سیدنا جابر بن سمرہ رضی اللہ عنہ سے روایت ہے کہ ایک نوجوان نبی کریم صلی اللہ علیہ وسلم کی خدمت کیا کرتا تھا اور آپ صلی اللہ علیہ وسلم کے کاموں میں بڑی چستی اور پھرتی دکھاتا تھا۔ آپ صلی اللہ علیہ وسلم نے اس سے فرمایا: ”مجھ سے کوئی حاجت مانگ لو۔“ اس نے عرض کیا: ”میرے لیے جنت کی دعا فرما دیجیے۔“ راوی کہتے ہیں کہ آپ صلی اللہ علیہ وسلم نے سر اٹھایا اور ایک گہری سانس لی، پھر فرمایا: ”ٹھیک ہے، لیکن کثرتِ سجود کے ذریعے سے میری مدد کرو۔“ [المعجم الأوسط/باب الألف/حدیث: 2488]

اسی سند سے مروی ہے کہ رسول اللہ صلی اللہ علیہ وسلم نے فرمایا: ”جس نے تین (بچوں) کو دفن کیا، پھر ان پر صبر کیا اور اللہ سے اجر کی امید رکھی، اس کے لیے جنت واجب ہو گئی۔“ تو سیدہ ام ایمن رضی اللہ عنہا نے عرض کیا: ”یا دو (بچوں) پر؟“ آپ صلی اللہ علیہ وسلم نے فرمایا: ”جس نے دو کو دفن کیا، پھر ان پر صبر کیا اور اجر کی امید رکھی، اس کے لیے جنت واجب ہو گئی۔“ سیدہ ام ایمن رضی اللہ عنہا نے عرض کیا: ”اور ایک پر؟“ آپ صلی اللہ علیہ وسلم خاموش رہے اور رک گئے، پھر فرمایا: ”اے ام ایمن! جس نے ایک کو دفن کیا، پھر اس پر صبر کیا اور اجر کی امید رکھی، اس کے لیے جنت واجب ہو گئی۔“
امام طبرانی رحمہ اللہ فرماتے ہیں: ”سماک سے ان دونوں حدیثوں کو صرف ناصح نے روایت کیا ہے۔“ [المعجم الأوسط/باب الألف/حدیث: 2489]

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم غلہ بیچنے والوں کے پاس سے گزرے تو آپ صلی اللہ علیہ وسلم نے عمدہ غلہ دیکھا، آپ صلی اللہ علیہ وسلم نے اس میں اپنا ہاتھ ڈالا تو اس کے نیچے ناقص غلہ نکلا۔ آپ صلی اللہ علیہ وسلم نے فرمایا: ”اسے الگ بیچو اور اسے الگ بیچو، جس نے ہمیں دھوکا دیا وہ ہم میں سے نہیں۔“
امام طبرانی رحمہ اللہ فرماتے ہیں: ”نافع سے یہ حدیث صرف ابو معشر نے روایت کی ہے۔“ [المعجم الأوسط/باب الألف/حدیث: 2490]

سیدنا ابو قتادہ رضی اللہ عنہ سے روایت ہے کہ ایک جنازہ لایا گیا تو رسول اللہ صلی اللہ علیہ وسلم نے پوچھا: ”کیا تمہارے ساتھی پر قرض ہے؟“ لوگوں نے عرض کیا: جی ہاں۔ تو رسول اللہ صلی اللہ علیہ وسلم نے فرمایا: ”اپنے ساتھی کی نماز جنازہ پڑھ لو۔“ اس پر ایک آدمی نے کہا: اس کا قرض میرے ذمے ہے۔ چنانچہ رسول اللہ صلی اللہ علیہ وسلم نے اس کی نماز جنازہ پڑھائی۔
امام طبرانی رحمہ اللہ فرماتے ہیں: ”اس حدیث کو ابو النضر سے عبداللہ بن عمر کے سوا کسی نے روایت نہیں کیا۔“ [المعجم الأوسط/باب الألف/حدیث: 2491]

