سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے سیدنا براء بن عازب رضی اللہ عنہ سے پوچھا: ”اے براء! تمہارا اپنے اہل و عیال پر خرچ کیسا ہے؟“ -راوی کہتے ہیں کہ وہ اپنے گھر والوں پر وسعت کے ساتھ خرچ کرتے تھے- تو آپ صلی اللہ علیہ وسلم نے فرمایا: ”تمہارا اپنے اہل و عیال، اپنی اولاد اور اپنے خادم پر خرچ کرنا صدقہ ہے، پس اس کے پیچھے احسان جتلانے اور تکلیف دینے (جیسے افعال) نہ لانا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3155]

سیدنا عبداللہ بن عباس رضی اللہ عنہما سے روایت ہے کہ وہ اس لفظ ﴿بِرِبْوَةٍ﴾ [سورة البقرة: 265] کو «را» کے کسرہ یعنی زیر کے ساتھ پڑھتے تھے اور انہوں نے فرمایا: «الربوه» سے مراد زمین کا بلند حصہ ہے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3156]

عبید بن عمیر سے روایت ہے کہ سیدنا عمر رضی اللہ عنہ نے نبی کریم صلی اللہ علیہ وسلم کے اصحاب سے پوچھا: تمہاری رائے میں یہ آیت ﴿أَيَوَدُّ أَحَدُكُمْ أَنْ تَكُونَ لَهُ جَنَّةٌ﴾ [سورة البقرة: 266] کس کے بارے میں نازل ہوئی ہے؟ لوگوں نے کہا: اللہ ہی بہتر جانتا ہے، اس پر وہ ناراض ہوئے اور فرمایا: یہ کہو کہ ہم جانتے ہیں یا نہیں جانتے، تو سیدنا عبداللہ بن عباس رضی اللہ عنہما نے عرض کی: اے امیر المؤمنین! میرے دل میں اس کے متعلق کچھ ہے، سیدنا عمر رضی اللہ عنہ نے فرمایا: اے میرے بھتیجے! کہو اور اپنے آپ کو کم تر نہ سمجھو، ابن عباس رضی اللہ عنہما نے کہا: یہ ایک عمل کی مثال بیان کی گئی ہے، سیدنا عمر رضی اللہ عنہ نے پوچھا: کون سا عمل؟ انہوں نے کہا: عمل کی، تو سیدنا عمر رضی اللہ عنہ نے (وضاحت کرتے ہوئے) فرمایا: یہ اس مالدار آدمی کی مثال ہے جو نیک اعمال کرتا ہے، پھر اللہ اس کی طرف شیطانوں کو بھیج دیتا ہے تو وہ گناہوں کے کام کرنے لگتا ہے یہاں تک کہ وہ اپنے تمام پچھلے اعمال کو غرق کر دیتا ہے۔
یہ حدیث امام بخاری اور امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3157]

سیدنا عبداللہ بن عباس رضی اللہ عنہما سے اللہ عزوجل کے اس فرمان ﴿إِعْصَارٌ فِيهِ نَارٌ﴾ [سورة البقرة: 266] کے متعلق روایت ہے، انہوں نے فرمایا: اس سے مراد ایسی ہوا ہے جس میں سخت لو اور تپش ہو۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3158]

سیدنا جابر بن عبداللہ رضی اللہ عنہما سے روایت ہے کہ نبی کریم صلی اللہ علیہ وسلم نے صدقہ فطر میں ایک صاع کھجور ادا کرنے کا حکم دیا، تو ایک شخص ردی کھجوریں لے آیا، نبی کریم صلی اللہ علیہ وسلم نے سیدنا عبداللہ بن رواحہ رضی اللہ عنہ سے فرمایا: ”ان کھجوروں کا اندازہ (بطور زکوٰۃ) نہ کرو“، تب قرآن کی یہ آیت نازل ہوئی: ﴿يَاأَيُّهَا الَّذِينَ آمَنُوا أَنْفِقُوا مِنْ طَيِّبَاتِ مَا كَسَبْتُمْ وَمِمَّا أَخْرَجْنَا لَكُمْ مِنَ الْأَرْضِ وَلَا تَيَمَّمُوا الْخَبِيثَ مِنْهُ تُنْفِقُونَ﴾ ”اے ایمان والو! اپنی پاکیزہ کمائی میں سے اور اس میں سے جو ہم نے تمہارے لیے زمین سے نکالا ہے خرچ کرو اور اس میں سے گھٹیا چیز (اللہ کی راہ میں) دینے کا ارادہ نہ کرو۔“ [سورة البقرة: 267]
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3159]