حضرت عبداللہ بن زید فرماتے ہیں کہ میں رسول اللہ صلی اللہ علیہ وآلہ وسلم کے ساتھ بارش کی دعا کے لئے عید گاہ کی طرف گیا، جب آپ نے دعا کی قبلہ کی طرف رخ کیا اور اپنی چادر کو پلٹ لیا۔ [مصنف ابن ابي شيبه/كتاب صلاة التطوع والإمامة/حدیث: 8563]

حضرت ابو مروان اسلمی کہتے ہیں کہ ہم حضرت عمر بن خطاب کے ساتھ بارش کی دعا کرنے نکلے، انہوں نے صرف استغفار کی دعا کی۔ [مصنف ابن ابي شيبه/كتاب صلاة التطوع والإمامة/حدیث: 8564]

حضرت شعبی فرماتے ہیں کہ حضرت عمر بن خطاب بارش کی دعا کے لئے نکلے اور آپ نے منبر پر چڑھ کر یہ آیات پڑھیں: (پس میں نے کہا کہ) اپنے رب سے استغفار کرو، بیشک وہ بڑا بخشنے والا ہے، وہ تم پر آسمان سے موسلا دھار بارش برسائے گا، اور مال اور بیٹوں سے تمہاری مدد کرے گا، اور تمہارے لئے باغ بنا دے گا اور تمہارے لئے نہریں جاری کردے گا [سورة نوح: 10-12] ، اپنے رب سے استغفار کرو، بیشک وہ بڑا بخشنے والا ہے۔ پھر منبر سے نیچے تشریف لے آئے۔ لوگوں نے کہا کہ اے امیر المؤمنین اگر آپ بارش کے لئے دعا کرتے تو اچھا ہوتا! حضرت عمر نے فرمایا کہ میں نے اسے اس جگہ سے طلب کیا جہاں سے بارش برستی ہے۔ [مصنف ابن ابي شيبه/كتاب صلاة التطوع والإمامة/حدیث: 8565]

حضرت اسلم عجلی فرماتے ہیں کہ کچھ لوگ ایک مرتبہ بارش کی دعا کرنے نکلے، ابراہیم بھی ان کے ساتھ تھے۔ جب وہ دعا سے فارغ ہوئے تو نماز پڑھنے لگے۔ ابراہیم نے ان کے ساتھ نما ز نہیں پڑھی بلکہ واپس آگئے۔ [مصنف ابن ابي شيبه/كتاب صلاة التطوع والإمامة/حدیث: 8566]

حضرت مغیرہ کہتے ہیں کہ حضرت ابراہیم، حضرت مغیرہ بن عبد اللہ ثقفی کے ساتھ بارش کی دعا کرنے نکلے۔ حضرت مغیرہ نماز پڑھنے لگے تو حضرت ابراہیم انہیں نماز پڑھتا دیکھ کر واپس آگئے۔ [مصنف ابن ابي شيبه/كتاب صلاة التطوع والإمامة/حدیث: 8567]

حضرت جابر رضی اللہ عنہ فرماتے ہیں کہ رسول اللہ صلی اللہ علیہ وسلم سے سوال کیا گیا کہ کون سی نماز افضل ہے؟ آپ نے فرمایا کہ لمبے قیام والی نماز۔ [مصنف ابن ابي شيبه/كتاب صلاة التطوع والإمامة/حدیث: 8568]

ایک صحابی فرماتے ہیں کہ نبی کریم صلی اللہ علیہ وآلہ وسلم نماز میں اتنی دیر قیام فرماتے کہ آپ کے پاؤں مبارک ورم آلود ہوجاتے، آپ سے کسی نے اس بارے میں کمی کرنے کو کہا تو آپ نے فرمایا کہ کیا مں، اللہ کا شکر گذار بندہ نہ بنوں؟ [مصنف ابن ابي شيبه/كتاب صلاة التطوع والإمامة/حدیث: 8569]

ایک اور سند سے حضرت مغیرہ بن شعبہ رضی اللہ عنہ کے واسطے سے نبی کریم صلی اللہ علیہ وآلہ وسلم سے بھی یونہی منقول ہے۔ [مصنف ابن ابي شيبه/كتاب صلاة التطوع والإمامة/حدیث: 8570]

حضرت ابراہیم فرماتے ہیں کہ لمبا قیام مجھے رکوع و سجود کی کثرت سے زیادہ پسند ہے۔ [مصنف ابن ابي شيبه/كتاب صلاة التطوع والإمامة/حدیث: 8571]

حضرت حجاج بن حسان کہتے ہیں کہ میں نے حضرت ابو مجلز سے تہجد کی نماز کے بارے میں سوال کیا کہ لمبی قراءت آپ کو زیادہ پسند ہے یا زیادہ رکوع و سجود؟ انہوں نے فرمایا لمبی قراءت مجھے زیادہ پسند ہے۔ [مصنف ابن ابي شيبه/كتاب صلاة التطوع والإمامة/حدیث: 8572]