سیدنا علی بن ابی طالب رضی اللہ عنہ سے روایت ہے کہ رسول اللہ صلی اللہ علیہ وسلم نے منع فرمایا ہے کہ ” «قَسِّيِّ» پہنا جائے (وہ ریشمی کپڑا جو مصر سے درآمد ہوتا تھا) یا زعفرانی زرد رنگ کے کپڑے پہنے جائیں یا سونے کی انگوٹھی پہنی جائے یا رکوع کی حالت میں قرآن کی قراءت کی جائے۔“ [سنن ابي داود/كِتَاب اللِّبَاسِ/حدیث: 4044]

سیدنا علی بن ابی طالب رضی اللہ عنہ نے نبی کریم صلی اللہ علیہ وسلم سے یہ حدیث بیان کی اور کہا کہ ”آپ صلی اللہ علیہ وسلم نے رکوع اور سجدے میں قراءت قرآن سے منع فرمایا ہے۔“ [سنن ابي داود/كِتَاب اللِّبَاسِ/حدیث: 4045]

ابراہیم بن عبداللہ نے یہ روایت بیان کی (سیدنا علی رضی اللہ عنہ نے کہا: ”رسول اللہ صلی اللہ علیہ وسلم نے مجھے منع فرمایا ہے“) اس میں یہ مزید بیان کیا: ”میں یہ نہیں کہتا کہ تم لوگوں کو منع کیا ہے۔“ [سنن ابي داود/كِتَاب اللِّبَاسِ/حدیث: 4046]

سیدنا انس بن مالک رضی اللہ عنہ سے روایت ہے کہ آستینوں کو دیکھ رہا ہوں۔ پھر آپ صلی اللہ علیہ وسلم نے اسے سیدنا جعفر رضی اللہ عنہ کے ہاں بھیج دیا۔ انہوں نے اسے پہنا اور آپ کی خدمت میں آئے۔ تو نبی کریم صلی اللہ علیہ وسلم نے فرمایا: ”میں نے یہ تمہیں تمہارے پہننے کے لیے نہیں دیا ہے۔“ انہوں نے کہا: ”تو پھر میں اس کا کیا کروں؟“ آپ صلی اللہ علیہ وسلم نے فرمایا: ”اسے اپنے بھائی نجاشی کے پاس بھیج دو۔“ (یعنی شاہ حبشہ کے ہاں بھیج دو)۔ [سنن ابي داود/كِتَاب اللِّبَاسِ/حدیث: 4047]

سیدنا عمران بن حصین رضی اللہ عنہ سے روایت ہے کہ اللہ کے نبی صلی اللہ علیہ وسلم نے فرمایا: ”میں سرخ رنگ کی ارغوانی زین پر سوار نہیں ہوتا، نہ زرد رنگ کا لباس پہنتا ہوں اور نہ ایسی قمیص پہنتا ہوں جس کی آستینیں ریشم سے گاڑھی گئی ہوں۔“ حسن بصری رحمہ اللہ نے روایت بیان کرنے کے دوران میں اپنی قمیص کے دامن کی طرف اشارہ کیا اور مزید کہا: ”خبردار! مردوں کی خوشبو (زینت) میں مہک ہوتی ہے رنگ نہیں ہوتا اور خبردار! عورتوں کی خوشبو (زینت) میں رنگ ہوتا ہے مہک نہیں ہوتی۔“ سعید بن ابی عروبہ رحمہ اللہ نے کہا: محدثین کرام عورتوں کی خوشبو کے متعلق مذکورہ فرمان کو اس معنی میں لیتے ہیں کہ جب وہ گھر سے باہر نکلیں تو ایسی خوشبو نہ لگائیں جو مہک والی ہو (کہ دوسروں کو ان کی طرف متوجہ کرے)، لیکن جب اپنے شوہر کے پاس ہو تو جیسی چاہے خوشبو لگا لے۔ [سنن ابي داود/كِتَاب اللِّبَاسِ/حدیث: 4048]

