محمد بن خازم نے بیان کیا کہ جناب اعمش کی مجلس میں «جِبْرَائِيلُ» اور «مِيكَائِيلُ» کے تلفظ کی بحث چل پڑی تو اعمش نے بسند سعد طائی، عطیہ عوفی سے، انہوں نے سیدنا ابو سعید خدری رضی اللہ عنہ سے روایت کیا کہ رسول اللہ صلی اللہ علیہ وسلم نے صور پھونکنے والے فرشتے (اسرافیل) کا ذکر کیا اور فرمایا: ”اس کی دائیں جانب «جِبْرَائِيلُ» ”جبرائیل“ اور اس کی بائیں جانب «مِيكَائِيلُ» ”میکائل“ ہیں۔“ امام ابوداؤد رحمہ اللہ نے بیان کیا کہ «خَلَفٌ» کہتے ہیں: ”چالیس سال ہونے کو آئے ہیں کہ میں نے لکھنے سے قلم نہیں اٹھایا ہے مگر مجھے جو الجھن «جِبْرَائِيلُ» اور «مِيكَائِيلُ» کے ضبط میں ہوئی ہے کسی اور کلمہ میں نہیں ہوئی۔“ [سنن ابي داود/كِتَاب الْحُرُوفِ وَالْقِرَاءَاتِ/حدیث: 3999]

امام زہری رحمہ اللہ بسا اوقات ابن مسیب سے روایت کرتے تھے، انہوں نے کہا کہ ”نبی کریم صلی اللہ علیہ وسلم ، ابوبکر، عمر اور عثمان رضی اللہ عنہم ﴿مَالِكِ يَوْمِ الدِّينِ﴾ [سورة الفاتحة: 4] پڑھا کرتے تھے“ (سورۃ فاتحہ میں، «مَالِكِ» بروزن فاعل) اور ”مروان سب سے پہلا شخص ہے جس نے یہ ﴿مَلِكِ يَوْمِ الدِّينِ﴾ [سورة الفاتحة: 4] پڑھا“ (”الف“ کے بغیر بروزن فعل)۔ امام ابوداؤد رحمہ اللہ کہتے ہیں کہ ”یہ سند «الزُّهْرِيُّ عَنْ أَنَسٍ، وَالزُّهْرِيُّ عَنْ سَالِمٍ، عَنْ أَبِيهِ» کی بہ نسبت زیادہ صحیح ہے“۔ [سنن ابي داود/كِتَاب الْحُرُوفِ وَالْقِرَاءَاتِ/حدیث: 4000]

ام المؤمنین سیدہ ام سلمہ رضی اللہ عنہا نے رسول اللہ صلی اللہ علیہ وسلم کی قرأت کا ذکر کیا: ﴿بِسْمِ اللّٰهِ الرَّحْمٰنِ الرَّحِيْمِ﴾ [سورة الفاتحة: 1] ، ﴿الْحَمْدُ لِلّٰهِ رَبِّ الْعَالَمِيْنَ﴾ [سورة الفاتحة: 2] ، ﴿الرَّحْمٰنِ الرَّحِيْمِ﴾ [سورة الفاتحة: 3] ، ﴿مَلِكِ يَوْمِ الدِّيْنِ﴾ [سورة الفاتحة: 4] ، ”آپ صلی اللہ علیہ وسلم اپنی قرأت میں ایک ایک لفظ علیحدہ علیحدہ کر کے پڑھتے تھے“۔ امام ابوداؤد رحمہ اللہ کہتے ہیں: ”میں نے امام احمد رحمہ اللہ سے سنا، وہ فرماتے تھے: قدیم قرأت (سلف کی قرأت) «مَلِكِ يَوْمِ الدِّيْنِ» ہی ہے“۔ [سنن ابي داود/كِتَاب الْحُرُوفِ وَالْقِرَاءَاتِ/حدیث: 4001]

سیدنا ابوذر رضی اللہ عنہ نے بیان کیا کہ میں رسول اللہ صلی اللہ علیہ وسلم کے ساتھ سواری پر پیچھے بیٹھا ہوا تھا جبکہ آپ صلی اللہ علیہ وسلم گدھے پر سوار تھے اور سورج غروب ہونے والا تھا۔ آپ صلی اللہ علیہ وسلم نے فرمایا: ”کیا تم جانتے ہو کہ یہ کہاں غروب ہوتا ہے؟“ میں نے کہا: ”اللہ اور اس کا رسول ہی بہتر جانتے ہیں۔“ آپ صلی اللہ علیہ وسلم نے فرمایا: «فَإِنَّهَا ﴿تَغْرُبُ فِي عَيْنٍ حَامِيَةٍ﴾ [سورة الكهف: 86] » ”یہ ایک گرم چشمے میں غروب ہوتا ہے۔“ [سنن ابي داود/كِتَاب الْحُرُوفِ وَالْقِرَاءَاتِ/حدیث: 4002]

