نافع سیدنا عبداللہ بن عمر رضی اللہ عنہما سے روایت کرتے ہیں کہ وہ جمعہ کے دن بہت جلدی مسجد تشریف لے جاتے اور امام کے (خطبہ کے لیے) برآمد ہونے سے قبل طویل نماز ادا کیا کرتے تھے۔ [مصنف ابن ابي شيبه/كتاب الجمعة/حدیث: 5471]

عمرو بن عثمان سے روایت ہے کہ عمر بن عبدالعزیز رحمہ اللہ نے فرمایا: ”جمعہ کی نماز سے پہلے 10 رکعات ادا کیا کرو۔“ [مصنف ابن ابي شيبه/كتاب الجمعة/حدیث: 5472]

ابراہیم نخعی رحمہ اللہ سے روایت ہے، انہوں نے کہا: ”وہ (صحابہ کرام) اس (نمازِ جمعہ) سے پہلے چار رکعات ادا کیا کرتے تھے۔“ [مصنف ابن ابي شيبه/كتاب الجمعة/حدیث: 5473]

ابو مجلز رحمہ اللہ سے روایت ہے کہ وہ جمعہ کے دن (نمازِ جمعہ کے بعد) اپنے گھر میں دو رکعتیں ادا کیا کرتے تھے۔ [مصنف ابن ابي شيبه/كتاب الجمعة/حدیث: 5474]

ابن طاؤس اپنے والد سے روایت کرتے ہیں کہ وہ جمعہ کے دن اس وقت تک مسجد تشریف نہیں لاتے تھے جب تک کہ اپنے گھر میں دو رکعت نماز ادا نہ کر لیتے۔ [مصنف ابن ابي شيبه/كتاب الجمعة/حدیث: 5475]

سیدنا عبداللہ بن عمر رضی اللہ عنہما سے روایت ہے کہ نبی کریم صلی اللہ علیہ وسلم جمعہ کی نماز کے بعد دو رکعتیں ادا فرمایا کرتے تھے۔ [مصنف ابن ابي شيبه/كتاب الجمعة/حدیث: 5476]

سیدنا عمران بن حصین رضی اللہ عنہ سے روایت ہے کہ وہ جمعہ کے بعد دو رکعتیں پڑھا کرتے تھے، ان سے عرض کیا گیا: ”اے ابونجید! لوگ کیا باتیں کر رہے ہیں؟“ انہوں نے پوچھا: ”وہ کیا کہتے ہیں؟“ عرض کیا گیا: ”وہ کہتے ہیں کہ آپ جمعہ کے ساتھ (ملا کر) دو رکعتیں پڑھتے ہیں جس سے یہ چار (رکعتیں) ہو جاتی ہیں“، تو عمران رضی اللہ عنہ نے فرمایا: ”میرے پہلوؤں کے درمیان «النيازك» (چھوٹے نیزوں) کا آر پار ہو جانا مجھے اس بات سے زیادہ پسند ہے کہ میں ایسا (قصداً) کروں“، پھر جب اگلا جمعہ آیا تو انہوں نے جمعہ کی نماز پڑھی اور پھر احتباء کیا (گھٹنوں کو سینے کے ساتھ لگا کر بیٹھ گئے) اور عصر کی نماز کی اقامت ہونے تک کوئی (نفل) نماز نہیں پڑھی۔ [مصنف ابن ابي شيبه/كتاب الجمعة/حدیث: 5477]

ابوعبدالرحمن سلمی سے روایت ہے، انہوں نے بیان کیا کہ سیدنا عبداللہ بن مسعود رضی اللہ عنہ ہمارے پاس تشریف لائے تو وہ ہمیں جمعہ کے بعد چار رکعتیں پڑھنے کا حکم دیا کرتے تھے، پھر جب ہمارے پاس سیدنا علی رضی اللہ عنہ تشریف لائے تو انہوں نے ہمیں (جمعہ کے بعد) چھ رکعتیں پڑھنے کا حکم دیا، چنانچہ ہم نے سیدنا علی رضی اللہ عنہ کے قول کو اختیار کر لیا اور سیدنا عبداللہ بن مسعود رضی اللہ عنہ کے قول کو ترک کر دیا۔ راوی نے (نماز کی کیفیت کے متعلق) کہا: ”وہ پہلے دو رکعتیں اور پھر چار رکعتیں پڑھا کرتے تھے۔“ [مصنف ابن ابي شيبه/كتاب الجمعة/حدیث: 5478]

عبداللہ بن حبیب سے روایت ہے، انہوں نے بیان کیا: ”سیدنا عبداللہ بن مسعود رضی اللہ عنہ چار رکعتیں پڑھا کرتے تھے، پھر جب سیدنا علی رضی اللہ عنہ تشریف لائے تو انہوں نے چھ رکعتیں پڑھیں، یعنی پہلے دو رکعتیں اور پھر چار رکعتیں۔“ [مصنف ابن ابي شيبه/كتاب الجمعة/حدیث: 5479]

عطاء سے روایت ہے، انہوں نے کہا: ”سیدنا عبداللہ بن عمر رضی اللہ عنہما جب جمعہ کی نماز پڑھ لیتے تو اس کے بعد چھ رکعتیں ادا فرماتے تھے، جن میں (پہلے) دو رکعتیں اور پھر چار رکعتیں پڑھتے تھے۔“ [مصنف ابن ابي شيبه/كتاب الجمعة/حدیث: 5480]