سیدنا عبداللہ بن عباس رضی اللہ عنہما فرماتے ہیں کہ صحابہ کرام کو اپنے غیر مسلم رشتہ داروں کے ساتھ حسن سلوک ناگوار گزرتا تھا، تب یہ آیت نازل ہوئی: لَيْسَ عَلَيْكَ هُدَاهُمْ وَلَكِنَّ اللَّهَ يَهْدِي مَنْ يَشَاءُ وَمَا تُنْفِقُوا مِنْ خَيْرٍ فَلِأَنْفُسِكُمْ وَمَا تُنْفِقُونَ إِلَّا ابْتِغَاءَ وَجْهِ اللَّهِ وَمَا تُنْفِقُوا مِنْ خَيْرٍ يُوَفَّ إِلَيْكُمْ وَأَنْتُمْ لَا تُظْلَمُونَ (البقرہ: 272) ” انہیں راہ دینا تمہارے ذمہ لازم نہیں ہاں اللہ راہ دیتا ہے جسے چاہتا ہے اور تم جو اچھی چیز دو تو تمہارا ہی بھلا ہے اور تمہیں خرچ کرنا مناسب نہیں مگر اللہ کی مرضی چاہنے کے لئے اور جو مال دو تمہیں پورا ملے گا اور نقصان نہ دیئے جاؤ گے۔ (ترجمہ: کنزالایمان، امام احمد رضا) چنانچہ اس آیت کی وجہ سے ان کو (اپنے رشتہ داروں کے ساتھ حسن سلوک کی) رخصت دے دی گئی۔ [المستدرك على الصحيحين/كِتَابُ الْبِرِّ وَالصِّلَةِ/حدیث: 7451]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اللہ تعالیٰ فرماتا ہے: میں رحمن ہوں، اور اس سے مراد ” رحم “ ہے۔ جس نے اس کو ملایا، میں اس کو ملاؤں گا، اور جس نے اسے توڑا، میں اسے توڑ دوں گا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اسی حدیث کو واضح اسانید کے ہمراہ سیدنا عبدالرحمن بن عوف، سعید بن زید بن عمرو بن نفیل، سیدہ عائشہ رضی اللہ عنہا اور سیدنا عبداللہ بن عمرو رضی اللہ عنہ سے بھی روایت کیا گیا ہے۔ سیدنا سعید بن زید رضی اللہ عنہ کی حدیث درج ذیل ہے [المستدرك على الصحيحين/كِتَابُ الْبِرِّ وَالصِّلَةِ/حدیث: 7452]

سعید بن زید بن عمرو بن نفیل فرماتے ہیں کہ رسول اللہ صلی اللہ علیہ وسلم نے ارشاد فرمایا:” رحم “ اللہ تعالیٰ کا ” شجنہ “ (ٹہنی) ہے، جس نے اس کو ملایا، اللہ تعالیٰ اس کو ملائے گا اور جس نے اس کو توڑا، اللہ تعالیٰ اس کو توڑے گا۔ سیدنا عبدالرحمن بن عوف رضی اللہ عنہ سے مروی حدیث درج ذیل ہے [المستدرك على الصحيحين/كِتَابُ الْبِرِّ وَالصِّلَةِ/حدیث: 7453]

ابراہیم بن عبداللہ بن قارظ بیان کرتے ہیں کہ ان کے والد محترم، سیدنا عبدالرحمن بن عوف کی عیادت کرنے کے لئے گئے، تو عبدالرحمن بن عوف رضی اللہ عنہ نے ان کو بتایا کہ رسول اللہ صلی اللہ علیہ وسلم نے ارشاد فرمایا ہے کہ اللہ تعالیٰ فرماتا ہے: میں ” رحمن “ ہوں، اور یہ ” رحم “ (رشتہ داریاں) ہیں۔ میں نے اسی سے اپنا نام نکالا ہے، لہٰذا جس نے اس (رشتہ داری) کو ملایا میں اس سے ملوں گا اور جس نے اس (رشتہ داری) کو توڑا میں اس کو (خود سے) دور کر دوں گا۔ [المستدرك على الصحيحين/كِتَابُ الْبِرِّ وَالصِّلَةِ/حدیث: 7454]

