حضرت ابن عمر رضی اللہ عنہما سے روایت ہے کہ رسول اللہ صلی اللہ علیہ وآلہ وسلم نے اہل طائف کا محاصرہ کیا لیکن آپ صلی اللہ علیہ وآلہ وسلم کے ہاتھ ان میں سے کوئی بھی نہیں آیا تو آپ صلی اللہ علیہ وآلہ وسلم نے فرمایا: ہم کل واپس چلے جائیں گے۔ مسلمانوں نے عرض کیا۔ ہم واپس لوٹ جائیں گے حالانکہ ہم نے اس کو فتح نہیں کیا۔ اس پر جناب نبی کریم صلی اللہ علیہ وآلہ وسلم نے ارشاد فرمایا: (چلو) صبح بھی لڑائی کرلو۔ چناچہ صحابہ نے صبح قتال کیا تو انہی کو زخم پہنچ گئے۔ پھر رسول اللہ صلی اللہ علیہ وآلہ وسلم نے ارشاد فرمایا: ہم کل واپس روانہ ہوجائیں گے۔ تو یہ بات صحابہ کرام کو پسندآئی۔ اس پر آپ صلی اللہ علیہ وآلہ وسلم مسکرا دیئے۔ [مصنف ابن ابي شيبه/كتاب المغازي/حدیث: 39725]

حضرت عبد الرحمان بن عوف روایت بیان کرتے ہیں کہ جب رسول اللہ صلی اللہ علیہ وآلہ وسلم نے مکہ کو فتح کرلیا تو آپ صلی اللہ علیہ وآلہ وسلم طائف کی طرف چل پڑے اور آپ صلی اللہ علیہ وآلہ وسلم نے طائف والوں کا اٹھارہ یا انیس (دن) محاصرہ کیا لیکن طائف کو فتح نہ کرسکے پھر آپ صلی اللہ علیہ وآلہ وسلم ایک صبح یا ایک شام محاصرہ کو شدید کیا۔ پھر آپ صلی اللہ علیہ وآلہ وسلم نے پڑاؤ ڈالا آپ صلی اللہ علیہ وآلہ وسلم دوپہر کے وقت (ہی) چل پڑے اور آپ صلی اللہ علیہ وآلہ وسلم نے ارشاد فرمایا: اے لوگو! میں تم سے پہلے (آگے) پہنچنے والا ہوں لہٰذا میں تمہیں اپنی عزت کے ساتھ خیر کی وصیت کرتا ہوں۔ اور یقین جانو کہ تمہارے ساتھ میرے وعدہ کی جگہ حوض ہے۔ قسم اس ذات کی جس کے قبضہ مں ے میری جان ہے تم لوگ نماز کو ضرور بالضرور قائم کرتے رہنا اور زکوۃ کو ضرور بالضرور ادا کرتے رہنا یا میں تمہاری طرف اپنے میں سے ایک اپنی طرح کا ایک آدمی بھیج دوں گا۔ جو اُن (اہل ایمان) سے لڑنے والوں کی گردنیں مارے گا اور ان کے افراد کو قیدی بنا لائے گا۔ راوی کہتے ہیں: لوگوں کا خیال یہ ہوا کہ یہ آدمی حضرت ابوبکر ہوں گے یا حضرت عمر ہوں گے۔ لیکن جناب نبی کریم صلی اللہ علیہ وآلہ وسلم نے حضرت علی رضی اللہ عنہ کا ہاتھ پکڑا اور ارشاد فرمایا: وہ آدمی یہ ہے۔ [مصنف ابن ابي شيبه/كتاب المغازي/حدیث: 39726]

حضرت ابو الزبیر سے روایت ہے کہ رسول اللہ صلی اللہ علیہ وآلہ وسلم نے اہل طائف کا محاصرہ کیا۔ پھر آپ صلی اللہ علیہ وآلہ وسلم کے پاس آپ صلی اللہ علیہ وآلہ وسلم کے صحابہ حاضر ہوئے اور عرض کیا۔ یا رسول اللہ صلی اللہ علیہ وآلہ وسلم! ہمیں تو بنو ثقیف کے نیزوں نے جلا ڈالا ہے لہٰذا آپ اللہ تعالیٰ سے ان کے خلاف بد دعا کریں۔ آپ صلی اللہ علیہ وآلہ وسلم نے فرمایا: اے اللہ! بنو ثقیف کو ہدایت دے۔ دو مرتبہ فرمایا۔ راوی کہتے ہیں: پھر آپ صلی اللہ علیہ وآلہ وسلم کی خدمت میں حضرت خولہ حاضر ہوئیں اور عرض کیا۔ مجھے خبر ملی ہے کہ خزاعہ کی بیٹی بہت زیورات والی ہے۔ لہٰذا اگر اللہ تعالیٰ کل آپ کو طائف فتح کروا دیں تو آپ اس کے زیورات مجھے ہدیہ فرما دیجئے گا۔ آپ صلی اللہ علیہ وآلہ وسلم نے ارشاد فرمایا: اگر اللہ تعالیٰ نے ہمیں ان سے لڑائی کی جازت ہی نہ دی ہو؟ اس پر ایک آدمی نے … ہمارے خیال میں حضرت عمر تھے … کہا … یا رسول اللہ صلی اللہ علیہ وآلہ وسلم! جس قوم کے بارے میں آپ کو لڑائی کی اجازت نہیں دی گئی اس پر آپ نے پڑاؤ کیوں ڈالا ہوا ہے؟ راوی کہتے ہیں: پھر آپ صلی اللہ علیہ وآلہ وسلم نے لوگوں کو کوچ کرنے کا حکم دیا اور آپ صلی اللہ علیہ وآلہ وسلم (آ کر) مقام جعرانہ میں اترے اور وہاں آپ صلی اللہ علیہ وآلہ وسلم نے حنین کی غنیمتوں کو تقسیم فرمایا پھر آپ صلی اللہ علیہ وآلہ وسلم وہیں سے عمرہ کے لئے داخل ہوگئے پھر (عمرہ کے بعد) مدینہ منورہ چلے گئے۔ [مصنف ابن ابي شيبه/كتاب المغازي/حدیث: 39727]

حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وآلہ وسلم نے طائف کے دن، مشرکین کے غلاموں میں سے جو کوئی بھی آپ صلی اللہ علیہ وآلہ وسلم کی طرف آیا آپ صلی اللہ علیہ وآلہ وسلم نے اس کو آزاد فرما دیا۔ [مصنف ابن ابي شيبه/كتاب المغازي/حدیث: 39728]

حضرت ابن عباس رضی اللہ عنہما سے روایت ہے کہ جناب نبی کریم صلی اللہ علیہ وآلہ وسلم کی طرف دو غلام طائف کے دن نکل کر آئے تھے اور آپ صلی اللہ علیہ وآلہ وسلم نے ان دونوں کو آزاد فرما دیا تھا۔ ان میں سے ایک ابو بکرہ تھے۔ چناچہ یہ دونوں آپ صلی اللہ علیہ وآلہ وسلم کے موالی (آزاد کردہ) تھے۔ [مصنف ابن ابي شيبه/كتاب المغازي/حدیث: 39729]

حضرت عبد اللہ بن شقیق بیان کرتے ہیں کہ آپ صلی اللہ علیہ وآلہ وسلم نے وادی قُریٰ کا محاصرہ فرمایا۔ [مصنف ابن ابي شيبه/كتاب المغازي/حدیث: 39730]

حضرت عبد اللہ بن سنان سے روایت ہے کہ نبی کریم صلی اللہ علیہ وآلہ وسلم نے اہل طائف کا پچیس دن تک محاصرہ فرمایا اور آپ صلی اللہ علیہ وآلہ وسلم نے ان کے خلاف ہر نماز کے بعد بد دعا فرمائی۔ [مصنف ابن ابي شيبه/كتاب المغازي/حدیث: 39731]

حضرت عبد اللہ بن معیہ بیان کرتے ہیں کہ طائف کے دن دو افراد زخمی ہوگئے۔ راوی کہتے ہیں: انہیں رسول اللہ صلی اللہ علیہ وآلہ وسلم کی خدمت میں لایا گیا۔ اور آپ صلی اللہ علیہ وآلہ وسلم کو ان کے بارے میں بتایا گیا تو آپ صلی اللہ علیہ وآلہ وسلم نے ان کے بارے میں یہ حکم دیا کہ جہاں پر یہ پائے گئے اور قتل ہوئے وہیں پر ان کو دفن کیا جائے۔ [مصنف ابن ابي شيبه/كتاب المغازي/حدیث: 39732]

حضرت ابوبکر بن ابی زہیر ثقفی اپنے والد سے روایت کرتے ہیں کہ انہوں نے نبی کریم صلی اللہ علیہ وآلہ وسلم کو مقام نَبَاۃَ یا مقام نَبَاوَۃ میں … نباوہ طائف کا حصہ ہے۔ خطبہ ارشاد فرماتے ہوئے سنا کہ آپ صلی اللہ علیہ وآلہ وسلم اپنے خطبہ میں فرما رہے تھے۔ ”قریب ہے کہ تم اہل جنت کو اہل جہنم سے (جدا) پہچان لو۔ اور اپنے بہتر لوگوں کو بدتر لوگوں سے (جدا) پہچان لو۔“ لوگوں نے عرض کیا۔ یا رسول اللہ صلی اللہ علیہ وآلہ وسلم! کس ذریعہ سے؟ آپ صلی اللہ علیہ وآلہ وسلم نے فرمایا۔ ”اچھی تعریف کے ذریعہ سے اور بُری تعریف کے ذریعہ سے، تم لوگ زمین میں خدا کے گواہ ہو۔“ [مصنف ابن ابي شيبه/كتاب المغازي/حدیث: 39733]

حضرت عبد الملک بیان کرتے ہیں کہ نبی کریم صلی اللہ علیہ وآلہ وسلم نے جب بنو ثقیف کا محاصرہ کیا ہوا تھا تب آپ صلی اللہ علیہ وآلہ وسلم نے فرمایا: جب سے میں نے اس جگہ پڑاؤ کیا ہے تب سے میں نے فرشتہ نہیں دیکھا۔ راوی کہتے ہیں: (یہ بات سن کر) حضرت خولہ بنت حکیم سلیمہ چل پڑیں اور انہوں نے یہ بات حضرت عمر کو بیان فرمائی۔ حضرت عمر نبی کریم صلی اللہ علیہ وآلہ وسلم کی خدمت میں حاضر ہوئے اور آپ صلی اللہ علیہ وآلہ وسلم سے خولہ کی بات بیان کی تو آپ صلی اللہ علیہ وآلہ وسلم نے ارشاد فرمایا: خولہ سچ کہتی ہیں۔ پھر حضرت عمر نے آپ صلی اللہ علیہ وآلہ وسلم کو کوچ کرنے کا اشارہ کیا چناچہ آپ صلی اللہ علیہ وآلہ وسلم نے کوچ فرما لیا۔ [مصنف ابن ابي شيبه/كتاب المغازي/حدیث: 39734]