سیدنا عبداللہ بن مسعود رضی اللہ عنہ سے روایت ہے، انہوں نے فرمایا: ”جس شخص نے جمعہ کی نماز پالی تو وہ دو رکعت ہے اور جو اسے نہ پا سکے تو اسے چاہیے کہ وہ چار رکعتیں پڑھے۔“ [مصنف ابن ابي شيبه/كتاب الجمعة/حدیث: 5441]

سیدنا عبداللہ بن عمر رضی اللہ عنہما سے روایت ہے، انہوں نے کہا: ”جس شخص نے نمازِ جمعہ کی ایک «ركعة» (رکعت) پالی، تو اسے چاہیے کہ وہ اس کے ساتھ دوسری رکعت کا اضافہ کر کے (اپنی نماز مکمل) کر لے۔“ [مصنف ابن ابي شيبه/كتاب الجمعة/حدیث: 5442]

حضرت مغیرہ فرماتے ہیں کہ حضرت ابو معمر نے ایک مرتبہ فرمایا کہ ایک چیز ایسی تھی جس کے بارے میں میں حضرت اسود سے سوال کرنا چاہتا تھا۔ ابراہیم نے پوچھا کہ وہ کیا چیز ہے؟ شاید میں آپ کی یہ ضرورت پوری کرسکوں۔ حضرت ابو معمر نے فرمایا کہ وہ آدمی جسے جمعہ کی ایک رکعت ملے وہ کیا کرے؟ ابراہیم نے فرمایا کہ حضرت اسود فرماتے ہیں کہ جسے جمعہ کی ایک رکعت ملے وہ اس کے ساتھ ایک رکعت اور ملائے اور جسے ایک رکوع بھی نہ ملے وہ چار رکعات پڑھ لے۔ [مصنف ابن ابي شيبه/كتاب الجمعة/حدیث: 5443]

امام شعبی رحمہ اللہ سے روایت ہے، انہوں نے کہا: ”جس نے خطبہ پا لیا تو اسے جمعہ مل گیا، اور جس نے (امام کے ساتھ) دو رکعتیں پا لیں تو اسے بھی جمعہ مل گیا، اور جس نے (امام کے ساتھ) ایک رکعت پالی تو اس نے یقیناً جمعہ پا لیا، پس وہ (امام کے سلام کے بعد) ایک اور رکعت پڑھ لے، لیکن جو شخص (دوسری رکعت کا) رکوع نہ پا سکے تو وہ چار رکعتیں (بطورِ ظہر) ادا کرے۔“ [مصنف ابن ابي شيبه/كتاب الجمعة/حدیث: 5444]

0 [مصنف ابن ابي شيبه/كتاب الجمعة/حدیث: 5445]

ابراہیم سے بھی اسی طرح منقول ہے۔ [مصنف ابن ابي شيبه/كتاب الجمعة/حدیث: 5446]

اور حضرت شعبی سے منقول ہے، ان حضرات نے فرمایا کہ جسے جمعہ کی ایک رکعت ملے وہ اس کے ساتھ ایک اور رکعت ملالے اور جسے رکوع نہ ملے وہ چار رکعتیں پڑھے۔ [مصنف ابن ابي شيبه/كتاب الجمعة/حدیث: 5447]

سیدنا عبداللہ بن مسعود رضی اللہ عنہ سے روایت ہے، انہوں نے کہا: ”جو شخص جمعہ کے دن (دوسری رکعت کا) رکوع نہ پا سکے، وہ چار رکعات (یعنی ظہر) ادا کرے۔“ [مصنف ابن ابي شيبه/كتاب الجمعة/حدیث: 5448]

سیدنا انس رضی اللہ عنہ اور سعید بن مسیب رحمہ اللہ سے روایت ہے، ان دونوں نے کہا: ”جس شخص نے (نمازِ جمعہ کی) ایک رکعت پالی، وہ اس کے ساتھ دوسری رکعت ملا لے۔“ [مصنف ابن ابي شيبه/كتاب الجمعة/حدیث: 5449]

امام حسن بصری اور امام محمد بن سیرین رحمہما اللہ سے روایت ہے، ان دونوں نے فرمایا: ”جب کوئی شخص جمعہ کی ایک رکعت پا لے تو وہ اس کے ساتھ ایک اور رکعت ملا لے۔“ [مصنف ابن ابي شيبه/كتاب الجمعة/حدیث: 5450]