سیدنا عبدالرحمن بن عوف رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ارشاد فرمایا: اللہ تعالیٰ فرماتا ہے: میں ” رحمن “ ہوں، میں نے ” رحم “ کو پیدا کیا، اور اپنے نام سے اس کا نام رکھا، لہٰذا جس نے اس کو ملایا، میں اس سے ملوں گا، اور جس نے اس کو توڑا، میں اس کو (اپنی رحمت سے) دور کر دوں گا۔ ٭٭ یہ ابورداد لیثی ہیں، انہوں نے اس اسناد میں سفیان بن عیینہ کا، محمد بن ابی عتیق کا، شعیب بن ابی حمزہ کا اور سفیان بن حسین کا اضافہ کیا ہے۔ ابن عیینہ سے مروی حدیث [المستدرك على الصحيحين/كِتَابُ الْبِرِّ وَالصِّلَةِ/حدیث: 7455]

سیدنا ابوسلمہ بیان کرتے ہیں کہ ابوالرداد بیمار ہو گئے، سیدنا عبدالرحمن ان کی عیادت کے لئے آئے، ابوالرداد نے کہا: اے ابومحمد! سب سے بہتر اور سب سے زیادہ صلہ رحمی کرنے والا کون ہے؟ سیدنا عبدالرحمن نے کہا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ اللہ تعالیٰ فرماتا ہے:” میں اللہ ہوں اور میں رحمن ہوں، میں نے اس (رحم یعنی رشتہ داری) کے لئے اپنے نام سے نام رکھا، لہٰذا جس نے اس کو ملایا، میں اس سے ملوں گا، اور جس نے اس کو کاٹا، میں اس کو (جنت کے راستے سے) کاٹوں گا۔ محمد بن ابی عتیق رضی اللہ عنہ کی حدیث [المستدرك على الصحيحين/كِتَابُ الْبِرِّ وَالصِّلَةِ/حدیث: 7456]

سیدنا ابوسلمہ فرماتے ہیں: ابورداد لیثی سے مروی ہے، سیدنا عبدالرحمن بن عوف رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اللہ تعالیٰ فرماتا ہے: میں رحمن ہوں، میں نے ” رحم “ کو پیدا کیا ہے، اور اس کے لئے اپنے نام سے نام رکھا ہے، جس نے اس کو ملایا، میں اس سے ملوں گا اور جس نے اس کو توڑا، میں اس کو (اپنی رحمت سے) الگ کر دوں گا۔ شعیب ابن ابی حمزہ سے مروی حدیث [المستدرك على الصحيحين/كِتَابُ الْبِرِّ وَالصِّلَةِ/حدیث: 7457]

سیدنا عبدالرحمن بن عوف رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اللہ تعالیٰ فرماتا ہے: میں ” رحمن “ ہوں، میں نے ” رحم “ (رشتہ داری) کو پیدا کیا اور اپنے نام سے اس کا نام رکھا، لہٰذا جس نے اس کو ملایا، میں اس کو ملاؤں گا اور جس نے اس کو توڑا، میں اس کو توڑوں گا۔ سیدنا سفیان بن حسین سے مروی حدیث [المستدرك على الصحيحين/كِتَابُ الْبِرِّ وَالصِّلَةِ/حدیث: 7458]

سفیان بن حسین اپنی سند کے ہمراہ سیدنا ابورداد لیثی کا یہ بیان نقل کرتے ہیں کہ رسول اللہ صلی اللہ علیہ وسلم نے ارشاد فرمایا: اللہ تعالیٰ فرماتا ہے میں ” رحمن “ ہوں، میں نے ” رحم “ کو پیدا کیا، اور اپنے نام سے اس کا نام رکھا، لہٰذا جس نے اس کو ملایا، میں اس کو ملاؤں گا اور جس نے اس کو توڑا، میں اس کو توڑوں گا۔ اب ہم ذکر صحابہ کی جانب لوٹ کر آتے ہیں۔ ام المومنین سیدہ عائشہ رضی اللہ عنہا کی حدیث [المستدرك على الصحيحين/كِتَابُ الْبِرِّ وَالصِّلَةِ/حدیث: 7459]