حضرت عبد اللہ بن عبید بن عمیر سے مروی ہے کہ حضرت عائشہ رضی اللہ عنہا نے وصیت فرمائی تھی کہ میرے جنازے کے پیچھے دھونی دان لیکر نہ آنا، اور مجھ پر لال مخمل کی چادر مت ڈالنا۔ [مصنف ابن ابي شيبه/كتاب الجنائز/حدیث: 11501]

حضرت بکر سے مروی ہے کہ حضرت عبد اللہ بن مغفل نے وصیت فرمائی تھی کہ میرے جنازے کی اتباع نہ کرنا آواز اور آگ کے ساتھ، اور مجھے پتھر نہ مارنا، یعنی وہ گارا جو کہ قبر کے کناروں پر ہوتا ہے۔ [مصنف ابن ابي شيبه/كتاب الجنائز/حدیث: 11502]

حضرت عبد الاعلیٰ فرماتے ہیں کہ حضرت سعید بن جبیر نے ایک جنازہ میں دھونی دان دیکھا تو اس کو توڑ دیا اور فرمایا میں نے حضرت عبد اللہ بن عباس رضی اللہ عنہما سے سنا ہے کہ اھل کتاب کی مشابہت اختیار مت کرو۔ [مصنف ابن ابي شيبه/كتاب الجنائز/حدیث: 11503]

حضرت حسن اور حضرت ابن سیرین جنازہ کے ساتھ دھونی دان لے جانے کو ناپسند سمجھتے تھے۔ [مصنف ابن ابي شيبه/كتاب الجنائز/حدیث: 11504]

حضرت امام شعبی ارشاد فرماتے ہیں کہ جب تم جنازے کو لے کر نکلو تو اسکے پیچھے آگ لے کر مت چلو۔ [مصنف ابن ابي شيبه/كتاب الجنائز/حدیث: 11505]

حضرت منصور ارشاد فرماتے ہیں کہ حضرت ابراہیم جنازے کے ساتھ دھونی دان لے کر جانے کو ناپسند سمجھتے تھے۔ [مصنف ابن ابي شيبه/كتاب الجنائز/حدیث: 11506]

حضرت ابن عون فرماتے ہیں کہ ہم صبح کے وقت ابراہیم نخعی کے پاس تشریف لے گئے تو لوگوں نے ہمیں بتایا کہ وہ فوت ہوگئے ہیں اور رات کو دفن کر دئیے گئے ہیں، پھر ہمیں حضرت عبد الرحمن بن اسود نے بتلایا کہ انہوں نے وصیت فرمائی تھی کہ میرے جنازے کے پیچھے آگ لے کر مت آنا، اور میری قبر پر عرزمی (جگہ کا نام) کچی اینٹیں مت رکھنا جو کوڑے کرکٹ سے بنائی جاتی ہیں۔ [مصنف ابن ابي شيبه/كتاب الجنائز/حدیث: 11507]

حضرت ابن عون فرماتے ہیں کہ ہم ابراہیم کی وفات کے بعد ان کے گھر آئے اور ہم نے دریافت کیا کہ انہوں نے کس چیز کی وصیت کی تھی؟ تو انہوں نے بتایا انہوں نے وصیت فرمائی تھی کہ میرے جنازے کے پیچھے آگ لے کر مت جانا، اور میری قبر لحد کھودنا، اور میری قبر میں عرزمی جگہ کی کچی اینٹیں نہ رکھنا۔ [مصنف ابن ابي شيبه/كتاب الجنائز/حدیث: 11508]

حضرت ابو سعید سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: جنازہ کا اتباع نہ کیا جائے آگ اور آواز کے ساتھ اور نہ اس کے آگے چلا جائے۔ [مصنف ابن ابي شيبه/كتاب الجنائز/حدیث: 11509]

حضرت حنش بن معتمر فرماتے ہیں کہ رسول اکرم (صلی اللہ علیہ وآلہ وسلم) ایک جنازہ میں تھے، آپ صلی اللہ علیہ وآلہ وسلم نے ایک خاتون کو دیکھا اس کے پاس دھونی دان تھا، آپ صلی اللہ علیہ وآلہ وسلم نے فرمایا اس کو بھگا دو، آپ صلی اللہ علیہ وآلہ وسلم مسلسل کھڑے رہے یہاں تک کہ لوگوں نے آپ صلی اللہ علیہ وآلہ وسلم سے عرض کیا: اے اللہ کے رسول! وہ مدینہ کی جھاڑیوں میں چھپ گئی ہے۔ [مصنف ابن ابي شيبه/كتاب الجنائز/حدیث: 11510]