سیدہ عائشہ رضی اللہ عنہا سے روایت ہے کہ انہوں نے بیان فرمایا کہ ”جب میں رسول اللہ صلی اللہ علیہ وسلم کے سر مبارک میں مانگ نکالنے کا ارادہ کرتی، تو میں آپ صلی اللہ علیہ وسلم کے سر کے وسط سے مانگ نکالا کرتی اور آپ صلی اللہ علیہ وسلم کی زلفوں کے اگلے حصے کو پیچھے کی جانب دونوں مبارک شانوں کے درمیان چھوڑ دیتی تھی۔“ [مسند أبي يعلى الموصلي/مسند عائشة/حدیث: 4577]

سیدہ عائشہ رضی اللہ عنہا سے روایت ہے کہ جب یہ آیتِ کریمہ ﴿وَذَرْنِي وَالْمُكَذِّبِينَ أُولِي النَّعْمَةِ وَمَهِّلْهُمْ قَلِيلًا﴾ یعنی ”اور (اے نبی صلی اللہ علیہ وسلم !) آپ مجھے اور ان جھٹلانے والے صاحبِ ثروت لوگوں کو چھوڑ دیجیے اور انہیں تھوڑی سی مہلت دے دیجیے“ نازل ہوئی، تو آپ رضی اللہ عنہا نے فرمایا: ”اس کے بعد بس تھوڑا ہی عرصہ گزرا تھا کہ غزوۂ بدر کا معرکہ پیش آگیا۔“ [مسند أبي يعلى الموصلي/مسند عائشة/حدیث: 4578]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم بقیع سے واپس تشریف لائے تو میرے پاس داخل ہوئے، اس وقت مجھے سر میں شدید درد محسوس ہو رہا تھا اور میں ”ہائے میرا سر!“ کہہ رہی تھی۔ آپ صلی اللہ علیہ وسلم نے فرمایا: ”اے عائشہ! اللہ کی قسم (تکلیف کی شدت سے) میں بھی یہی کہہ رہا ہوں کہ ہائے میرا سر!“ پھر آپ صلی اللہ علیہ وسلم نے فرمایا: ”تمہارا کیا نقصان ہے اگر تم مجھ سے پہلے وفات پا جاؤ، پھر میں تمہاری تجہیز و تکفین کروں، تم پر نمازِ جنازہ پڑھوں اور تمہیں دفن کروں؟“ میں نے عرض کیا: اللہ کی قسم! میرا خیال ہے اگر آپ ایسا کریں گے تو مجھے دفن کرنے کے بعد فوراً میرے گھر واپس آ کر اپنی کسی اور زوجہ کے ساتھ مصروف ہو جائیں گے۔ سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم یہ سن کر مسکرا دیے۔ پھر آپ صلی اللہ علیہ وسلم کی تکلیف بڑھتی گئی یہاں تک کہ مرض نے شدت اختیار کر لی جبکہ آپ سیدہ میمونہ رضی اللہ عنہا کے گھر میں تھے۔ آپ صلی اللہ علیہ وسلم نے اپنی ازواجِ مطہرات کو بلایا اور ان سے اجازت مانگی کہ آپ کے ایامِ علالت میرے گھر میں گزارنے دیے جائیں، پس انہوں نے اجازت دے دی۔ چنانچہ رسول اللہ صلی اللہ علیہ وسلم اپنے گھر کے دو افراد کے درمیان سہارا لے کر نکلے، جن میں سے ایک سیدنا فضل بن عباس رضی اللہ عنہما تھے اور ایک دوسرے صاحب تھے، ضعف کی وجہ سے آپ صلی اللہ علیہ وسلم کے قدم زمین پر لکیریں ڈال رہے تھے اور آپ صلی اللہ علیہ وسلم نے سر مبارک پر پٹی باندھی ہوئی تھی، یہاں تک کہ آپ میرے گھر تشریف لے آئے۔ عبید اللہ رحمہ اللہ کہتے ہیں کہ میں نے یہ حدیث سیدنا عبد اللہ بن عباس رضی اللہ عنہما کو سنائی تو انہوں نے پوچھا: کیا تم جانتے ہو کہ وہ دوسرے صاحب کون تھے؟ میں نے عرض کیا: نہیں، انہوں نے فرمایا: وہ سیدنا علی رضی اللہ عنہ تھے۔ پھر رسول اللہ صلی اللہ علیہ وسلم پر بے ہوشی طاری ہو گئی اور تکلیف بڑھ گئی، جب افاقہ ہوا تو آپ صلی اللہ علیہ وسلم نے فرمایا: ”مجھ پر مختلف کنوؤں کے سات مشکیزے پانی بہاؤ تاکہ میں لوگوں کے پاس جا کر انہیں وصیت کروں۔“ سیدہ عائشہ رضی اللہ عنہا فرماتی ہیں کہ ہم نے آپ صلی اللہ علیہ وسلم کو سیدہ حفصہ بنت عمر رضی اللہ عنہما کے ایک لگن (ٹب) میں بٹھایا اور آپ پر پانی بہایا یہاں تک کہ آپ صلی اللہ علیہ وسلم اپنے ہاتھ سے اشارہ کرنے لگے کہ ”بس کرو، بس کرو“۔ محمد رحمہ اللہ کہتے ہیں کہ پھر آپ صلی اللہ علیہ وسلم —جیسا کہ ایوب بن بشیر رحمہ اللہ نے مجھے بیان کیا— سر پر پٹی باندھے ہوئے باہر تشریف لائے اور منبر پر جلوہ افروز ہوئے۔ آپ صلی اللہ علیہ وسلم نے سب سے پہلے جو کلام فرمایا وہ یہ تھا کہ آپ صلی اللہ علیہ وسلم نے شہدائے احد کے لیے دعا فرمائی اور کثرت سے ان کے لیے استغفار کیا۔ پھر آپ صلی اللہ علیہ وسلم نے فرمایا: ”اللہ کے بندوں میں سے ایک بندے کو اللہ تعالیٰ نے دنیا اور اس کے ہاں جو (نعمتیں) ہیں، ان کے درمیان اختیار دیا، تو اس نے اس چیز کو پسند کر لیا جو اللہ کے پاس ہے۔“ سیدہ عائشہ رضی اللہ عنہا بیان کرتی ہیں کہ سیدنا ابوبکر رضی اللہ عنہ یہ بات سمجھ گئے اور رونے لگے، وہ جان گئے تھے کہ رسول اللہ صلی اللہ علیہ وسلم اپنی ہی ذاتِ مبارک مراد لے رہے ہیں۔ آپ صلی اللہ علیہ وسلم نے فرمایا: ”اے ابوبکر! ذرا ٹھہرو۔ تم لوگ دیکھو، مسجد میں کھلنے والے یہ تمام دروازے بند کر دو سوائے ابوبکر رضی اللہ عنہ کے گھر کے دروازے کے، کیونکہ میں اپنے صحابہ میں رفاقت و صحبت کے اعتبار سے ابوبکر سے زیادہ فضیلت والا کسی کو نہیں جانتا۔“ [مسند أبي يعلى الموصلي/مسند عائشة/حدیث: 4579]

معاذہ رحمہا اللہ سے روایت ہے کہ ایک خاتون نے سیدہ عائشہ رضی اللہ عنہا سے رسول اللہ صلی اللہ علیہ وسلم کے صومِ وصال (بغیر افطار کیے مسلسل روزے رکھنے) کے متعلق دریافت کیا تو انہوں نے فرمایا: ”کیا تم ویسا عمل کر سکتی ہو جیسا رسول اللہ صلی اللہ علیہ وسلم کرتے تھے؟ حالانکہ آپ صلی اللہ علیہ وسلم کے تو اگلے اور پچھلے تمام گناہ معاف کر دیے گئے تھے اور آپ صلی اللہ علیہ وسلم کا عمل محض نفل (اضافی) تھا؟“ پھر سیدہ عائشہ رضی اللہ عنہا نے فرمایا: ”بہر حال میں نے تو اللہ کی قسم! کبھی رات کو (وصال کرتے ہوئے) روزہ نہیں رکھا کیونکہ اللہ تعالیٰ کا ارشاد ہے: ﴿ثُمَّ أَتِمُّوا الصِّيَامَ إِلَى اللَّيْلِ﴾ ”پھر روزوں کو رات تک پورا کرو“۔“ [مسند أبي يعلى الموصلي/مسند عائشة/حدیث: 4580]

