لے گئے اور پھر باہر آئے اور کئی مرتبہ ایسا کیا جبکہ آپ صلی اللہ علیہ وسلم نماز ہی کی حالت میں تھے، پس جب صبح ہوئی تو صحابہ کرام رضی اللہ عنہم نے عرض کی: ”اے اللہ کے رسول صلی اللہ علیہ وسلم ! ہم نے آپ کے ساتھ نماز پڑھی اور ہماری خواہش تھی کہ آپ نماز کو مزید طویل فرما دیتے“، تو آپ صلی اللہ علیہ وسلم نے ارشاد فرمایا: ”مجھے تمہارے وہاں ہونے کا علم ہو گیا تھا اور میں نے یہ سب جان بوجھ کر ہی کیا تھا“۔ [مسند أبي يعلى الموصلي/مسند أنس بن مالك/حدیث: 3755]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”تم کسی کے عمل پر اس وقت تک رشک یا حیرت کا اظہار نہ کرو جب تک یہ نہ دیکھ لو کہ اس کا خاتمہ کس عمل پر ہوتا ہے، کیونکہ ایک عمل کرنے والا اپنی زندگی کے ایک طویل عرصے تک ایسے نیک عمل کرتا رہتا ہے کہ اگر وہ اسی حالت میں فوت ہو جائے تو جنت میں داخل ہو جائے، مگر پھر وہ بدل جاتا ہے اور برے عمل کرنے لگتا ہے، اور یقیناً ایک بندہ اپنی زندگی کی ایک طویل مدت تک ایسے برے عمل کرتا رہتا ہے کہ اگر وہ اسی حال میں مر جائے تو دوزخ میں چلا جائے، پھر وہ تبدیل ہو جاتا ہے اور نیک عمل کرنے لگتا ہے، اور جب اللہ تعالیٰ کسی بندے کے ساتھ خیر کا ارادہ فرماتا ہے تو موت سے پہلے اسے کام میں لگا لیتا ہے۔“ صحابہ کرام رضی اللہ عنہم نے عرض کیا: ”اے اللہ کے رسول صلی اللہ علیہ وسلم ! اللہ اسے کام میں کیسے لگاتا ہے؟“ آپ صلی اللہ علیہ وسلم نے ارشاد فرمایا: ”وہ اسے موت سے پہلے کسی نیک عمل کی توفیق عطا فرماتا ہے، پھر اسی حالت پر اس کی روح قبض کر لیتا ہے۔“ [مسند أبي يعلى الموصلي/مسند أنس بن مالك/حدیث: 3756]

سیدنا انس رضی اللہ عنہ سے روایت ہے کہ ”نماز کے لیے پکارا گیا (اذان دی گئی) تو جن لوگوں کے گھر مسجد کے قریب تھے وہ چلے گئے اور انہوں نے (وہاں جا کر) وضو کر لیا، جبکہ وہ لوگ (مسجد ہی میں) باقی رہ گئے جن کے مکانات مسجد سے دور تھے، پھر رسول اللہ صلی اللہ علیہ وسلم کی خدمت میں پتھر یا تانبے کا ایک لگن لایا گیا جس میں تھوڑا سا پانی تھا، تو نبی اکرم صلی اللہ علیہ وسلم نے اس برتن کے تنگ ہونے کی وجہ سے اپنی مبارک انگلیاں سمیٹ کر اس میں رکھ دیں، پھر تمام لوگوں نے اسی سے وضو کر لیا“، حمید رحمہ اللہ بیان کرتے ہیں کہ سیدنا انس رضی اللہ عنہ نے فرمایا کہ ”ان لوگوں کی تعداد تقریباً اسی (80) مردوں کے لگ بھگ تھی“۔ [مسند أبي يعلى الموصلي/مسند أنس بن مالك/حدیث: 3757]