ابوالحصین ہیثم بن شفی کا بیان ہے کہ میں اور میرا ایک ساتھی، جس کی کنیت ابوعامر تھی اور وہ قبیلہ معافر سے تعلق رکھتا تھا، ہم روانہ ہوئے کہ بیت المقدس میں جا کر نماز پڑھیں۔ ان دنوں ان لوگوں کا واعظ قبیلہ ازد کا ایک آدمی تھا جسے ابوریحانہ رضی اللہ عنہ کہا جاتا تھا اور وہ صحابی تھے۔ ابوالحصین نے کہا کہ میرا ساتھی مجھ سے پہلے مسجد میں چلا گیا، میں اس کے بعد پہنچا اور اس کے ساتھ جا بیٹھا۔ اس نے مجھ سے پوچھا: ”کیا تم نے ابوریحانہ کے وعظ سے کچھ سنا ہے؟“ میں نے کہا: ”نہیں۔“ اس نے کہا: ”میں نے انہیں کہتے ہوئے سنا ہے کہ رسول اللہ صلی اللہ علیہ وسلم نے دس باتوں سے منع فرمایا ہے: (1) دانت باریک کروانے سے (ان میں قدرے خلا آ جائے اور خوبصورت نظر آئیں) (2) جسم گدوانے سے (کہ اس میں نقش و نگار بنائے جائیں یا نام وغیرہ لکھا جائے) (3) بال نوچنے سے (پلکوں اور چہرے کے کہ خوبصورت نظر آئے) (4) کسی مرد کا کسی دوسرے مرد کے ساتھ لپٹنے سے جبکہ انہوں نے کپڑے نہ پہنے ہوئے ہوں (5) کسی عورت کا دوسری عورت کے ساتھ لپٹنے سے جبکہ انہوں نے کپڑے نہ پہنے ہوں (6) عجمیوں (غیر مسلموں) کی طرح کپڑوں کے نیچے ریشمی استر لگانے سے (7) یا یہ کہ کوئی عجمیوں کی طرح اپنے کندھوں پر ریشمی چادر ڈالے (8) لوٹ مار کرنے سے (9) چیتوں کی کھال بطور گدی یا سیٹ استعمال کرنے سے اور (10) انگوٹھی پہننے سے سوائے اس کے کہ کوئی منصب دار ہو (تو اس کے لیے جائز ہے)۔“ امام ابوداؤد رحمہ اللہ فرماتے ہیں کہ ”اس حدیث میں انگوٹھی کا ذکر منفرد ہے۔“ [سنن ابي داود/كِتَاب اللِّبَاسِ/حدیث: 4049]

سیدنا علی رضی اللہ عنہ سے مروی ہے کہ ”سرخ ارغونی رنگ کے زین پوشوں سے منع کیا گیا ہے۔“ [سنن ابي داود/كِتَاب اللِّبَاسِ/حدیث: 4050]

سیدنا علی رضی اللہ عنہ نے بیان کیا کہ رسول اللہ صلی اللہ علیہ وسلم نے مجھے منع فرمایا: ”کہ میں سونے کی انگوٹھی پہنوں یا «الْقَسِيَّ» ”(ریشمی)“ لباس اختیار کروں یا سرخ رنگ کا زین پوش استعمال کروں۔“ [سنن ابي داود/كِتَاب اللِّبَاسِ/حدیث: 4051]

ام المؤمنین سیدہ عائشہ رضی اللہ عنہا سے منقول ہے کہ رسول اللہ صلی اللہ علیہ وسلم نے ایک منقش اونی چادر میں نماز پڑھی۔ آپ صلی اللہ علیہ وسلم کی نظر اس کے نقوش پر پڑی تو جب نماز سے سلام پھیرا تو فرمایا: ”میری یہ منقش چادر ابوجہم کے پاس لے جاؤ، اس نے مجھے ابھی نماز کے دوران میں مشغول کر دیا تھا، میرے لیے سادہ (انبجانی چادر) چادر لے آؤ۔“ امام ابوداؤد رحمہ اللہ فرماتے ہیں کہ ”ابوجہم بن حذیفہ، بنو عدی بن کعب بن غانم کے فرد تھے۔“ [سنن ابي داود/كِتَاب اللِّبَاسِ/حدیث: 4052]

عثمان بن ابی شیبہ اور ان کے دوسرے ساتھی بیان کرتے ہیں کہ سفیان نے بواسطہ زہری، عروہ سے، انہوں نے ام المؤمنین سیدہ عائشہ رضی اللہ عنہا سے مذکورہ بالا حدیث کی مانند روایت کیا۔ اور مذکورہ بالا روایت زیادہ جامع ہے۔ [سنن ابي داود/كِتَاب اللِّبَاسِ/حدیث: 4053]