حضرت ابودرداء رضی اللہ عنہ سے روایت ہے کہ رسول اللہ صلی اللہ علیہ وسلم نماز کے لیے کھڑے ہوئے تو ہم نے آپ صلی اللہ علیہ وسلم کو یہ کہتے ہوئے سنا: «أَعُوذُ بِاللَّهِ مِنْكَ» ”میں تجھ سے اللہ کی پناہ میں آتا ہوں“، پھر آپ صلی اللہ علیہ وسلم نے فرمایا: «أَلْعَنُكَ بِلَعْنَةِ اللَّهِ» ”میں تجھ پر اللہ کی لعنت بھیجتا ہوں“، تین بار اور آپ صلی اللہ علیہ وسلم نے اپنا ہاتھ بڑھایا گویا کہ آپ صلی اللہ علیہ وسلم کسی چیز کو پکڑ رہے ہیں؛ تو جب آپ صلی اللہ علیہ وسلم نماز سے فارغ ہوئے ہم نے پوچھا: ”اے اللہ کے رسول صلی اللہ علیہ وسلم ! ہم نے آپ صلی اللہ علیہ وسلم کو نماز میں کچھ کہتے سنا ہے، ہم نے اس سے پہلے آپ صلی اللہ علیہ وسلم کو یہ کلمات کہتے نہیں سنا اور ہم نے آپ صلی اللہ علیہ وسلم کو اپنا ہاتھ بڑھاتے دیکھا“، آپ صلی اللہ علیہ وسلم نے فرمایا: ”اللہ کا دشمن ابلیس، آگ کا ایک انگارا لے کر آیا تاکہ میرے چہرے پر ڈال دے تو میں نے تین دفعہ «أَعُوذُ بِاللَّهِ مِنْكَ» ”میں اللہ کی پناہ مانگتا ہوں تجھ سے“ کہا، پھر میں نے تین دفعہ کہا: «أَلْعَنُكَ بِلَعْنَةِ اللَّهِ التَّامَّةِ» ”میں تجھ پر اللہ کی کامل لعنت بھیجتا ہوں“، وہ پیچھے نہ ہٹا پھر میں نے اس کو پکڑنے کا ارادہ کر لیا، اللہ کی قسم! اگر ہمارے بھائی سلیمان علیہ السلام کی دعا نہ ہوتی تو وہ صبح تک باندھ دیا جاتا اور اہل مدینہ کے بچے اس کے ساتھ کھیلتے۔“ [صحيح مسلم/كتاب المساجد ومواضع الصلاة/حدیث: 1211]

حضرت ابو قتادہ رضی اللہ عنہ بیان کرتے ہیں کہ ”رسول اللہ صلی اللہ علیہ وسلم اپنی بیٹی زینب رضی اللہ عنہا کی بیٹی امامہ رضی اللہ عنہا کو اٹھا کر نماز پڑھ لیتے تھے، جو ابو العاص بن ربیع رضی اللہ عنہ کی بیٹی تھیں، جب آپ صلی اللہ علیہ وسلم قیام میں ہوتے تو اسے اٹھا لیتے اور جب سجدہ فرماتے تو اسے زمین پر بٹھا دیتے“، یحییٰ نے کہا، امام مالک رحمہ اللہ نے جواب دیا: ”ہاں (یہ روایت مجھے سنائی ہے)۔“ [صحيح مسلم/كتاب المساجد ومواضع الصلاة/حدیث: 1212]

حضرت ابو قتادہ انصاری رضی اللہ عنہ سے روایت ہے کہ ”میں نے نبی اکرم صلی اللہ علیہ وسلم کو دیکھا، لوگوں کو نماز پڑھا رہے ہیں اور ابو العاص رضی اللہ عنہ کی بیٹی امامہ رضی اللہ عنہا، جو نبی اکرم صلی اللہ علیہ وسلم کی بیٹی زینب رضی اللہ عنہا کی بیٹی ہیں، وہ آپ صلی اللہ علیہ وسلم کے کندھے پر تھیں، جب آپ صلی اللہ علیہ وسلم رکوع میں جاتے تو اسے زمین پر اتار دیتے اور جب سجدہ سے اٹھتے تو اسے پھر کندھے پر بٹھا لیتے۔“ [صحيح مسلم/كتاب المساجد ومواضع الصلاة/حدیث: 1213]

حضرت ابو قتادہ انصاری رضی اللہ عنہ بیان کرتے ہیں کہ ”میں نے رسول اللہ صلی اللہ علیہ وسلم کو دیکھا، آپ صلی اللہ علیہ وسلم لوگوں کو امامت کرا رہے تھے اور ابو العاص رضی اللہ عنہ کی بیٹی امامہ رضی اللہ عنہا آپ صلی اللہ علیہ وسلم کی گردن پر تھیں، جب آپ صلی اللہ علیہ وسلم سجدہ کرتے تو ان کو بٹھا دیتے (گردن سے اتار دیتے)۔“ [صحيح مسلم/كتاب المساجد ومواضع الصلاة/حدیث: 1214]

