حضرت عبید اللہ بن عدی بن خیار فرماتے ہیں کہ مجھے دو آدمیوں نے خبر دی کہ وہ دونوں نبی کریم صلی اللہ علیہ وآلہ وسلم کے پاس صدقہ (زکوٰۃ) کا سوال کرنے کے لئے حاضر ہوئے۔ راوی فرماتے ہیں کہ آپ نے ان پر نظر اٹھائی اور پھر نیچی کی اور فرمایا تم دونوں تو قوی اور صحت مند ہو۔ پھر فرمایا اگر تم چاہو تو میں تم دونوں کو عطا کر دوں، (لیکن) غنی اور کمانے والے قوی کے لئے کوئی حصہ (صدقات و زکوٰۃ میں) نہیں ہے۔ [مصنف ابن ابي شيبه/كتاب الزكاة/حدیث: 10974]

حضرت عبد اللہ بن عمرو رضی اللہ عنہ فرماتے ہیں کہ غنی اور قوت والے کے لئے صدقہ (زکوٰۃ) لینا مناسب نہیں ہے۔ [مصنف ابن ابي شيبه/كتاب الزكاة/حدیث: 10975]

حضرت حمزہ بن عبد اللہ اپنے والد رضی اللہ عنہ سے روایت کرتے ہیں کہ نبی کریم صلی اللہ علیہ وآلہ وسلم نے ارشاد فرمایا: تم میں سے کوئی شخص ہمیشہ سوال کرتا رہتا ہے یہاں تک کہ وہ اللہ تعالیٰ سے اس حال میں ملے گا کہ اس کے چہرے پر گوشت کا کوئی ٹکڑا نہیں ہوگا۔ [مصنف ابن ابي شيبه/كتاب الزكاة/حدیث: 10976]

حضرت عبد اللہ بن عباس رضی اللہ عنہما فرماتے ہیں کہ اگر سوال کرنے والا (مانگنے والا) جان لے جو اس پر وعیدیں ہیں تو وہ (کبھی بھی) سوال نہ کرے۔ [مصنف ابن ابي شيبه/كتاب الزكاة/حدیث: 10977]

حضرت مسروق فرماتے ہیں کہ جو شخص بغیر فاقہ کے لوگوں سے سوال کرتا ہے وہ قیامت کے دن اس حال میں آئے گا کہ اس کے چہرے پر خراشیں یا زخم ہوں گے۔ [مصنف ابن ابي شيبه/كتاب الزكاة/حدیث: 10978]

حضرت عمرو بن میمون سے مروی ہے حضرت ام الدرداء نے حضرت ابو الدرداء رضی اللہ عنہ سے فرمایا کہ اگر میں آپ کے بعد محتاج ہوگئی تو کیا میں صدقہ و زکوٰۃ کھا سکتی ہوں؟ آپ نے فرمایا نہیں، کام کرنا اور کھانا، انہوں نے پھر فرمایا اگر میں ضعف کی وجہ سے کام کرنے سے عاجز آگئی تو؟ آپ نے فرمایا (کھیتوں سے) خوشے چن لینا لیکن صدقہ و زکوٰۃ نہ کھانا۔ [مصنف ابن ابي شيبه/كتاب الزكاة/حدیث: 10979]

حضرت ابن جندب سے مروی ہے کہ رسول اللہ صلی اللہ علیہ وسلم نے ارشاد فرمایا: آدمی کا ہر سوال قیامت کے دن اس کے چہرہ میں ایک نشان ہوگا الا یہ کہ وہ بادشاہ سے یا کسی بہت ضروری حاجت کی وجہ سے سوال کرے۔ [مصنف ابن ابي شيبه/كتاب الزكاة/حدیث: 10980]

حضرت ابوہریرہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: جو شخص لوگوں سے ان کے مال کا سوال کرے مال کی زیادتی کے لئے تو بیشک وہ انگارے کا سوال کر رہا ہے پس چاہے تو اس انگارے کو کم کرلے یا چاہے تو زیادہ کرلے۔ [مصنف ابن ابي شيبه/كتاب الزكاة/حدیث: 10981]

حضرت حبشی السلولی رضی اللہ عنہ فرماتے ہیں کہ میں نے نبی کریم صلی اللہ علیہ وآلہ وسلم کو فرماتے ہوئے سنا کہ جو شخص لوگوں سے اپنا مال زیادہ کرنے کے لیے سوال کرتا ہے تو یہ سوال اس کے چہرہ میں خراش اور جہنم کا گرم پتھر ہے جس کو بروز قیامت کھائے گا۔ اور یہ (ارشاد) حجۃ الوداع کے موقع پر تھا۔ [مصنف ابن ابي شيبه/كتاب الزكاة/حدیث: 10982]

حضرت عمر رضی اللہ عنہ فرماتے ہیں کہ جو لوگوں سے سوال کرے تا کہ اس کے ذریعہ اپنا مال بڑھائے بیشک وہ جہنم کے گرم پتھر ہیں، پس جو چاہے تو پتھر کم کرلے اور جو چاہے تو زیادہ کرلے۔ [مصنف ابن ابي شيبه/كتاب الزكاة/حدیث: 10983]