معاذہ رحمہا اللہ سے روایت ہے کہ ایک عورت نے سیدہ عائشہ رضی اللہ عنہا سے دریافت کیا: ”کیا رسول اللہ صلی اللہ علیہ وسلم ہر ماہ تین دن کے روزے رکھا کرتے تھے؟“ انہوں نے جواب دیا: ”ہاں۔“ میں نے (یعنی معاذہ نے) پوچھا: ”آپ صلی اللہ علیہ وسلم مہینے کے کن ایام میں روزے رکھا کرتے تھے؟“ تو سیدہ عائشہ رضی اللہ عنہا نے فرمایا: ”آپ صلی اللہ علیہ وسلم اس بات کی کوئی پروا نہیں فرماتے تھے کہ مہینے کے کن ایام میں روزے رکھ رہے ہیں۔“ [مسند أبي يعلى الموصلي/مسند عائشة/حدیث: 4581]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم کو یمن کی تیار کردہ ایک دھاری دار چادر (حِبرہ) میں لپیٹا گیا، پھر اسے آپ صلی اللہ علیہ وسلم کے جسدِ اطہر سے ہٹا لیا گیا“، القاسم بن محمد رحمہ اللہ بیان کرتے ہیں کہ ”یقیناً اس چادر کے بقایا جات ہمارے پاس (آج بھی) محفوظ ہیں“۔ [مسند أبي يعلى الموصلي/مسند عائشة/حدیث: 4582]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”کسی مسلمان کے لیے یہ جائز نہیں کہ وہ اپنے کسی مسلمان بھائی سے تین دن سے زیادہ قطع تعلقی کرے، پھر جب وہ اس سے ملے اور اسے تین مرتبہ سلام کرے اور وہ شخص ہر بار سلام کا جواب نہ دے، تو یقیناً وہ (جواب نہ دینے والا) اپنے گناہ کے ساتھ ساتھ اس (سلام کرنے والے) کے گناہ کا بوجھ بھی سمیٹ کر لوٹا۔“ [مسند أبي يعلى الموصلي/مسند عائشة/حدیث: 4583]

سیدہ عائشہ رضی اللہ عنہا سے روایت ہے کہ انہوں نے فرمایا: ”رسول اللہ صلی اللہ علیہ وسلم کا آخری کلام وہ کلمہ تھا جو میں نے آپ صلی اللہ علیہ وسلم سے سنا جب کہ آپ صلی اللہ علیہ وسلم فرما رہے تھے: «بَلِ الرَّفِيقَ الْأَعْلَى مِنَ الْجَنَّةِ» ”بلکہ (مجھے) جنت کے بلند ترین رفیق کی رفاقت (مطلوب ہے)“۔“ سیدہ عائشہ رضی اللہ عنہا فرماتی ہیں کہ ”تب میں نے (دل میں) کہا: اس صورت میں اللہ کی قسم! اب آپ صلی اللہ علیہ وسلم ہمیں (اپنے پاس رہنے کے لیے) منتخب نہیں فرمائیں گے، اور میں وہ بات سمجھ گئی جو آپ صلی اللہ علیہ وسلم ہم سے فرمایا کرتے تھے کہ ”اللہ کے کسی نبی کی روح اس وقت تک قبض نہیں کی جاتی جب تک اسے (دنیا میں رہنے یا رفیقِ اعلیٰ سے ملنے کا) اختیار نہ دے دیا جائے“۔