سیدنا عبداللہ بن عمر رضی اللہ عنہما فرماتے ہیں: رسول اللہ صلی اللہ علیہ وسلم نے ارشاد فرمایا: سب سے ادنیٰ درجے کے جنتی کا یہ مقام ہو گا کہ وہ اپنی ملکیت میں دو ہزار سال سیر کرے (تو اس کی انتہاء کو پہنچے گا) جیسا کہ ادنیٰ درجے کا جنتی اپنی بیویوں، خدام اور تخت کی طرف دیکھے گا اور سب سے افضل درجے کا جنتی وہ ہو گا جو ایک دن میں دو مرتبہ اللہ تعالیٰ کی زیارت کرے گا۔ نوٹ: ثویر ابن ابی فاختہ سے یہ حدیث روایت کرنے میں اسرائیل بن یونس نے عبدالملک بن ابجر کی متابعت کرتے ہوئے سیدنا عبداللہ بن عمر رضی اللہ عنہما سے روایت کیا کہ رسول اللہ صلی اللہ علیہ وسلم نے ارشاد فرمایا: ادنیٰ درجے کے جنتی کا یہ مقام ہو گا کہ وہ اپنی ملکیت میں دو ہزار سال سیر کرے گا اور سب سے افضل و اعلیٰ درجے کا جنتی ایک دن میں دو مرتبہ اللہ تعالیٰ کی زیارت کرے گا۔ پھر آپ نے اس آیت کی تلاوت کی: وُجُوْہٌ یَّوْمَئِذٍ نَاضِرَۃٌ (القیامۃ: 22) ” کچھ منہ اس دن تروتازہ ہوں گے۔“ آپ نے فرمایا: سفید اور صاف۔ اِلٰی رَبِّھَا نَاظِرَۃٌ (القیامۃ: 23) ” اپنے رب کو دیکھتے۔“ آپ فرماتے ہیں: وہ ہر دن اللہ تعالیٰ کا دیدار کرے گا۔ ٭٭ یہ حدیث بدعتیوں کے رد کے لئے مفسر حدیث ہے اور ثویر بن فاختہ کی روایات اگرچہ صحیح بخاری اور صحیح مسلم میں نقل نہیں کی گئیں لیکن سوائے اہل تشیع کے اور کسی نے ان پر جرح نہیں کی۔ [المستدرك على الصحيحين/كِتَابُ التَّفْسِيرِ/حدیث: 3923]

سیدنا ابن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ”اہلِ جنت میں سب سے ادنیٰ مرتبے والا وہ شخص ہوگا جو اپنی سلطنت کو دو ہزار سال (کی مسافت) تک دیکھے گا، اور ان میں سب سے افضل مرتبے والا وہ ہوگا جو ہر روز دو مرتبہ اللہ تعالیٰ کے چہرے (دیدار) کی طرف دیکھے گا“۔ پھر آپ صلی اللہ علیہ وسلم نے یہ آیت تلاوت فرمائی: ”بہت سے چہرے اس دن ترو تازہ ہوں گے“، (راوی کہتے ہیں کہ اس سے مراد) سفیدی اور صفائی ہے، ”اپنے رب کی طرف دیکھ رہے ہوں گے“، فرمایا: ”وہ ہر روز اللہ عزوجل کے چہرے کی طرف دیکھیں گے“۔ یہ حدیث بدعتیوں کے رد میں ایک واضح تفسیر ہے، اور ثویر بن ابی فاختہ (اس کے راوی ہیں)، اگرچہ شیخین نے ان سے روایت تخریج نہیں کی، لیکن ان پر سوائے تشیع (شیعہ ہونے) کے اور کوئی اعتراض نہیں کیا گیا۔ [المستدرك على الصحيحين/كِتَابُ التَّفْسِيرِ/حدیث: 3924]

سیدنا سعید بن جبیر رضی اللہ عنہ فرماتے ہیں: میں نے سیدنا عبداللہ بن عباس رضی اللہ عنہما سے پوچھا کہ: اَوْلٰی لَکَ فَاَوْلٰی (القیامۃ: 34) رسول اللہ کا فرمان ہے یا قرآن کی آیت ہے؟ انہوں نے فرمایا: یہ قول تو رسول اللہ صلی اللہ علیہ وسلم کا تھا لیکن بعد میں اللہ تعالیٰ نے (آیت کے طور پر بھی) نازل فرما دی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3925]

سیدنا ابوہریرہ رضی اللہ عنہ فرماتے ہیں: نبی اکرم صلی اللہ علیہ وسلم جب یہ آیت پڑھتے: اَلَیْسَ ذٰلِکَ بِقٰدِرٍ عَلٰٓی اَنْ یُّحْیِیَا الْمَوْتٰی (القیامۃ: 40) ” کیا جس نے یہ کچھ کیا وہ مردے نہ جلا سکے گا۔“ تو کہتے ” بلی “ (کیوں نہیں) اور جب (یہ آیت) پڑھتے: اَلَیْسَ اللّٰہُ بِاَحْکَمِ الْحٰکِمِیْنَ (التین: 8) ” کیا اللہ سب حاکموں سے بڑھ کر حاکم نہیں۔“ تو آپ کہتے ” بلی “ کیوں نہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3926]