سیدنا عبداللہ بن عمرو رضی اللہ عنہما فرماتے ہیں کہ آگ بھیجی جائے گی، یہ لوگوں کو مشرق سے مغرب کی طرف ہانکے گی، جیسا کہ سست و کاہل اونٹ کو ہانکا جاتا ہے، کوئی بندہ پیچھے نہیں رہے گا، جب لوگ قیلولہ کریں گے وہ آگ بھی اسی وقت قیلولہ کرے گی اور جب لوگ رات گزاریں گے، وہ آگ بھی رات گزارے گی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8620]

سیدنا عبداللہ بن عمرو رضی اللہ عنہما فرماتے ہیں کہ: زمین سے بہت خزانے نکلیں گے، ان میں سے ایک خزانہ حجاز کے قریب ہو گا، وہاں مخلوق کا سب سے برا آدمی آئے گا، اس کو فرعون کہا جاتا ہے، خزانے کی کھدائی کا کام کرنے والوں کو سونا ملے گا یہ لوگ ابھی اس پر خوش ہو رہے ہوں گے کہ ان تمام لوگوں کو زمین میں دھنسا دیا جائے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8621]

ابوالتیاح فرماتے ہیں: ہم نے جمعہ کی نماز پڑھی، نماز سے فارغ ہو کر لوگ ایک دوسرے سے مل کر بیٹھ گئے اور ابورجاء عطاردی کے اردگرد چکی کی طرح حلقہ بنا کر بیٹھ گئے، لوگ ان سے فتنہ کے بارے میں دریافت کرنے لگے، ابورجاء عطاردی نے بتایا کہ دو آدمی سیدنا عبادہ بن صامت رضی اللہ عنہ کی مجلس میں آئے، اور کہنے لگے: اے صامت کے بیٹے، کیا تم ہمیں وہ حدیث دوبارہ سنا سکتے ہو، جو تم نے ہمیں پہلے سنائی تھی، سیدنا عبادہ نے کہا: جی ہاں، میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ ” قریب ہے کہ بہترین مال دو بکریاں ہوں ایک مکی اور دوسری مدنی، سبزہ چرتی ہوں گی، قتادہ (ایک کانٹے دار درخت) اور بشام (ایک خوشبودار درخت) کے پتے کھائیں گی، اور اس کے مالک اس کا گوشت کھائیں گے اور اس کا دودھ پئیں گے، اور عرب کے جراثیم میں فتنے برپا ہو جائیں گے “ یہ بات آپ نے تین مرتبہ ارشاد فرمائی۔ پھر فرمایا: اس ذات کی قسم! جس کے قبضہ قدرت میں میری جان ہے، اگر تمہارے پاس تین سو بکریاں ہوں، اور تم ان کا گوشت کھاؤ، دودھ پیو، یہ مجھے زیادہ عزیز ہے بہ نسبت اس کے کہ تم سونے یا چاندی کے کنگن پہنو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8622]

سیدنا حذیفہ رضی اللہ عنہ فرماتے ہیں: اس وقت تمہاری کیا کیفیت ہو گی جب تم دین کے معاملات اس طرح کھول دو گے جیسے کوئی (بدکار) عورت اپنی شرمگاہ کو (ہر آنے والے کے لئے) کھول کر رکھتی ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8623]

سیدنا حذیفہ رضی اللہ عنہ فرماتے ہیں: اس وقت تمہاری کیا کیفیت ہو گی جب تم دین کے معاملہ میں اس قدر نرم ہو جاؤ گے جیسے کوئی (بدکار) عورت اپنی شرمگاہ کے بارے میں نرم ہوتی ہے، وہ کسی کو بھی اپنی شرمگاہ استعمال کرنے سے منع نہیں کرتی۔ ایک آدمی نے کہا: اللہ تعالیٰ اس کا برا کرے جو اس سے بھی عاجز ہو، آپ نے فرمایا: بلکہ تمہارا برا کیا جائے۔ ٭٭ یہ دونوں حدیثیں صحیح الاسناد ہیں، لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8624]