ابوامامہ بن سہل بن حنیف فرماتے ہیں: سیدنا سہل بن حنیف، ان کبار صحابہ کرام میں سے تھے، جنہوں نے رسول اللہ صلی اللہ علیہ وسلم کے ہمراہ جنگ بدر میں شرکت کی تھی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5846]

ابوامامہ بن سہل بن حنیف فرماتے ہیں: بنی عدی بن کعب سے تعلق رکھنے والے ایک شخص عامر بن ربیعہ نے سیدنا سہل بن حنیف رضی اللہ عنہ کو رسول اللہ صلی اللہ علیہ وسلم کے ہمراہ مدینے میں ایک مقام پر (کسی نہر وغیرہ میں) نہاتے ہوئے دیکھ کر کہنے لگے: میں نے آج تک اس جیسا خوبصورت نوجوان کبھی نہیں دیکھا، سیدنا سہل وہیں پر لڑکھڑاتے ہوئے زمین پر گر گئے، رسول اللہ صلی اللہ علیہ وسلم کو اس بات کی خبر دی گئی تو رسول اللہ صلی اللہ علیہ وسلم نے عامر بن ربیعہ کو بلا کر ان پر اظہار ناراضگی فرمایا، پھر ارشاد فرمایا: تم میں سے کوئی شخص اپنے بھائی یا ساتھی کو قتل کیوں کرتا ہے؟ وہ اس کے لئے برکت کی دعا کیوں نہیں کرتا۔ اس کے لئے غسل کرو، عامر بن ربیعہ نے ان کے لئے غسل کیا تو سیدنا سہل بن حنیف شام کے وقت بالکل ٹھیک ہو چکے تھے۔ (نظر اتارنے کے لئے) غسل کا طریقہ یہ ہے کہ ایک ٹب میں پانی لیں اور جس کی نظر لگی ہے وہ اپنے دونوں ہاتھ اس ٹب میں ڈالے اور ٹب کے اندر اپنا چہرہ دھوئے، پھر اس ٹب میں اپنا دایاں ہاتھ دھوئے، پھر اپنا منہ دھوئے، اور اپنے ہاتھ کی پشت کو دھوئے، پھر بایاں ہاتھ پانی میں ڈالے، اس کو دھوئے، پھر اپنا دایاں گھٹنا اور پاؤں کی انگلیوں کے پورے اسی ٹب میں دھوئے، اسی طرح بایاں گھٹنا اور بائیں پاؤں کی انگلیوں کے پورے دھوئے، پھر اپنا سینہ دھوئے، پھر اپنے تہبند (یا شلوار جو بھی ستر کے لئے پہن رکھا ہے اس) کی اندرونی جانب پانی میں ڈبوئے، پھر وہ ٹب زمین پر رکھنے سے پہلے اس ٹب کو ڈھانپ دے (اکثر روایت میں ہے کہ پھر وہ ٹب متاثر شخص کو تھما دے) وہ اس میں سے ایک دو گھونٹ پانی پئے اور کلی بھی کرے، پھر غسل کرنے والا وہ پانی اپنے چہرے پر متاثرہ آدمی کے چہرے پر ڈالے، پھر اس کو اپنے سر پر انڈیل لے اور وہ ٹب سر کے اوپر سے اپنی پچھلی جانب پھینک دے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5847]