“ [مسند أبي يعلى الموصلي/مسند عائشة/حدیث: 4584]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم مسجد سے واپس تشریف لائے اور اسی دن جب آپ صلی اللہ علیہ وسلم مسجد سے گھر داخل ہوئے تو میرے حجرے میں لیٹ گئے، اسی دوران سیدنا ابوبکر رضی اللہ عنہ کے خاندان کا ایک شخص میرے پاس آیا جس کے ہاتھ میں ایک تازہ سبز مسواک تھی، سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم نے اس شخص کے ہاتھ میں موجود مسواک کی طرف اس طرح دیکھا کہ میں جان گئی کہ آپ صلی اللہ علیہ وسلم اسے استعمال کرنا چاہتے ہیں، چنانچہ میں نے عرض کی: ”یا رسول اللہ! کیا آپ چاہتے ہیں کہ میں یہ مسواک آپ کو دے دوں؟“ آپ صلی اللہ علیہ وسلم نے فرمایا: ”ہاں“، پس میں نے وہ مسواک لے کر اسے اپنے دانتوں سے چبایا یہاں تک کہ اسے نرم کر دیا اور پھر وہ آپ صلی اللہ علیہ وسلم کو دے دی، سیدہ عائشہ رضی اللہ عنہا فرماتی ہیں کہ آپ صلی اللہ علیہ وسلم نے اس کے ساتھ اتنے خوبصورت انداز میں مسواک فرمائی کہ میں نے اس سے قبل آپ صلی اللہ علیہ وسلم کو کبھی اتنے اچھے طریقے سے مسواک کرتے نہیں دیکھا تھا، پھر آپ صلی اللہ علیہ وسلم نے اسے رکھ دیا اور میں نے محسوس کیا کہ رسول اللہ صلی اللہ علیہ وسلم کا بوجھ میری گود میں بڑھ رہا ہے، میں نے آپ صلی اللہ علیہ وسلم کے چہرہ مبارک کی طرف دیکھنا شروع کیا تو آپ صلی اللہ علیہ وسلم کی آنکھیں اوپر کی جانب جمی ہوئی تھیں اور آپ صلی اللہ علیہ وسلم فرما رہے تھے: «بَلِ الرَّفِيقَ الْأَعْلَى مِنَ الْجَنَّةِ» ”بلکہ (میں) جنت کے سب سے بلند رفیق (اللہ تعالی) کو ہی پسند کرتا ہوں“، سیدہ عائشہ رضی اللہ عنہا فرماتی ہیں کہ میں نے (اپنے دل میں) کہا: ”آپ صلی اللہ علیہ وسلم کو (بقا یا لقا کا) اختیار دیا گیا تو آپ صلی اللہ علیہ وسلم نے (آخرت کو) منتخب فرما لیا، اس ذات کی قسم جس نے آپ صلی اللہ علیہ وسلم کو حق دے کر بھیجا!“ اور پھر رسول اللہ صلی اللہ علیہ وسلم کی روح مبارک قبض کر لی گئی۔ [مسند أبي يعلى الموصلي/مسند عائشة/حدیث: 4585]

سیدہ عائشہ رضی اللہ عنہا سے روایت ہے کہ انہوں نے فرمایا: ”رسول اللہ صلی اللہ علیہ وسلم کی وفات میرے سینے اور گلے کے درمیان ہوئی، اور میرے ہی گھر میں ہوئی جس میں میں نے کسی کی حق تلفی نہیں کی۔ یہ میری نادانی اور کم عمری ہی تھی کہ رسول اللہ صلی اللہ علیہ وسلم کی روحِ مبارک اس حال میں قبض کی گئی کہ آپ صلی اللہ علیہ وسلم میری گود میں تھے، پھر میں نے آپ صلی اللہ علیہ وسلم کا سرِ مبارک ایک تکیے پر رکھ دیا اور میں دیگر عورتوں کے ساتھ مل کر سینہ کوبی کرنے اور اپنے چہرے کو پیٹنے لگی۔“ [مسند أبي يعلى الموصلي/مسند عائشة/حدیث: 4586]