حضرت سفیان رحمہ اللہ سے مروی ہے کہ کوئی آدمی اس وقت تک فقیہ نہیں شمار کیا جاسکتا کہ جب تک وہ مصیبت کو نعمت اور کشادگی کو مصیبت نہ سمجھنے لگے۔ [مصنف ابن ابي شيبه/كتاب الزهد/حدیث: 38410]

حضرت سفیان رحمہ اللہ فرماتے ہیں کہ لوگوں کو یہ بات عجیب محسوس ہوتی تھی کہ وہ اپنے نفسوں کو خوش کریں۔ [مصنف ابن ابي شيبه/كتاب الزهد/حدیث: 38411]

حضرت مالک بن دینار رحمہ اللہ فرماتے ہیں کہ جس دل میں کوئی غم نہ ہو وہ ویران گھر کی طرح ہے۔ [مصنف ابن ابي شيبه/كتاب الزهد/حدیث: 38412]

بدیل بن میسرہ عقیلی یا مطر الوراق رحمہ اللہ فرماتے ہیں کہ جس شخص نے رب کو پہچان لیا وہ اس سے محبت کرنے لگا اور جو شخص دنیا کو دل کی آنکھ سے دیکھ لیتا ہے وہ اس میں زہد اختیار کرلیتا ہے اور مومن جب تک بےکار کام میں نہ لگے غافل نہیں ہوتا۔ جب وہ سوچتا ہے تو غمگین ہوتا ہے۔ [مصنف ابن ابي شيبه/كتاب الزهد/حدیث: 38413]

حضرت حصین رحمہ اللہ فرماتے ہیں کہ جو شخص کسی یتیم سے مال چھین کر کسی محتاج کو پہناتا ہے اس کی مثال اس شخض کی سی ہے جو حرام طریقہ سے کماتا ہے اور حرام جگہ پر خرچ کرتا ہے۔ [مصنف ابن ابي شيبه/كتاب الزهد/حدیث: 38414]

حضرت عمرو بن قیس رحمہ اللہ فرماتے ہیں کہ اللہ تعالیٰ زمین پر بسنے والوں کے حق میں عذاب کا حکم کرتے ہیں تو فرشتے کہتے ہیں کہ اے اللہ! ان میں تو بچے بھی ہیں۔ [مصنف ابن ابي شيبه/كتاب الزهد/حدیث: 38415]

حضرت ثابت رضی اللہ عنہ فرماتے ہیں کہ جب بھی کوئی آدمی موت کو کثرت سے یاد کرتا ہے تو یہ بات اس کے عمل میں ہی نظر آجاتی ہے۔ [مصنف ابن ابي شيبه/كتاب الزهد/حدیث: 38416]

حضرت ثابت رضی اللہ عنہ دعا کیا کرتے تھے کہ اے اللہ اگر کسی کو قبر میں نماز کی اجازت ہو تو مجھے میری قبر میں نماز کی اجازت دے دے۔ [مصنف ابن ابي شيبه/كتاب الزهد/حدیث: 38417]

حضرت حمید رحمہ اللہ فرماتے ہیں کہ ہم انس رضی اللہ عنہ کے پاس آیا کرتے تھے اور ہمارے ساتھ ثابت بھی ہوتے تھے۔ جب بھی وہ کسی مسجد سے گزرتے اس میں نماز پڑھتے۔ ہم انس رضی اللہ عنہ کے پاس آتے تو وہ پوچھتے تھے کہ ثابت کہاں ہیں؟ ثابت کہاں ہیں؟ ثابت کہاں ہیں؟ وہ ایسے شخص ہیں کہ جن سے میں محبت کرتا ہوں۔ [مصنف ابن ابي شيبه/كتاب الزهد/حدیث: 38418]

حضرت حماد اپنے والد سے نقل کرتے ہیں کہ انس رضی اللہ عنہ کا ارشاد ہے (لیکن انہوں نے یہ نہیں کہا کہ میں بھی پاس تھا) کہ ہر چیز کی ایک چابی ہے اور ثابت بھلائی کی چابی ہے۔ [مصنف ابن ابي شيبه/كتاب الزهد/حدیث: 38419]