حضرت حسن فرمایا کرتے تھے کہ مکمل سجدہ یہ ہے کہ آدمی سات مرتبہ تسبیحات کہے اور جائز سجدہ یہ ہے کہ تین مرتبہ کہے۔ [مصنف ابن ابي شيبه/كتاب الصلوات/حدیث: 2590]

حضرت محمد بن کعب فرماتے ہیں کہ سب سے کم درجہ کا سجدہ یہ ہے کہ تم اپنی پیشانی زمین پر رکھ کر تین مرتبہ سُبْحَانَ رَبِّی الأَعْلَی کہو۔ [مصنف ابن ابي شيبه/كتاب الصلوات/حدیث: 2591]

حضرت مسیب بن رافع نے ابراہیم سے سوال کیا کہ سجدہ میں کتنی تسبیحات کافی ہیں، فرمایا ”تین تسبیحات“ [مصنف ابن ابي شيبه/كتاب الصلوات/حدیث: 2592]

حضرت جعفر بن برقان فرماتے ہیں کہ میں نے حضرت میمون سے رکوع اور سجود کی مقدار کے بارے میں سوال کیا تو انہوں نے فرمایا کہ یہ تین تسبیحات کی مقدار سے کم نہیں ہونے چاہئیں۔ حضرت جعفر کہتے ہیں کہ پھر میں نے حضرت زہری سے سوال کیا تو انہوں نے فرمایا کہ جب ہڈیاں اپنی جگہ پر آجائیں اور ٹھہر جائیں۔ میں نے ان سے کہا کہ حضرت میمون تو تین تسبیحات فرماتے ہیں، انہوں نے فرمایا کہ میں جو تمہیں کہہ رہا ہوں وہ بھی تقریباً اتنی ہی مقدار ہے۔ [مصنف ابن ابي شيبه/كتاب الصلوات/حدیث: 2593]

حضرت ابن مسعود فرماتے ہیں کہ رکوع اور سجود میں تین تسبیحات پڑھنا درمیانی مقدار ہے۔ [مصنف ابن ابي شيبه/كتاب الصلوات/حدیث: 2594]

حضرت ابو الضحیٰ فرماتے ہیں کہ حضرت علی رکوع میں تین مرتبہ سُبْحَانَ رَبِّی الْعَظِیمِ اور سجدوں میں تین مرتبہ سُبْحَانَ رَبِّی الأَعْلَی کہا کرتے تھے۔ [مصنف ابن ابي شيبه/كتاب الصلوات/حدیث: 2595]

حضرت عائشہ رضی اللہ عنہا روایت کرتی ہیں کہ حضور صلی اللہ علیہ وآلہ وسلم رکوع اور سجود میں یہ کلمات کہا کرتے تھے: اللہ بہت پاک ہے، بہت پاکیزگی والا ہے، فرشتوں اور روح القدس کا رب ہے“ [مصنف ابن ابي شيبه/كتاب الصلوات/حدیث: 2596]

حضرت ابن مسعود فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا کہ جب تم میں سے کوئی رکوع کرے تین مرتبہ سُبْحَانَ رَبِّی الْعَظِیمِ کہے۔ اور جب سجدہ کرے تو تین مرتبہ سُبْحَانَ رَبِّی الأَعْلَی کہے۔ جب ایسا کرلیا تو رکوع اور سجدہ کامل انداز میں ادا ہوگئے۔ اور یہ ان کی ادنیٰ مقدار ہے۔ [مصنف ابن ابي شيبه/كتاب الصلوات/حدیث: 2597]

حضرت یحییٰ بن جزار کہتے ہیں کہ حضرت ابن مسعود نے اپنے رکوع میں فرمایا ”اے میرے رب! میری مغفرت فرما“ [مصنف ابن ابي شيبه/كتاب الصلوات/حدیث: 2598]

ایک مدنی شخص بتاتے ہیں کہ حضرت سعد کی صاحبزادی رکوع میں حد سے زیادہ جھکنے کی عجیب کوشش کیا کرتی تھیں۔ حضرت سعد نے ان سے فرمایا کہ تمہارے لئے اتنا کافی ہے کہ تم اپنے ہاتھ اپنے گھٹنوں پر رکھ دو۔ [مصنف ابن ابي شيبه/كتاب الصلوات/حدیث: 2599]