سیدنا ابوالدرداء رضی اللہ عنہ فرماتے ہیں: رسول اللہ صلی اللہ علیہ وسلم نے: فَمِنْھُمْ ظَالِمٌ لِّنَفْسِہٖ وَ مِنْھُمْ مُّقْتَصِدٌ وَ مِنْھُمْ سَابِقٌ بِالْخَیْرٰتِ (فاطر: 32) ” تو ان میں کوئی اپنی جان پر ظلم کرتا ہے اور ان میں کوئی میانہ چال پر ہے، اور ان میں کوئی وہ ہے جو اللہ کے حکم سے بھلائیوں میں سبقت لے گیا “۔ کے متعلق فرمایا: سابق (مخلص مومن) اور مقتصد (میانہ روی کرنے والا) دونوں بلا حساب جنت میں جائیں گے اور ظالم للنفسہ (جو نعمت الٰہی کا منکر تو نہ ہو لیکن شکر نہ بجا لائے) کا کچھ آسان سا حساب لیا جائے گا پھر اس کو بھی جنت میں بھیج دیا جائے گا۔ ٭٭ اس حدیث کی سند میں اعمش رضی اللہ عنہ سے مختلف روایات منقول ہیں (ایک سند یوں ہے): (عَنِ الثَّوْرِیِّ، عَنِ الْاَعْمَشِ، عَنْ اَبِیْ ثَابِتٍ، عَنْ اَبِیْ الدَّرْدَائِ رَضِیَ اللّٰہُ عَنْہُ) (ایک سند یوں ہے): (عَنْ شُعْبَۃَ، عَنِ الْاَعْمَشِ، عَنْ رَجُلٍ مِنْ ثَقِیفٍ، عَنْ اَبِیْ الدَّرْدَاء) اور یہی سند ثوری کے واسطے سے بھی اعمش سے منقول ہے، انہوں نے ابوثابت کے واسطے سے ابوالدرداء رضی اللہ عنہ سے روایت کیا ہے۔ جب اس حدیث کی سندیں متعدد ہیں تو اس سے یہ پتہ چلتا ہے کہ اس حدیث کی کوئی اصل لازمی موجود ہے۔ [المستدرك على الصحيحين/كِتَابُ التَّفْسِيرِ/حدیث: 3634]

سیدنا عقبہ بن صہبان حرانی رضی اللہ عنہ فرماتے ہیں: میں نے سیدہ عائشہ رضی اللہ عنہا سے کہا: اے ام المومنین رضی اللہ عنہا اللہ تعالیٰ کے اس ارشاد کے متعلق آپ کا کیا خیال ہے: ثُمَّ اَوْرَثْنَا الْکِتٰبَ الَّذِیْنَ اصْطَفَیْنَا مِنْ عِبَادِنَا فَمِنْھُمْ ظَالِمٌ لِّنَفْسِہٖ وَ مِنْھُمْ مُّقْتَصِدٌ وَ مِنْھُمْ سَابِقٌ بِالْخَیْرٰتِ بِاِذْنِ اللّٰہِ ذٰلِکَ ھُوَ الْفَضْلُ الْکَبِیْرُ (فاطر: 32) ” پھر ہم نے کتاب کا وارث کیا اپنے چنے ہوئے بندوں کو تو ان میں کوئی اپنی جان پر ظلم کرتا ہے اور ان میں کوئی میانہ چال پر ہے، اور ان میں کوئی وہ ہے جو اللہ کے حکم سے بھلائیوں میں سبقت لے گیا یہی بڑا فضل ہے “۔ (،) تو ام المومنین سیدہ عائشہ صدیقہ رضی اللہ عنہا نے فرمایا: سابق وہ ہے جو رسول اللہ صلی اللہ علیہ وسلم کی حیات میں تھے اور آپ نے ان کے لیے زندگی اور رزق کی گواہی دی۔ (یعنی جنت کی بشارت دی) اور مقتصد وہ اصحاب ہیں جو آپ کے طریقہ پر عامل رہے اور ظالم لنفسہ ہم تم جیسے لوگ ہیں جو ہماری اتباع کریں گے لیکن بہرحال سب جنت میں جائیں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3635]

سیدنا ابوسعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے یہ آیت پڑھی: جَنّٰتُ عَدْنٍ یَّدْخُلُوْنَھَا یُحَلَّوْنَ فِیْھَا مِنْ اَسَاوِرَ مِنْ ذَھَبٍ (فاطر: 33) ” بسنے کے باغوں میں داخل ہوں گے وہ ان میں سونے کے موتی اور کنگن پہنائے جائیں گے “۔ پھر فرمایا: ان پر ایسے تاج ہوں گے کہ ان کے ادنیٰ سے ادنیٰ موتی کی شان یہ ہو گی کہ وہ مشرق سے مغرب تک پوری دنیا کو روشن کر دے “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ ابوعباس رضی اللہ عنہ نے دوری کے حوالے سے یحیی بن معین کا یہ بیان نقل کیا ہے مصریین کی ” سب سے صحیح اسناد “ یہ (درج ذیل) ہے۔ [المستدرك على الصحيحين/كِتَابُ التَّفْسِيرِ/حدیث: 3636]