سیدنا جابر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”تقویٰ کے سرچشموں میں سے یہ ہے کہ جو کچھ تم جان چکے ہو اس کے ساتھ وہ بھی سیکھتے رہو جو ابھی نہیں جانتے، اور جو کچھ تم جان چکے ہو اس میں کوتاہی یہ ہے کہ اس میں اضافہ کم ہو۔ آدمی کو نامعلوم علم سے بے رغبت اسی بات سے کیا جاتا ہے کہ جو علم وہ حاصل کر چکا ہے اس سے فائدہ کم اٹھاتا ہے۔“
امام طبرانی رحمہ اللہ فرماتے ہیں: ”اس حدیث کو ابو الزبیر سے یاسین کے سوا کسی نے روایت نہیں کیا۔“ [المعجم الأوسط/باب الألف/حدیث: 2492]

سیدنا عبداللہ بن عمر رضی اللہ عنہما بیان کرتے ہیں کہ میں نے رسول اللہ صلی اللہ علیہ وسلم کو فرماتے سنا: ”جب تم بہت زیادہ تعریف کرنے والوں (خوشامدیوں) کو دیکھو تو ان کے چہروں پر مٹی ڈال دو۔“
امام طبرانی رحمہ اللہ فرماتے ہیں: ”اس حدیث کو عطاء سے علی بن حکم کے سوا کسی نے روایت نہیں کیا، اور اس میں حماد منفرد ہیں۔“ [المعجم الأوسط/باب الألف/حدیث: 2493]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”قدریہ اس امت کے مجوسی ہیں، اگر وہ بیمار ہو جائیں تو ان کی عیادت نہ کرو اور اگر مر جائیں تو ان کے جنازے میں شریک نہ ہو۔“
امام طبرانی رحمہ اللہ فرماتے ہیں: ”اس حدیث کو ابو حازم سے زکریا کے سوا کسی نے روایت نہیں کیا۔“ [المعجم الأوسط/باب الألف/حدیث: 2494]

سیدنا جابر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”سوتے وقت اثمد (سرمہ) لگایا کرو، کیونکہ یہ بال اگاتا ہے اور بینائی کو روشن کرتا ہے۔“
امام طبرانی رحمہ اللہ فرماتے ہیں: ”اس حدیث کو ابو بکر سے مسلم کے سوا کسی نے روایت نہیں کیا۔“ [المعجم الأوسط/باب الألف/حدیث: 2495]

سیدنا زید بن خالد جہنی رضی اللہ عنہ سے روایت ہے کہ ایک آدمی نے نبی کریم صلی اللہ علیہ وسلم سے لقطہ (گری پڑی چیز) کے بارے میں پوچھا تو آپ صلی اللہ علیہ وسلم نے فرمایا: ”اس کا برتن اور اس کا بندھن (تسمہ) پہچان کر یاد رکھ لو، پھر ایک سال تک اس کا اعلان کرتے رہو، اگر اس کا مالک آ جائے اور اس کی تعداد اور بندھن کی صحیح پہچان بتا دے تو وہ اسے دے دو، وگرنہ وہ تمہاری ہے۔“
امام طبرانی رحمہ اللہ فرماتے ہیں: ”اس حدیث کو یحییٰ بن سعید سے حماد کے سوا کسی نے روایت نہیں کیا۔“ [المعجم الأوسط/باب الألف/حدیث: 2496]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بندہ اس وقت تک خیر پر رہتا ہے جب تک وہ جلد بازی نہیں کرتا۔“ عرض کیا گیا: ”اے اللہ کے رسول! وہ جلد بازی کیسے کرتا ہے؟“ آپ صلی اللہ علیہ وسلم نے فرمایا: ”وہ کہتا ہے: میں نے دعا کی مگر میری دعا قبول نہیں ہوئی۔“
امام طبرانی رحمہ اللہ فرماتے ہیں: ”اس حدیث کو قتادہ سے ابوہلال کے سوا کسی نے روایت نہیں کیا۔“ [المعجم الأوسط/باب الألف/حدیث: 2497]