حضرت ضحاک سے دریافت کیا گیا کہ ایک غنی شخص سفر میں ہو اور اس کا سارا مال حالت سفر میں ختم ہوجائے اور وہ محتاج ہوجائے تو اس کا کیا حکم ہے؟ آپ نے فرمایا اس کو حالت سفر میں صدقہ عطا کیا جائے گا کیونکہ وہ مسافر ہے۔ [مصنف ابن ابي شيبه/كتاب الزكاة/حدیث: 10994]

حضرت حکیم بن حزام رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: جو مستغنی ہوتا ہے اللہ تعالیٰ اس کو غنی فرما دیتا ہے، اور جو پاک دامنی اختیار کرتا ہے اللہ تعالیٰ اس کو پاک دامن فرما دیتا ہے، اور اوپر والا ہاتھ (دینے والا ہاتھ) نیچے والے ہاتھ (لینے والے ہاتھ) سے بہتر ہے۔ [مصنف ابن ابي شيبه/كتاب الزكاة/حدیث: 10995]

حضرت حکیم بن حزام رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: اوپر والا ہاتھ نیچے والے ہاتھ سے بہتر ہے۔ [مصنف ابن ابي شيبه/كتاب الزكاة/حدیث: 10996]

حضرت ابو سعید رضی اللہ عنہ فرماتے ہیں کہ ایک دن بھوک کی وجہ سے میں نے اپنے پیٹ پر پٹی باندھ لی، پھر میں نبی کریم صلی اللہ علیہ وآلہ وسلم کے پاس آیا تو میں نے آپ صلی اللہ علیہ وآلہ وسلم کو یہ فرماتے ہوئے سنا کہ جو شخص پاکدامنی اختیار کرنا چاہتا ہے تو اللہ تعالیٰ اس کو پاکدامن رکھتا ہے اور جو استغناء چاہتا ہے اللہ تعالیٰ اسکو مستغنی فرما دیتا ہے اور جس نے ہم سے سوال کیا یا تو ہم اس کو خرچہ دے دیں گے یا اس کی امداد کردیں گے۔ (لیکن) جو ہم سے مستغنی اور (سوال کرنے سے) پاکدامن رہا یہ اس کے لئے بہتر ہے اس سے کہ ہم سے سوال کرے۔ راوی فرماتے ہیں کہ میں واپس لوٹ گیا اور کسی چیز کا سوال نہ کیا۔ [مصنف ابن ابي شيبه/كتاب الزكاة/حدیث: 10997]

حضرت عبد الرحمن بن ابی لیلیٰ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: لوگوں سے سوال کرنے سے مستغنی رہو اگرچہ مسواک کا ایک ٹوٹا ہوا ٹکڑا ہی کیوں نہ ہو۔ [مصنف ابن ابي شيبه/كتاب الزكاة/حدیث: 10998]

حضرت عبد الرحمن بن ابی لیلیٰ سے اسی کے مثل منقول ہے لیکن انہوں نے مرفوعا روایت نہیں کیا۔ [مصنف ابن ابي شيبه/كتاب الزكاة/حدیث: 10999]

حضرت عبد اللہ بن عمر رضی اللہ عنہما فرماتے ہیں کہ ہم آپس میں یہ بات کیا کرتے تھے کہ اوپر والا ہاتھ وہ ہے جو (سوال کرنے سے) بچنے والا ہو۔ [مصنف ابن ابي شيبه/كتاب الزكاة/حدیث: 11000]

حضرت ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے ارشاد فرمایا: اوپر والا ہاتھ نیچے والے ہاتھ سے بہتر ہے، اور بہترین صدقہ وہ ہے جس کے بعد (دینے والا) مالدار رہے، اور (دینے میں) ان لوگوں سے ابتدا کر جو تیری کفالت میں ہیں۔ [مصنف ابن ابي شيبه/كتاب الزكاة/حدیث: 11001]

حضرت ثعلبہ بن زہدم رضی اللہ عنہ سے مروی ہے کہ (قبیلہ) ثعلبہ کے کچھ لوگ نبی کریم صلی اللہ علیہ وسلم کی خدمت میں پہنچے، اس وقت آپ صلی اللہ علیہ وسلم خطبہ ارشاد فرما رہے تھے اور فرما رہے تھے کہ دینے والے کا ہاتھ اوپر والا ہے اور مانگنے والے کا ہاتھ نیچے والا ہے، اور دینے میں ان لوگوں سے ابتدا کر جو تیری کفالت میں ہیں: تیری ماں، تیرا باپ، تیری بہن، تیرا بھائی، پھر جو تیرا قریبی ہے اور پھر جو اس کے بعد قریبی ہے۔ [مصنف ابن ابي شيبه/كتاب الزكاة/حدیث: 11002]

حضرت احنف بن قیس فرماتے ہیں کہ میں مدینہ کی ایک مسجد میں بیٹھا ہوا تھا کہ اتنے میں ایک شخص آیا، جو حلقہ بھی اسے دیکھتا اس سے بھاگ جاتا، یہاں تک کہ وہ اس حلقہ تک پہنچا جس میں میں تھا، لوگ تو بھاگ گئے لیکن میں وہیں ثابت قدم رہا۔ میں نے پوچھا: آپ کون ہیں؟ انہوں نے فرمایا: رسول اللہ صلی اللہ علیہ وسلم کا صحابی ابو ذر۔ میں نے عرض کیا: لوگ آپ سے کیوں بھاگتے ہیں؟ فرمایا: اس لئے کہ میں انہیں خزانے (جمع کرنے) سے روکتا ہوں۔ میں نے عرض کیا: ہمارے وظیفے بہت بڑھ گئے ہیں اور بلند ہو گئے ہیں، کیا آپ کو ان کی وجہ سے ہم پر (کسی نقصان کا) خوف ہے؟ انہوں نے فرمایا: آج تو نہیں، لیکن قریب ہے کہ یہ تمہارے دین کی قیمت بن جائیں، پس (اس وقت) انہیں (حکمرانوں کو) اور ان (وظیفوں) کو چھوڑ دینا۔ [مصنف ابن ابي شيبه/كتاب الزكاة/حدیث: 11003]