سیدنا واثلہ بن اسقع رضی اللہ عنہ بیان کرتے ہیں کہ ”نبی کریم صلی اللہ علیہ وسلم ان کے پاس آئے اور چبوترے پر تشریف لائے جو مہاجرین کے لیے مخصوص تھا، تو ایک آدمی نے آپ صلی اللہ علیہ وسلم سے پوچھا کہ قرآن کریم کی کون سی آیت سب سے بڑی ہے؟ آپ صلی اللہ علیہ وسلم نے فرمایا: ” ﴿اللَّهُ لَا إِلَهَ إِلَّا هُوَ الْحَيُّ الْقَيُّومُ لَا تَأْخُذُهُ سِنَةٌ وَلَا نَوْمٌ﴾ [سورة البقرة: 255] (یعنی آیت الکرسی)۔““ [سنن ابي داود/كِتَاب الْحُرُوفِ وَالْقِرَاءَاتِ/حدیث: 4003]

جناب شقیق سے روایت ہے کہ سیدنا ابن مسعود رضی اللہ عنہ نے پڑھا «هَيْتَ لَكَ» (”ہا“ پر زبر کے ساتھ) شقیق نے کہا: ہم اسے «هِيتَ لَكَ» پڑھتے ہیں (یعنی ”ہا“ کے نیچے زیر کے ساتھ)، تو ابن مسعود رضی اللہ عنہ نے کہا: ”جیسے پڑھایا گیا اسی طرح پڑھنا مجھے زیادہ محبوب ہے۔“ [سنن ابي داود/كِتَاب الْحُرُوفِ وَالْقِرَاءَاتِ/حدیث: 4004]

جناب شقیق سے روایت ہے کہ سیدنا عبداللہ بن مسعود رضی اللہ عنہ سے کہا گیا کہ لوگ یہ آیت کریمہ ﴿قَالَتْ هِيتَ لَكَ﴾ [سورة يوسف: 23] پڑھتے ہیں (یعنی ”ھا“ کے زیر کے ساتھ) تو انہوں نے کہا: ”بلاشبہ مجھے اسی طرح پڑھنا زیادہ محبوب ہے جیسے کہ مجھے سکھایا گیا ہے ﴿وَقَالَتْ هَيْتَ لَكَ﴾ [سورة يوسف: 23] “ (یعنی ”ھا“ پر زبر کے ساتھ)۔ [سنن ابي داود/كِتَاب الْحُرُوفِ وَالْقِرَاءَاتِ/حدیث: 4005]

سیدنا ابو سعید خدری رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”اللہ عزوجل نے بنو اسرائیل سے فرمایا: ﴿ادْخُلُوا الْبَابَ سُجَّدًا وَقُولُوا حِطَّةٌ تُغْفَرْ لَكُمْ خَطَايَاكُمْ﴾ [سورة البقرة: 58] یعنی «تُغْفَرْ» ”تا“ کے ضمہ سے بصیغہ واحد مؤنث غائب مجہول۔“ [سنن ابي داود/كِتَاب الْحُرُوفِ وَالْقِرَاءَاتِ/حدیث: 4006]

جعفر بن مسافر نے ابن ابی فدیک سے، انہوں نے ہشام بن سعد سے، انہوں نے اپنی سند سے مذکورہ بالا حدیث کی مثل روایت کیا۔ [سنن ابي داود/كِتَاب الْحُرُوفِ وَالْقِرَاءَاتِ/حدیث: 4007]

ام المؤمنین سیدہ عائشہ رضی اللہ عنہا نے بیان کیا کہ رسول اللہ صلی اللہ علیہ وسلم پر وحی نازل ہوئی تو آپ صلی اللہ علیہ وسلم نے ہمیں یہ آیات پڑھ کر سنائیں ﴿سُورَةٌ أَنْزَلْنَاهَا وَفَرَضْنَاهَا﴾ [سورة النور: 1] ۔ امام ابوداؤد رحمہ اللہ کہتے ہیں کہ آپ صلی اللہ علیہ وسلم نے ( «فَرَضْنَاهَا» کا کلمہ ”را“ کی) تحفیف سے پڑھا حتیٰ کہ ان آیات پر پہنچے (جن میں سیدہ عائشہ طیبہ رضی اللہ عنہا کی براءت کا مضمون ہے)۔ [سنن ابي داود/كِتَاب الْحُرُوفِ وَالْقِرَاءَاتِ/حدیث: 4008]