حضرت زید بن وہب فرماتے ہیں کہ ہم ربذہ میں حضرت ابو ذر رضی اللہ عنہ کے پاس سے گزرے تو ہم نے ان سے ان کے یہاں ٹھہرنے کے بارے میں پوچھا۔ انہوں نے فرمایا: میں شام میں تھا، میں نے یہ آیت پڑھی: { وَالَّذِیْنَ یَکْنِزُوْنَ الذَّھَبَ وَالْفِضَّۃَ وَلَا یُنْفِقُوْنَھَا فِیْ سَبِیْلِ اللّٰہِ فَبَشِّرْھُمْ بِعَذَابٍ اَلِیْمٍ } تو حضرت معاویہ رضی اللہ عنہ نے فرمایا: یہ تو صرف اہل کتاب کے بارے میں ہے۔ ہم نے کہا: یہ ہمارے بارے میں بھی ہے اور ان کے بارے میں بھی۔ [مصنف ابن ابي شيبه/كتاب الزكاة/حدیث: 11004]

حضرت مسروق سے مروی ہے کہ حضرت عبد اللہ رضی اللہ عنہ فرماتے ہیں کہ قسم ہے اس ذات کی جس کے سوا کوئی معبود نہیں، اللہ تعالیٰ مال جمع کرنے والے شخص کو اس طرح عذاب نہیں دے گا کہ ایک درہم دوسرے درہم کو چھوئے اور ایک دینار دوسرے دینار کو، بلکہ اللہ تعالیٰ اس کی کھال کو پھیلا دے گا یہاں تک کہ ہر درہم اور دینار کو (اس پر) الگ الگ رکھا جائے گا۔ [مصنف ابن ابي شيبه/كتاب الزكاة/حدیث: 11005]

حضرت ابو وائل فرماتے ہیں کہ میں نے حضرت عبد اللہ رضی اللہ عنہ سے سنا، وہ اللہ تعالیٰ کے ارشاد { سَیُطَوَّقُوْنَ مَا بَخِلُوْا بِہٖ یَوْمَ الْقِیٰمَۃِ } کی تفسیر میں فرماتے ہیں کہ ان کے گلے میں ایک اژدہا کا طوق ڈالا جائے گا، اس کے منہ پر دو سیاہ نقطے ہوں گے، وہ اسے ڈسے گا اور کہے گا: میں تیرا وہی مال ہوں جس میں تو بخل کرتا تھا۔ [مصنف ابن ابي شيبه/كتاب الزكاة/حدیث: 11006]

حضرت جابر سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: نہیں ہے کوئی اونٹوں، گائے اور بکریوں والا شخص جس نے ان کا حق ادا نہیں کیا رکھا جائے گا قیامت کے دن برابر اور چٹیل میدان میں، جہاں ہر کھر والا جانور اس کو کھروں سے روندے گا اور ہر سینگ والا جانور اس کو سینگ سے مارے گا، اس دن کوئی جانور ایسا نہ ہوگا جس کے سینگ نہ ہوں یا ٹوٹے ہوئے ہوں۔ صحابہ کرام نے عرض کیا اے اللہ کے رسول! ان کا حق کیا ہے؟ آپ صلی اللہ علیہ وآلہ وسلم نے فرمایا جفتی کیلئے اونٹ کسی کو (عاریۃ) دے دینا، اور اس کے ڈول کا عاریۃ دینا، اور اس کو کسی کی ضرورت پوری کرنے کیلئے عاریۃ دینا، اور اونٹنی کا دودھ پانی کے گھاٹ کے پاس نکالنا (تاکہ مساکین بھی پی سکیں)، اور اس پر اللہ تعالیٰ کے راستہ میں سواری دینا۔ [مصنف ابن ابي شيبه/كتاب الزكاة/حدیث: 11007]