امام بخاری رحمۃ اللہ علیہ اور امام مسلم رحمۃ اللہ علیہ نے یہی حدیث مختصراً بیان کی ہے۔ (ان کی روایت کردہ حدیث درج ذیل ہے)۔ ابوامامہ بن سہل بن حنیف فرماتے ہیں: عامر بن ربیعہ کا سیدنا سہل بن حنیف انصاری رضی اللہ عنہ کے پاس سے گزر ہوا، اس وقت سہل بن حنیف رضی اللہ عنہ ایک نہر میں نہا رہے تھے، ان کو دیکھ کر کہا: خدا کی قسم! میں نے آج تک اس جیسا خوبصورت نوجوان نہیں دیکھا، (ان کے یہ بات کہتے ہی) سیدنا سہل زمین پر گر گئے، ان کو رسول اللہ صلی اللہ علیہ وسلم کی بارگاہ میں لایا گیا، حضور صلی اللہ علیہ وسلم سے عرض کی گئی: یا رسول اللہ صلی اللہ علیہ وسلم اس پر نگاہ کرم کیجئے! رسول اللہ صلی اللہ علیہ وسلم نے فرمایا: کیا تمہیں کسی آدمی پر شک ہے؟ (جس نے ان کو نظر لگائی ہے) صحابہ کرام رضوان اللہ علیہم اجمعین نے عرض کی: جی ہاں یا رسول اللہ صلی اللہ علیہ وسلم ان کے پاس سے عامر بن ربیعہ کا گزر ہوا تھا، رسول اللہ صلی اللہ علیہ وسلم نے اس پر ناراضگی کا اظہار کیا اور فرمایا: تو نے اس کے لئے برکت کی دعا کیوں نہ کی؟ تو اس کے لئے غسل کر۔ چنانچہ عامر بن ربیعہ نے سیدنا سہل بن حنیف رضی اللہ عنہ کے لئے غسل کیا۔ (اس غسل کی برکت سے) سیدنا سہل بن حنیف رضی اللہ عنہ تندرست ہو کر قافلہ کے ہمراہ روانہ ہو گئے۔ ٭٭ امام حاکم کہتے ہیں: جراح بن منہال ” ابوعطوف جزری “ ہیں۔ یہ بخاری شریف کے معیار کے راوی نہیں ہیں۔ میں نے یہ حدیث صرف اس لئے نقل کر دی ہے کہ اس میں غسل کی مفصل کیفیت کا ذکر موجود ہے۔ یہ حدیث رسول اللہ صلی اللہ علیہ وسلم سے مسند ہونے کے حوالے سے بہت غریب ہے۔ سیدنا عبداللہ بن وہب نے ایک دوسری اسناد کے ہمراہ اس حدیث جیسی ایک اور حدیث بیان کی ہے، اس میں کچھ الفاظ کا اضافہ بھی ہے۔ (وہ حدیث درج ذیل ہے)۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5848]

محمد بن ابی امامہ بن سہل بن حنیف اپنے والد ابوامامہ کا یہ بیان نقل کرتے ہیں (وہ کہتے ہیں کہ) میرے والد سیدنا سہل بن حنیف رضی اللہ عنہ جنگ حنین کے دن جب اللہ تعالیٰ نے دشمن کو بھگا دیا، اس موقع پر سیدنا سہل بن حنیف رضی اللہ عنہ نے نہانے کے لئے اپنا جبہ اتار دیا، عامر بن ربیعہ ان کو دیکھ رہا تھا۔ سیدنا سہل بن حنیف بہت خوبصورت نوجوان تھے، عامر بن ربیعہ ان کو دیکھ کر کہنے لگا: میں نے آج تک ان جیسا حسین نوجوان نہیں دیکھا، بلکہ کسی لڑکی میں بھی میں نے ایسا حسن نہیں دیکھا۔ (ان کے یہ کہتے ہی) سیدنا سہل بن حنیف کو شدید بخار ہو گیا، رسول اللہ صلی اللہ علیہ وسلم کو اس بات کی خبر دی گئی، تو رسول اللہ صلی اللہ علیہ وسلم ان کے پاس تشریف لائے، یہاں پر صحابہ کرام نے ربیعہ بن عامر کے ان کو دیکھنے والی بات سنائی، رسول اللہ صلی اللہ علیہ وسلم نے فرمایا: تم میں سے کوئی ایک اپنے بھائی کو کیوں قتل کرتا ہے؟ ان کو دیکھ کر برکت کی دعا کیوں نہ مانگی؟ بے شک نظر برحق ہے۔ اس کے لئے وضو کرو، پھر رسول اللہ صلی اللہ علیہ وسلم نے فرمایا: جب تم میں سے کوئی شخص ایسی چیز دیکھے جو اس کو بہت اچھی لگے، اس کو چاہیے کہ وہ برکت کی دعا مانگے، کیونکہ نظر برحق ہے۔ ٭٭ مذکورہ دونوں حدیثوں میں جو اضافہ ہے، وہ امام بخاری اور امام مسلم نے نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5849]