حضرت ابو قتادہ رضی اللہ عنہ بیان کرتے ہیں: ”ہم مسجد میں بیٹھے ہوئے تھے کہ رسول اللہ صلی اللہ علیہ وسلم ہمارے پاس تشریف لائے، پھر مذکورہ بالا راویوں کے ہم معنی روایت سنائی، فرق یہ ہے اس نے یہ بیان نہیں کیا کہ اس نماز میں آپ صلی اللہ علیہ وسلم نے لوگوں کی امامت فرمائی تھی۔“ [صحيح مسلم/كتاب المساجد ومواضع الصلاة/حدیث: 1215]

حضرت عبدالعزیز بن ابی حازم رحمہ اللہ اپنے باپ کے واسطہ سے بیان کرتے ہیں کہ کچھ لوگ حضرت سہل بن سعد رضی اللہ عنہ کی خدمت میں حاضر ہوئے اور وہ منبر نبوی صلی اللہ علیہ وسلم کے بارے میں جھگڑ رہے تھے کہ وہ کس لکڑی سے بنا ہے؟ تو انہوں نے کہا: ”ہاں اللہ کی قسم! میں اچھی طرح جانتا ہوں کہ وہ کس لکڑی کا ہے اور اسے کس نے بنایا ہے اور رسول اللہ صلی اللہ علیہ وسلم جب پہلے دن اس پر بیٹھے تھے میں نے آپ صلی اللہ علیہ وسلم کو دیکھا تھا،“ میں (ابو حازم) نے کہا: ”اے ابو عباس! تو ہمیں بتائیے،“ انہوں نے کہا: ”رسول اللہ صلی اللہ علیہ وسلم نے ایک عورت کی طرف پیغام بھیجا (ابو حازم نے کہا، وہ اس دن اس کا نام بھی بتا رہے تھے) کہ: ”اپنے بڑھئی غلام کو دیکھو (اور کہو) وہ مجھے لکڑیوں کو جوڑ کر (منبر بنا دے) میں ان پر لوگوں سے گفتگو کروں گا،“ تو اس نے تین سیڑھیاں بنائیں، پھر رسول اللہ صلی اللہ علیہ وسلم نے اس کے بارے میں حکم دیا اور اسے اس جگہ پر رکھ دیا گیا اور وہ مدینہ کے جنگل کے جھاؤ سے بنا تھا، میں نے رسول اللہ صلی اللہ علیہ وسلم کو دیکھا اس پر کھڑے ہوئے اور تکبیر کہی اور لوگوں نے بھی آپ صلی اللہ علیہ وسلم کے پیچھے تکبیر کہی اور آپ صلی اللہ علیہ وسلم منبر پر ہی تھے، پھر آپ صلی اللہ علیہ وسلم (رکوع سے) اٹھے اور الٹے پاؤں نیچے اترے، حتیٰ کہ منبر کی جڑ میں سجدہ کیا، پھر دوبارہ منبر پر کھڑے ہو گئے، حتیٰ کہ نماز پوری کر کے فارغ ہو گئے، پھر لوگوں کی طرف متوجہ ہوئے اور فرمایا: ”اے لوگو! میں نے یہ کام اس لیے کیا ہے تاکہ تم میری اقتدا کرو اور میری نماز سیکھ لو یا جان لو“ (اگر «تَعَلَّمُوا» ہو تو معنی ”سیکھ لو“ ہو گا اور اگر «تَعْلَمُوا» ہو تو معنی ”جان لو“ ہو گا)۔“ [صحيح مسلم/كتاب المساجد ومواضع الصلاة/حدیث: 1216]

حضرت ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ”آدمی کو کوکھ پر ہاتھ رکھ کر نماز پڑھنے سے منع فرمایا“، ابوبکر کی روایت میں، نبی کے بجائے رسول اللہ صلی اللہ علیہ وسلم کا لفظ ہے۔ [صحيح مسلم/كتاب المساجد ومواضع الصلاة/حدیث: 1218]

حضرت معیقیب رضی اللہ عنہ سے روایت ہے کہ نبی اکرم صلی اللہ علیہ وسلم نے مسجد میں کنکریاں ہموار کرنے کا تذکرہ فرمایا کہ ”اگر اس کے بغیر چارہ نہ ہو تو ایک دفعہ (ایک بار) کر لو۔“ [صحيح مسلم/كتاب المساجد ومواضع الصلاة/حدیث: 1219]

حضرت معیقیب رضی اللہ عنہ سے روایت ہے کہ انہوں نے نبی اکرم صلی اللہ علیہ وسلم سے نماز میں ہاتھ پھیرنے کے بارے میں سوال کیا تو آپ صلی اللہ علیہ وسلم نے فرمایا: ”ایک بار۔“ [صحيح مسلم/كتاب المساجد ومواضع الصلاة/حدیث: 1220]