حضرت ابو ذر فرماتے ہیں کہ میں نے نبی کریم صلی اللہ علیہ وآلہ وسلم سے سنا یا فرمایا کہ میں نے اپنے محبوب سے سنا وہ فرماتے ہیں: اونٹ (کا حق) اس کا صدقہ کرنا ہے، جس نے دینار یا درہم جمع کیا یا سونے کی ڈلی یا چاندی جمع کی اور اس کو مہیا نہیں کیا گیا قرض خواہ کیلئے اور نہ ہی اس کو اللہ کی راہ میں خرچ کیا گیا تو وہ داغنے (کا آلہ ہے) قیامت کے دن اس سے داغا جائے گا۔ [مصنف ابن ابي شيبه/كتاب الزكاة/حدیث: 11008]

حضرت ابراہیم اللہ تعالیٰ کے ارشاد { سَیُطَوَّقُوْنَ مَا بَخِلُوْا بِہٖ یَوْمَ الْقِیٰمَۃِ } کی تفسیر میں فرماتے ہیں کہ وہ آگ کا طوق ہوگا۔ [مصنف ابن ابي شيبه/كتاب الزكاة/حدیث: 11009]

حضرت مسروق اللہ پاک کے ارشاد { سَیُطَوَّقُوْنَ مَا بَخِلُوْا بِہٖ یَوْمَ الْقِیٰمَۃِ } کی تفسیر میں فرماتے ہیں کہ اس سے وہ شخص مراد ہے کہ جس کو اللہ تعالیٰ نے مال کی نعمت عطا فرمائی لیکن اس نے قرابت دار کو اسکا حق ادا نہ کیا، تو وہ مال اسکے لئے سانپ بنادیا جائے گا جس کا اس کو طوق پہنایا جائے گا، تو وہ کہے گا، میرے اور تیرے درمیان کیا تعلق ہے؟ (یعنی تو مجھ کو کیوں چمٹ گیا ہے؟) سانپ اس سے کہے گا میں تیرا مال ہوں۔ [مصنف ابن ابي شيبه/كتاب الزكاة/حدیث: 11010]

حضرت ابوہریرہ سے مروی ہے کہ نبی کریم صلی اللہ علیہ وآلہ وسلم کے پاس صدقات (زکوٰۃ) کی کھجوریں آئیں تو حضرت حسن بن علی رضی اللہ عنہ نے اس میں سے ایک کھجور لے کر منہ میں چبانا شروع کر دی، آپ صلی اللہ علیہ وآلہ وسلم نے ان کو (پیار سے) ڈانٹا اور فرمایا: کخ کخ، ہمارے لئے صدقہ حلال نہیں ہے۔ [مصنف ابن ابي شيبه/كتاب الزكاة/حدیث: 11011]

حضرت ربیعہ بن شیبان فرماتے ہیں کہ میں نے حضرت حسن بن علی رضی اللہ عنہ سے دریافت کیا کہ آپ کو نبی کریم صلی اللہ علیہ وآلہ وسلم کی کون سی بات یاد ہے اور آپ نے ان سے کیا محفوظ کیا ہے؟ حضرت حسن نے فرمایا میں نے صدقہ کی کھجوروں میں سے ایک کھجور لے کر منہ میں ڈال لی تھی تو آنحضرت صلی اللہ علیہ وآلہ وسلم نے فرمایا: ہمارے لئے صدقہ (کھانا) حلال نہیں ہے۔ [مصنف ابن ابي شيبه/كتاب الزكاة/حدیث: 11012]

حضرت انس سے مروی ہے کہ حضور کرم (صلی اللہ علیہ وآلہ وسلم) کو ایک کھجور ملی تو آپ صلی اللہ علیہ وآلہ وسلم نے فرمایا: اگر یہ صدقہ کی نہ ہوتی تو میں اس میں سے ضرور تناول کرتا۔ [مصنف ابن ابي شيبه/كتاب الزكاة/حدیث: 11013]