سیدنا عبداللہ بن مسعود رضی اللہ عنہ فرماتے ہیں: نجران کے سفیر عاقب اور سید نبی اکرم صلی اللہ علیہ وسلم کے پاس ملاعنہ کرنے کے ارادے سے آئے، ان میں سے ایک نے دوسرے سے کہا: ہمیں ایسا نہیں کرنا چاہئے کیونکہ اگر وہ واقعی نبی ہوا تو ہم ہزگز کامیاب نہیں ہو سکتے اور نہ ہی ہماری نسلیں کامیاب ہو سکتی ہیں۔ (وہ لوگ اپنی حرکت سے باز آ گئے اور حضور صلی اللہ علیہ وسلم کی خدمت میں آ کر) کہنے لگے: آپ جو کچھ مانگیں ہم دینے کے لئے تیار ہیں آپ ہمارے ساتھ کوئی انتہائی امانتدار آدمی بھیج دیجئے، اس مقصد کے لئے بہت سارے صحابہ کرام کے دلوں میں خواہش تھی لیکن آپ صلی اللہ علیہ وسلم نے سیدنا ابوعبیدہ بن جراح رضی اللہ عنہ کا انتخاب کیا۔ جب وہ جا رہے تھے تو پیچھے سے رسول اللہ صلی اللہ علیہ وسلم نے فرمایا:” یہ اس امت کا امین ہے “۔ ٭٭ امام بخاری رحمۃ اللہ علیہ اور امام مسلم رحمۃ اللہ علیہ نے اس حدیث کو اپنی اپنی صحیح میں ثوری کے حوالے سے اور شعبہ نے ابواسحاق اور صلہ بن زفر کے واسطے سے سیدنا حذیفہ سے روایت کیا ہے۔ اور اسرائیل نے ان کی مخالف کی ہے انہوں نے اس کی سند یوں بیان کی ہے۔” عن صلۃ بن زفر عن عبداللہ “ پھر ثوری اور شعبہ سے بھی زیادہ کامل حدیث بیان کی۔ میں اس حدیث کو نقل کیا ہے کیونکہ یہ شیخین رحمۃ اللہ علیہما کے معیار کے مطابق صحیح ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5243]

سیدنا انس رضی اللہ عنہ فرماتے ہیں: یمن کے کچھ لوگ رسول اللہ صلی اللہ علیہ وسلم کی بارگاہ میں حاضر ہوئے اور کہنے لگے: ہمارے ساتھ کوئی ایسا شخص بھیج دیجئے جو ہمیں قرآن کریم کی تعلیم دے۔ تو نبی اکرم صلی اللہ علیہ وسلم نے سیدنا ابوعبیدہ بن جراح رضی اللہ عنہ کا ہاتھ پکڑا اور ان کے ہمراہ روانہ فرما دیا۔ اور فرمایا:” یہ اس امت کا امین ہے “۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو قرآن کریم کے ذکر کے ساتھ نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5244]

ابوالبختری کہتے ہیں کہ سیدنا ابوبکر صدیق رضی اللہ عنہ نے سیدنا ابوعبیدہ بن جراح رضی اللہ عنہ سے کہا: کیا میں تمہاری بیعت کر لوں؟ کیونکہ میں نے رسول اللہ صلی اللہ علیہ وسلم کی زبان اقدس سے سنا ہے کہ ” بے شک تم اس امت کے امین ہو “ تو سیدنا ابوعبیدہ رضی اللہ عنہ نے کہا: میں اس شخصیت کے آگے کھڑا ہو کر کیسے نماز پڑھا سکتا ہوں جس کو خود رسول اللہ صلی اللہ علیہ وسلم نے اپنے آخری وقت میں ہماری امامت کرانے کا حکم دیا۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5245]

ثابت بن حجاج کہتے ہیں: سیدنا عمر بن خطاب رضی اللہ عنہ نے فرمایا: اگر میں ابوعبیدہ بن جراح رضی اللہ عنہ کو پاؤں تو بغیر مشورہ کئے میں ان کو خلیفہ مقرر کر دوں، اور اگر مجھ سے اس بابت پوچھا جائے تو میں کہہ دوں گا کہ میں نے اللہ اور اس کے رسول کے امین کو خلیفہ مقرر کیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5246]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے ارشاد فرمایا: ابوبکر رضی اللہ عنہ کتنا اچھا آدمی ہے، عمر رضی اللہ عنہ کتنا اچھا آدمی ہے، ابوعبیدہ بن جراح رضی اللہ عنہ کتنا اچھا آدمی ہے، اسید بن حضیر رضی اللہ عنہ کتنا اچھا آدمی ہے، ثابت بن قیس رضی اللہ عنہ کتنا اچھا آدمی ہے، معاذ بن جبل رضی اللہ عنہ کتنا اچھا آدمی ہے، معاذ بن عمرو بن جموح رضی اللہ عنہ کتنا اچھا آدمی ہے۔ ٭٭ یہ حدیث صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5247]