حضرت سعید بن المسیب فرماتے ہیں کہ غلام اپنے والد اور والدہ پر آقا کی اجازت کے بغیر صدقہ نہ کرے۔ [مصنف ابن ابي شيبه/كتاب الزكاة/حدیث: 10564]

حضرت درہم فرماتے ہیں کہ میں حضرت ابوہریرہ سے دریافت فرمایا کہ میرے آقا نے مجھ پر روزانہ ایک درہم (ادا کرنا) مقرر کیا ہے۔ کیا میں صدقہ کرسکتا ہوں؟ آپ نے فرمایا: تیرے لئے تیرے خون اور تیرے مال میں آقا کی اجازت کے بغیر کچھ بھی (صدقہ کرنا) جائز نہیں ہے۔ تو مسکین کو لقمہ کھلا دیا کر (تیرے لئے یہی کافی ہے)۔ [مصنف ابن ابي شيبه/كتاب الزكاة/حدیث: 10565]

حضرت عطاء فرماتے ہیں کہ غلام آقا کی اجازت کے بغیر صدقہ نہیں کرے گا۔ [مصنف ابن ابي شيبه/كتاب الزكاة/حدیث: 10566]

حضرت اسماعیل بن سلیمان فرماتے ہیں کہ میں حضرت شعبی کے پاس حاضر تھا کہ ایک غلام نے آپ سے سوال کیا کہ میں اتنا اتنا کماتا ہوں اور اس میں سے اتنا اتنا میرا آقا لے لیتا ہے۔ کیا میں صدقہ کرسکتا ہوں؟ آپ نے فرمایا (تو صدقہ کرے بھی تو) اس کا اجر تیرے آقا کیلئے ہے۔ [مصنف ابن ابي شيبه/كتاب الزكاة/حدیث: 10567]

حضرت عمرو بن عاص مسکین کو کوئی چیز دینے کے لیے حکم دیتے پھر اگر وہ (مسکین) نہ ملتا تو اس چیز کو رکھ دیا جاتا یہاں تک کہ وہ اسے کسی دوسرے (مسکین) کو عطا فرما دیتے۔ [مصنف ابن ابي شيبه/كتاب الزكاة/حدیث: 10568]

حضرت عکرمہ اس بات کو ناپسند فرماتے تھے کہ جب کسی سائل کو کوئی کھانے کی چیز دینے کا حکم دیں پھر وہ (سائل) نہ ملے تو خود اس کو تناول فرما لیں، بلکہ (اسے روکے رکھتے) یہاں تک کہ صدقہ کردیتے۔ [مصنف ابن ابي شيبه/كتاب الزكاة/حدیث: 10569]

حضرت عمرو بن سعید فرماتے ہیں کہ ایک شخص نے حضرت حمید بن عبد الرحمن سے کچھ مانگا، حضرت حمید نے اس سے فرمایا کہ تو گمراہ ہے۔ اور گویا وہ عبادی تھا۔ (عرب کا قبیلہ جو گمراہ ہو کر نصرانیت اختیار کرلے ان کو عبادی کہا جاتا ہے) پھر اس کو کچھ دینے کا حکم فرمایا تو اس نے اسکو کم سمجھا اور لینے سے انکار کردیا۔ حضرت حمید نے فرمایا کہ اگر تو چاہتا ہے تو قبول کرلے ورنہ ہم کسی اور کو دے دیں گے۔ پھر آپ نے ارشاد فرمایا کہ کہا جاتا تھا: سائل کو (کچھ دے کر) لوٹاؤ اگرچہ پرندہ (چکور) کا معمولی سر ہی کیوں نہ ہو۔ [مصنف ابن ابي شيبه/كتاب الزكاة/حدیث: 10570]

حضرت طاؤس سے ایک شخص نے دریافت کیا کہ کوئی شخص سائل کو کچھ دینے کیلئے نکالتا ہے لیکن وہ سائل اس سے گم ہوجاتا ہے بعد میں اسکو نہیں پاتا تو کیا کرے؟ آپ نے فرمایا اس کے علاوہ کسی اور کو دیدے۔ [مصنف ابن ابي شيبه/كتاب الزكاة/حدیث: 10571]

ابراہیم سے دریافت کیا گیا کہ ایک شخص کسی مسکین کو صدقہ دینے کیلئے نکالتا ہے لیکن وہ مسکین اس سے چھوٹ جاتا ہے (نہیں ملتا) تو اب وہ کیا کرے؟ آپ نے فرمایا کہ وہ اسے روکے رکھے یہاں تک کہ کسی اور مسکین کو دیدے۔ اور جو چیز اس نے اللہ تعالیٰ کیلئے مقرر کردی ہو اس سے رجوع نہ کرے۔ [مصنف ابن ابي شيبه/كتاب الزكاة/حدیث: 10572]

حضرت ابن سیرین فرماتے ہیں کہ جب تو سائل کی طرف کوئی چیز (ٹکڑا) لیکر نکلے اور اس کو نہ پائے تو اس چیز کو روکے رکھ یہاں تک کہ اس کے علاوہ کوئی اور آجائے۔ [مصنف ابن ابي شيبه/كتاب الزكاة/حدیث: 10573]