حمید رحمہ اللہ بیان کرتے ہیں کہ سیدنا انس رضی اللہ عنہ سے پچھنا لگانے والے کی اجرت کے متعلق سوال کیا گیا تو انہوں نے اسے (صراحتاً) حلال یا حرام قرار دینے کے بجائے یہ واقعہ بیان فرمایا کہ ”رسول اللہ صلی اللہ علیہ وسلم نے خود پچھنا لگوایا تھا، آپ صلی اللہ علیہ وسلم کو سیدنا ابو طیبہ رضی اللہ عنہ نے پچھنا لگایا تو آپ صلی اللہ علیہ وسلم نے انہیں دو صاع غلہ دینے کا حکم فرمایا، اور رسول اللہ صلی اللہ علیہ وسلم نے ان کے مالکان سے بات کی تو انہوں نے ان کے ذمے مقررہ ٹیکس (خراج) میں کمی کر دی۔“ نیز آپ صلی اللہ علیہ وسلم نے ارشاد فرمایا: «خَيْرُ مَا تَدَاوَيْتُمْ بِهِ الْحِجَامَةُ وَالْقُسْطُ الْبَحْرِيِّ، وَلَا تُعَذِّبُوا صِبْيَانَكُمْ بِالْغَمْزِ» ”تمہارے علاج کے بہترین طریقوں میں سے ایک پچھنا لگوانا ہے اور دوسرا قسطِ بحری (ایک طبی لکڑی) کا استعمال ہے، اور (گلے کی بیماری کے علاج کے لیے) اپنے بچوں کے تالو کو انگلی سے دبا کر انہیں تکلیف نہ دیا کرو۔“ [مسند أبي يعلى الموصلي/مسند أنس بن مالك/حدیث: 3758]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ایک ایسے شخص کی عیادت فرمائی جو (شدید کمزوری کی وجہ سے) پر نوچے ہوئے چوزے کی مانند ناتواں ہو گیا تھا، نبی کریم صلی اللہ علیہ وسلم نے اس سے دریافت فرمایا: ”تم اللہ تعالیٰ سے کیا دعا مانگا کرتے تھے اور اس سے کس چیز کا سوال کرتے تھے؟“ اس نے عرض کیا کہ میں یہ کہا کرتا تھا: «اللَّهُمَّ مَا كُنْتَ مُعَاقِبِي فِي الْآخِرَةِ فَعَجِّلْهُ لِي فِي الدُّنْيَا» ”اے اللہ! تو مجھے آخرت میں جو سزا دینے والا ہے، وہ مجھے دنیا ہی میں جلد دے دے“، آپ صلی اللہ علیہ وسلم نے (حیرت و تسبیح کے طور پر) فرمایا: ”سبحان اللہ! کیا تم میں اس کی سکت اور طاقت ہے؟ تم نے یہ کیوں نہ کہا: ﴿رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ﴾ ”اے ہمارے پروردگار! ہمیں دنیا میں بھی بھلائی عطا فرما اور آخرت میں بھی بھلائی عطا فرما اور ہمیں دوزخ کے عذاب سے محفوظ رکھ“۔“ راوی بیان کرتے ہیں کہ پھر اس شخص نے اللہ تعالیٰ سے یہ دعا مانگی تو اللہ نے اسے تندرستی و شفا عطا فرما دی۔ [مسند أبي يعلى الموصلي/مسند أنس بن مالك/حدیث: 3759]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم کے پاس سے ایک جنازہ گزرا تو لوگوں نے اس کی خیر کے ساتھ تعریف کی، یہاں تک کہ پے در پے زبانیں اس کی بھلائی بیان کرنے لگیں، تو رسول اللہ صلی اللہ علیہ وسلم نے ارشاد فرمایا: «وَجَبَتْ» ”واجب ہوگئی“، پھر آپ صلی اللہ علیہ وسلم کے پاس سے ایک دوسرا جنازہ گزرا تو لوگوں نے اس کی برائی بیان کی، تو اس پر بھی رسول اللہ صلی اللہ علیہ وسلم نے ارشاد فرمایا: «وَجَبَتْ» ”واجب ہوگئی“، پھر آپ صلی اللہ علیہ وسلم نے (صحابہ کو مخاطب کرتے ہوئے) فرمایا: «أَنْتُمْ شُهَدَاءُ اللَّهِ فِي الْأَرْضِ» ”تم زمین میں اللہ کے گواہ ہو“۔ [مسند أبي يعلى الموصلي/مسند أنس بن مالك/حدیث: 3760]

سیدنا انس رضی اللہ عنہ سے روایت ہے کہ انہوں نے فرمایا ”میں نے کبھی ایسی کستوری یا عنبر کی خوشبو نہیں سونگھی جو رسول اللہ صلی اللہ علیہ وسلم کی خوشبو سے زیادہ معطر اور پاکیزہ ہو“۔ [مسند أبي يعلى الموصلي/مسند أنس بن مالك/حدیث: 3761]

سیدنا انس بن مالک رضی اللہ عنہ سے روایت ہے کہ انہوں نے بیان فرمایا کہ ”میں نے (اپنی پوری زندگی میں) کبھی کوئی ایسا دبیز یا باریک ریشم نہیں چھوا جو رسول اللہ صلی اللہ علیہ وسلم کی ہتھیلی مبارک سے زیادہ نرم و ملائم ہو۔“ [مسند أبي يعلى الموصلي/مسند أنس بن مالك/حدیث: 3762]

سیدنا انس رضی اللہ عنہ سے روایت ہے کہ ”نبی کریم صلی اللہ علیہ وسلم (جسمانی ساخت کے اعتبار سے) نہ تو بہت زیادہ طویل القامت تھے اور نہ ہی پستہ قد، آپ صلی اللہ علیہ وسلم کے موئے مبارک کانوں کی لو تک پہنچتے تھے اور وہ نہ تو بہت زیادہ گھنگھریالے تھے اور نہ ہی بالکل سپاٹ یا سیدھے تھے۔“ [مسند أبي يعلى الموصلي/مسند أنس بن مالك/حدیث: 3763]

سیدنا انس رضی اللہ عنہ سے روایت ہے کہ ”نبی کریم صلی اللہ علیہ وسلم جب چلتے تھے تو (قوت اور رفتار کے باعث) ایسا معلوم ہوتا تھا گویا آپ صلی اللہ علیہ وسلم آگے کی طرف جھک کر چل رہے ہیں۔“ [مسند أبي يعلى الموصلي/مسند أنس بن مالك/حدیث: 3764]