حضرت ابن عباس رضی اللہ عنہما فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا جب تم رکوع کرو تو اس میں اپنے رب کی تعظیم بیان کرو اور جب سجدہ کرو تو خوب دعا کرو۔ بہت امکان ہے کہ تمہاری یہ دعا قبول ہوجائے۔ [مصنف ابن ابي شيبه/كتاب الصلوات/حدیث: 2580]

حضرت علی رضی اللہ عنہ سے روایت ہے، رسول اللہ صلی اللہ علیہ وآلہ وسلم نے فرمایا کہ مجھے اس بات سے منع کیا گیا ہے میں رکوع اور سجدوں میں قرآن کی تلاوت کروں۔ جب تم رکوع کرو تو اللہ تعالیٰ کی تعظیم بیان کرو اور جب سجدہ کرو تو خوب دعاکرو ہوسکتا ہے کہ تمہاری یہ دعا قبول ہوجائے۔ [مصنف ابن ابي شيبه/كتاب الصلوات/حدیث: 2581]

حضرت ابن مسعود فرماتے ہیں کہ رکوع اور سجود میں تین تین تسبیحات ہیں۔ [مصنف ابن ابي شيبه/كتاب الصلوات/حدیث: 2582]

حضرت ابراہیم بن میسرہ فرماتے ہیں کہ مجھے یہ بات پہنچی ہے کہ حضرت عمر رکوع اور سجود میں پانچ تسبیحات کے برابر سبحان اللہ وبحمدہ کہا کرتے تھے۔ [مصنف ابن ابي شيبه/كتاب الصلوات/حدیث: 2583]

حضرت علی رضی اللہ عنہ فرماتے ہیں کہ جب تم میں سے کوئی رکوع کرے تو یہ کلمات کہے: اے اللہ! میں نے تیرے لئے رکوع کیا، میں تیرے لئے جھکا، میں تجھ پر ایمان لایا، میں نے تجھ پر بھروسہ کیا، اور تین مرتبہ کہے: میرا رب پاک ہے، عظمت والا ہے۔ پھر جب سجدہ کرے تو تین مرتبہ یہ کلمات کہے: میرا رب پاک ہے بلند ہے۔ اگر اسے کسی کام کی جلدی ہو اور وہ صرف ”میرا رب پاک ہے، عظمت والا ہے“ کہہ کر باقی چھوڑ دے تو یہ بھی اس کے لئے کافی ہے۔ [مصنف ابن ابي شيبه/كتاب الصلوات/حدیث: 2584]

حضرت اسحاق بن عبد اللہ کہتے ہیں کہ حضرت اسماعیل بن عبید اللہ نے حضرت ابوہریرہ سے سوال کیا کہ میں ایک کانا آدمی ہوں، ہم سجدوں کی تسبیح میں کیا کہیں؟ فرمایا تین تسبیحات پڑھا کرو۔ [مصنف ابن ابي شيبه/كتاب الصلوات/حدیث: 2585]

حضرت مجاہد فرماتے ہیں کہ میں نے حضرت عمر بن عبد العزیز کے پیچھے نماز پڑھی، میں نے گنا کہ انہوں نے رکوع میں چار یا پانچ مرتبہ تسبیحات پڑھیں اور سجدے میں پانچ یا چھ مرتبہ۔ [مصنف ابن ابي شيبه/كتاب الصلوات/حدیث: 2586]

حضرت جعفر اپنے والد سے روایت کرتے ہیں کہ ایندھن اکٹھا کرنے والوں کی ایک جماعت حضور صلی اللہ علیہ وآلہ وسلم کی خدمت میں حاضر ہوئی اور عرض کیا ”یارسول اللہ! ہم ہمیشہ سفر میں رہتے ہیں ہم نماز کیسے ادا کریں؟ آپ صلی اللہ علیہ وآلہ وسلم نے فرمایا ”رکوع میں تین تسبیحات پڑھو اور سجدوں میں بھی تین تسبیحات پڑھو۔ [مصنف ابن ابي شيبه/كتاب الصلوات/حدیث: 2587]

حضرت حسن فرماتے ہیں کہ جس شخص نے رکوع اور سجود میں تسبیحات نہ پڑھیں اس کی نماز اطمینان سے خالی اور عجلت کا شکار ہے۔ [مصنف ابن ابي شيبه/كتاب الصلوات/حدیث: 2588]

حضرت حسن فرمایا کرتے تھے کہ درمیانہ رکوع اور سجدہ یہ ہے کہ آدمی تین تین مرتبہ سُبْحَانَ اللہِ وَبِحَمْدِہِ کہے۔ [مصنف ابن ابي شيبه/كتاب الصلوات/حدیث: 2589]