حضرت ابو ہریرہ رضی اللہ عنہ ارشاد فرماتے ہیں جو میت کو غسل دے وہ بعد میں (خود بھی) غسل کرے اور جو میت کو کندھا دے وہ وضو کرے۔ [مصنف ابن ابي شيبه/كتاب الجنائز/حدیث: 11481]

حضرت ابو ہریرہ رضی اللہ عنہ سے مروی ہے کہ رسول اللہ صلی اللہ علیہ وآلہ وسلم نے ارشاد فرمایا جو میت کو غسل دے وہ خود غسل کرے اور جو اس کو کندھا دے وہ وضو کرلے۔ [مصنف ابن ابي شيبه/كتاب الجنائز/حدیث: 11482]

حضرت ابو قلابہ جب متل کو غسل دیتے تو خود بھی غسل کرلیتے۔ [مصنف ابن ابي شيبه/كتاب الجنائز/حدیث: 11483]

حضرت علی رضی اللہ عنہ کرم اللہ وجہہ ارشاد فرماتے ہیں کہ جب ابو طالب کا انتقال ہوا تو میں نبی کریم صلی اللہ علیہ وآلہ وسلم کی خدمت میں حاضر ہوا میں نے عرض کیا: اے اللہ کے رسول! آپ کا گمراہ اور بوڑھا چچا مرگیا ہے، آپ صلی اللہ علیہ وآلہ وسلم نے ارشاد فرمایا: ان کے پاس جاؤ اور ان کو ڈھانپ دو اور پھر جب تک میرے پاس نہ آ جاؤ کچھ نہ کرنا، چناچہ میں نے انہیں ڈھانپ دیا اور حاضر خدمت ہوا آپ صلی اللہ علیہ وآلہ وسلم نے مجھے حکم دیا تو میں نے غسل کیا، پھر آپ نے میرے لیے کچھ دعائیں کیں جو میرے نزدیک دنیا کی تمام چیزوں کے مل جانے سے زیادہ قابل حسرت ہیں۔ [مصنف ابن ابي شيبه/كتاب الجنائز/حدیث: 11484]

حضرت معاذ بن جبل فرماتے ہیں جو شخص میت کو غسل دے اور اس امانت کو (احسن طریقے سے) ادا کرے وہ گناہوں سے اس طرح نکلتا ہے جیسے اس کی والدہ نے اس کو اسی دن جناہو۔ [مصنف ابن ابي شيبه/كتاب الجنائز/حدیث: 11485]

حضرت فاطمہ سے مروی ہے کہ حضرت اسمائ نے وصیت فرمائی کہ میرے کفن پر خوشبو مت لگانا۔ [مصنف ابن ابي شيبه/كتاب الجنائز/حدیث: 11486]

حضرت نافع فرماتے ہیں کہ حضرت عبد اللہ بن عمر رضی اللہ عنہما چارپائی یا تابوت پر خوشبو لگانے کو ناپسند فرماتے تھے۔ [مصنف ابن ابي شيبه/كتاب الجنائز/حدیث: 11487]

حضرت ابو اسحاق فرماتے ہیں کہ میں نے حضرت حارث کے جنازہ پر خوشبودار (پاؤڈر) دیکھا۔ [مصنف ابن ابي شيبه/كتاب الجنائز/حدیث: 11488]

حضرت عمر بن عبد العزیز چارپائی پر خوشبو لگانے کو ناپسند سمجھتے تھے۔ [مصنف ابن ابي شيبه/كتاب الجنائز/حدیث: 11489]

حضرت حسن اور حضرت ابن سیرین چارپائی پر خوشبودار (پاؤڈر) لگانے کو ناپسند سمجھتے تھے۔ [مصنف ابن ابي شيبه/كتاب الجنائز/حدیث: 11490]