ثقفی، یونس سے روایت کرتے ہیں، انہوں نے کہا: ”میں نے ابن سیرین کو مسجد میں سوتے ہوئے دیکھا۔“ [مصنف ابن ابي شيبه/سجود السهو والعمل في الصلاة/حدیث: 5001]

ہشام، حسن بصری سے روایت کرتے ہیں، انہوں نے فرمایا: ”ان کے پاس ایک «مسجد» (نماز کے لیے مخصوص جگہ) تھی جس میں وہ نماز ادا کرتے اور وہیں سوتے تھے۔“ [مصنف ابن ابي شيبه/سجود السهو والعمل في الصلاة/حدیث: 5002]

حضرت ابن عمر رضی اللہ عنہما فرماتے ہیں کہ ہم نوجوان تھے اور نبی کریم صلی اللہ علیہ وآلہ وسلم کے زمانے میں مسجد میں رات بھی گذارتے تھے اور دن کو بھی سوتے تھے۔ [مصنف ابن ابي شيبه/سجود السهو والعمل في الصلاة/حدیث: 5003]

حضرت عطاء فرماتے ہیں کہ ایک آدمی نے حضرت ابن عباس رضی اللہ عنہما سے کہا کہ میں مسجد حرام میں سو گیا اور مجھے احتلام ہوگیا تو کیا مسجد میں سونا جائز ہے؟ انہوں نے فرمایا کہ مسجد کو رات گذارنے اور قیلولہ کرنے کی جگہ بنانا تو جائز نہیں۔ البتہ کچھ دیر کے لیے آرام کرنا یا کسی کام کا انتظار کرنا جائز ہے۔ [مصنف ابن ابي شيبه/سجود السهو والعمل في الصلاة/حدیث: 5004]

سیدنا عطاء، طاؤس اور مجاہد رحمہم اللہ سے روایت ہے کہ وہ مسجد میں سونے کو ناپسند فرماتے تھے۔ [مصنف ابن ابي شيبه/سجود السهو والعمل في الصلاة/حدیث: 5005]

ابنِ جریج سے روایت ہے، انہوں نے کہا کہ میں نے عطاء سے پوچھا: ”کیا آپ مسجد میں سونے کو ناپسند کرتے ہیں؟“ انہوں نے جواب دیا: ”بلکہ میں تو اسے پسند کرتا ہوں۔“ [مصنف ابن ابي شيبه/سجود السهو والعمل في الصلاة/حدیث: 5006]

ابوالہیثم رحمہ اللہ سے روایت ہے، انہوں نے کہا: ”امام مجاہد رحمہ اللہ نے مجھے مساجد میں سونے سے منع فرمایا تھا۔“ [مصنف ابن ابي شيبه/سجود السهو والعمل في الصلاة/حدیث: 5007]

حضرت ایمن بن نابل کہتے ہیں کہ حضرت سعید بن جبیر نے مجھے حطیم میں سویا دیکھا تو جگا دیا اور فرمایا کہ تجھ جیسا آدمی بھی یہاں پڑا سو رہا ہے؟ [مصنف ابن ابي شيبه/سجود السهو والعمل في الصلاة/حدیث: 5008]

ابو عمرو الشیبانی سے روایت ہے، انہوں نے بیان کیا کہ میں نے سیدنا عبداللہ بن مسعود رضی اللہ عنہ کو دیکھا کہ وہ رات کے وقت مسجد میں «يعس» (نگرانی کے لیے گشت) کیا کرتے تھے، وہ مسجد میں کسی بھی شخص کا ہیولیٰ (سایہ) دیکھتے تو اسے وہاں سے باہر نکال دیتے تھے، سوائے اس شخص کے جو نماز پڑھ رہا ہوتا۔ [مصنف ابن ابي شيبه/سجود السهو والعمل في الصلاة/حدیث: 5009]

مغیرہ بن زیاد سے روایت ہے، انہوں نے کہا کہ میں مسجد حرام میں سویا کرتا تھا، ایک رات مجھے کئی مرتبہ احتلام ہوا، پھر میں نے امام عطاء بن ابی رباح سے اس کے متعلق سوال کیا تو انہوں نے فرمایا: ”تم (وہیں) سو جایا کرو، خواہ تمہیں دس بار ہی احتلام کیوں نہ ہو جائے۔“ [مصنف ابن ابي شيبه/سجود السهو والعمل في الصلاة/حدیث: 5010]