سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس شخص نے جمعہ کے دن اس وقت گفتگو کی جب امام خطبہ دے رہا ہو، تو وہ اس گدھے کی مانند ہے ﴿يَحْمِلُ أَسْفَارًا﴾ ”جو بہت سی کتابیں لادے ہوئے ہو“ [سورة الجمعة: 5] اور جس شخص نے (بات کرنے والے سے) یہ کہا کہ ”خاموش ہو جاؤ“ تو اس کے لیے بھی جمعہ (کا ثواب) نہیں ہے۔“ [مصنف ابن ابي شيبه/كتاب الجمعة/حدیث: 5411]

حضرت جابر فرماتے ہیں کہ ایک مرتبہ جمعہ کے دن حضرت سعد نے ایک آدمی سے کہا کہ تمہاری نماز نہیں ہوئی۔ اس آدمی نے اس بات کا ذکر نبی صلی اللہ علیہ وآلہ وسلم سے کیا اور کہا کہ سعد نے مجھے کہا ہے کہ تمہاری نماز نہیں ہوئی۔ حضور صلی اللہ علیہ وآلہ وسلم نے حضرت سعد سے پوچھا کہ تم نے ایسا کیوں کہا؟ انہوں نے عرض کیا کہ جب آپ خطبہ دے رہے تھے تو اس نے بات کی تھی۔ حضور صلی اللہ علیہ وآلہ وسلم نے فرمایا کہ سعد ٹھیک کہتے ہیں۔ [مصنف ابن ابي شيبه/كتاب الجمعة/حدیث: 5412]

حضرت ابن ابی اوفیٰ فرماتے ہیں کہ جو جمعہ کی نماز کے دوران تین کاموں سے محفوظ رہا اس کے اس جمعہ سے گذشتہ جمعے تک کے تمام گناہ معاف ہوجاتے ہیں: ایک کوئی نامناسب کام (حدث) کرنے سے، اس سے ان کی مراد پیٹ سے خارج ہونے والی گندگی نہیں تھی، دوسرا بات کرنے سے اور تیسرا کسی کو خاموش کرانے سے۔ [مصنف ابن ابي شيبه/كتاب الجمعة/حدیث: 5413]

سیدنا ابوہریرہ رضی اللہ عنہ سے روایت ہے کہ انہوں نے فرمایا: ”اگر کسی شخص نے جمعہ کے دن اس حال میں کہ امام خطبہ دے رہا ہو (کسی کو) کہا: «صه» ”خاموش ہو جاؤ“، تو یقیناً اس نے لغو حرکت کی۔“ [مصنف ابن ابي شيبه/كتاب الجمعة/حدیث: 5414]

حضرت اسماعیل بن ابی خالد فرماتے ہیں کہ میں نے ابراہیم کو جمعہ کے دن دورانِ خطبہ ایک آدمی سے بات کرتے دیکھا ہے۔ [مصنف ابن ابي شيبه/كتاب الجمعة/حدیث: 5415]

عروہ بن زبیر رحمہ اللہ سے روایت ہے کہ وہ جمعہ کے دن اس صورت میں گفتگو کرنے میں کوئی حرج محسوس نہیں کرتے تھے جب خطبہ سنائی نہ دے رہا ہو۔ [مصنف ابن ابي شيبه/كتاب الجمعة/حدیث: 5416]

حضرت اسماعیل بن ابراہیم اپنے والد سے روایت کرتے ہیں کہ انہوں نے فرمایا: میں نے حضرت ابراہیم اور حضرت سعید بن جبیر کو حجاج بن یوسف کے خطبے کے دوران گفتگو کرتے دیکھا۔ [مصنف ابن ابي شيبه/كتاب الجمعة/حدیث: 5417]

حضرت زہری فرماتے ہیں کہ نبی کریم صلی اللہ علیہ وآلہ وسلم بعض اوقات جمعہ کے دن منبر سے اترنے کے بعد نماز شروع کرنے سے پہلے کسی ضرورت کی بات کرلیا کرتے تھے۔ [مصنف ابن ابي شيبه/كتاب الجمعة/حدیث: 5418]

ہشام بن عروہ سے روایت ہے، انہوں نے کہا: ”میں نے اپنے والد اور ان معتبر اسلاف کو پایا جن کی علمی ثقاہت پر ہمیں اطمینان تھا اور جن سے ہم علم حاصل کیا کرتے تھے «نرضاه ونأخذ عنهم»، وہ اس بات میں کوئی حرج محسوس نہیں کرتے تھے کہ جب امام منبر سے نیچے اتر آئے تو اس وقت سے لے کر نماز شروع ہونے تک گفتگو کی جائے۔“ [مصنف ابن ابي شيبه/كتاب الجمعة/حدیث: 5419]

ابراہیم بن میسرہ سے روایت ہے، انہوں نے بیان کیا کہ طاؤس رحمہ اللہ نے مجھ سے اس وقت گفتگو فرمائی جب سلیمان منبر سے نیچے اترے۔ [مصنف ابن ابي شيبه/كتاب الجمعة/حدیث: 5420]