سیدنا عبداللہ بن عباس رضی اللہ عنہما فرماتے ہیں کہ رسول اللہ نے ارشاد فرمایا: نظر برحق ہے۔ یہ بہت تیز اثر کرتی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7688]

عبداللہ بن عامر بن ربیعہ اپنے والد کا یہ بیان نقل کرتے ہیں کہ رسول اللہ صلی اللہ علیہ وسلم نے ارشاد فرمایا: جب کوئی شخص اپنے آپ میں، یا اپنے بھائی میں کوئی اچھی چیز دیکھے تو اس کو چاہیے کہ برکت کی دعا مانگے، کیونکہ نظر برحق ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو برکت کے ذکر کے ساتھ نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7689]

سیدنا عبداللہ بن عامر بن ربیعہ فرماتے ہیں: سیدنا سہل بن حنیف رضی اللہ عنہ سیدنا عامر بن ربیعہ کے ہمراہ نہانے کے لیے باہر گئے، یہ دونوں ایک حوض پر پہنچے، سیدنا سہل نے پردہ کر کے اپنے اوپر سے اون کا جبہ اتار کر قریب رکھ دیا اور پانی میں گھس گئے۔ آپ فرماتے ہیں: میں نے ان کو دیکھا، ان کو میری نظر لگ گئی، میں نے پانی میں اس کی کپکپی کی آواز سنی، میں اس کے پاس آیا، تین مرتبہ اس کو آواز دی لیکن اس نے مجھے کوئی جواب نہ دیا، میں بھاگتا ہوا رسول اللہ صلی اللہ علیہ وسلم کے پاس آیا، اور آپ صلی اللہ علیہ وسلم کو واقعہ سنایا، حضور صلی اللہ علیہ وسلم فوراً! میرے ساتھ چلتے ہوئے وہاں تشریف لائے، آپ صلی اللہ علیہ وسلم نے پانی میں غوطہ لگایا، میں آپ صلی اللہ علیہ وسلم کی پنڈلیوں کی سفیدی کو دیکھ رہا تھا، (آپ صلی اللہ علیہ وسلم نے اس کو باہر نکالا) اس کے سینے کو ملا اور یہ دعا مانگی ” اللَّهُمَّ أَذْهِبْ عَنْهُ حَرِّهَا وَبَرْدَهَا وَوَصَبَهَا “۔” اے اللہ اس سے اس کی گرمی اور سردی اور اس کے درد کو دور فرما دے۔ یہ دعا مانگتے ہی وہ اٹھ کر کھڑے ہو گئے۔ تب نبی اکرم صلی اللہ علیہ وسلم نے فرمایا: جب کوئی شخص اپنے آپ میں یا اپنے مال میں یا اپنے بھائی میں کوئی بھی پسندیدہ چیز دیکھے اس کو چاہیے کہ فوراً برکت کی دعا مانگے، کیونکہ نظر برحق ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7690]

سیدنا عقبہ بن عامر رضی اللہ عنہ فرماتے ہیں کہ رسول صلی اللہ علیہ وسلم نے ارشاد فرمایا: جس نے تمیمہ (بتوں کی چھوٹی چھوٹی مورتیاں، جو زمانہ جاہلیت کے اپنی حفاظت کے لیے پہنتے تھے) لٹکایا، اللہ تعالیٰ اس (کے مقصد) کو پورا نہ کرے۔ اور جس نے ” گھونگا “ (ایک قسم کے دریائی کیڑے کو خول جو ہڈی کے مانند سیپی یا سنگھ کی قسم سے ہے) لٹکایا اللہ تعالیٰ اس کو نہ چھوڑے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7691]